Yohana 2
2
1Ku lidiku lya kola gavaka kya li ho kiserero mu Kana lya Galilaya, kandi mama wa Yesu ya li ho: 2kandi Yesu navegidzwi veve va langwa kutsia mu kiserero. 3Lwa iwaini ya gehera, mama wa Yesu ya mu volera, Si va veye newaini. 4Na Yesu ya mu volera, Ku veye naki inze nive, Mukali ive? Inyinga yange i kikiri kuduka. 5Mama wewe ya volera avatumekiri, Aga a mu volera, mu kole. 6Tsya li ho tsinyingu tsya magina tsitanu na indala, tsi vikwa kuli miima gyokwogidza gya Vayuda, sendala tsi leng'ana netsisiongo tsiviri kinga tsivaka. 7Yesu ya va volera, Mwizulitse amadzi mu tsinyingu. Ni vizulitsa du. 8Na a va volera, Kalunu mu dahe, mu hilire munene wekiserero. Ni va mu hilira. 9Munene wekiserero lwa ya tsatsama amadzi ga koleywi iwaini, kandi si ya manya wa i twuli (navutswa avatumekiri ava daha, va manya), munene wekiserero ya langa woserereywi, 10na a mu volera, Avandu vosi va tanga kuleta iwaini indahi; navutswa lwa va nweye inyingi va leta indamano: navutswa ive u tangi kuvisa iwaini indahi kuduka kalunu. 11Litanga yili lyevilolekidzu vivye, Yesu ya kola mu Kana lya Galilaya, na a mannya ubukumi bwibwe; kandi avegidzwi veve va mu suuvira.
12Inyima ya yaga ya sulunguta Kapernaume, mwene na mama wewe navamwavo navegidzwi veve; ni va menya madiku ga ta li manyingi. 13Kandi lipasaka lya Vayuda lya li himbi, Yesu yanegira na a tsia Yerusalemi. 14Kandi ya nyola mu litempeli ava gula tsing'ombe namagondi namakuulu, nava kirannya tsishilling vikaye. 15Na a lomba kyokukuyira nemigoye minyerere, na a va kunga vosi mu litempeli, amagondi netsing'ombe; na a salidza tsishilling tsya va kirannya na a kunaminya tsimeza tsyavo; 16na a volera ava gula makuulu, Mu twulidze vindu yivu yimu; mu ta kola inyumba ya Dada, inyumba yokugulana. 17Navegidzwi veve vidzulitsa ga ng'odwa, Lididikana lyenyumba yoyo li la ndia. 18Kunangwa Avayuda va tivula ni va mu volera, U ku mannya kilolekidzu ki, kigira nu u kola vindu yivi? 19Yesu ya tivula na a va volera, Mwononnyi litempeli yili, na inze nda li singeridza ku madiku gavaka. 20Kigira yaga Avayuda va vola, Litempeli yili lya li mu lyombakwa mihiga makumi gane nemihiga gyitano na mulala, na ive u la li singeridza ku madiku gavaka? 21Navutswa ya vola ku litempeli lyomubiri gwigwe. 22Lwa ya simugukidzwa kutwula mu vakudzi, avegidzwi veve vidzulitsa ya vola yaga; ni va suuvira amang'odwa nelikuva lya Yesu ya vola.
23Lwa ya li mu Yerusalemi ku lipasaka, inyinga yelilia vanyingi va suuvira ku lieta lilye, va lola vilolekidzu vya ya kola. 24Navutswa Yesu mwene si ya va suuvira mba, kigira ya manya avandu vosi 25kandi si ya li neliyenya iyomundu a mu lolekidzire amakuva gomundu; kigira mwene a manya aga veye mu mundu.
Actualmente seleccionado:
Yohana 2: MBE
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
©Bible Society of Kenya, 1967
