MATIUS 21
21
Yesus Ara Senenggomnya Yerusalem Heikek Wekel Byuk Yuba
(Mrk. 11:1-11; Luk. 19:28-40; Yoh. 12:12-19)
1Wera Yesus ab alja yuba doro diriga ban nang eb dara, seleb Yerusalem heik berem byik dara, sikda Zaitun meinik Betfage moka lanal byik. Heik enyek anyeb dara, Yesus adya alja yuba don nang penya nang ek ugunda men binirum aboka orugosuk. 2Dara ban nang enyek an, ”Ugunda heikek burumun dara, nim abaksin pama hnon, me moma delemlya pama hnon geregemeijaʾ anyek eibnerum. Dara, nidyaʾ penya pam sodyaʾ loboka nak bo yananurum. 3Bok yoknya bedya hnon ugunuk heibnesil dara, Wenelesilnya bedya orugesilaʾ anasa unam, henerum. Dara, eibdumunya bedya, Or sodyaʾ loboka bo binirum, henemla,” hyok. 4Ban wenyaboka leboknya nera, youmaʾ enyek ununumnaʾ lelemoknya bedya ban lemokja,
5 #
Za. 9:9
”Anda Sion heikek sam, anjaʾ dubnya bera wera yanggal, henelam. Alda ganya sokok nenebdangoka, nimi mekaʾ abaknaʾ orokaʾ abaksin pam ek buka yalamla, henelam,”
amoknya nenyek gigiwolulaʾ aboka ubok.
6Wera penya nang dara, Yesus adya sikenek anaso-anaso unuwanarum wenyasuk sok unuwarek. 7Wera sik penya nang era, abaksin pam era, me ab neikaʾ bo birik. Dara pam gwadya ara, sikja akleng edya yangiyiwek dara, Yesus ara an eilib welewoka bukok. 8Dara, nimi nauba Yesus abaksin pam ak buka balamok pik era, sikja akleng edya gwiriwoka yangoro beiri balamek. Anya nimi yok nim era, gal meklaʾ leboka pik ak sokdo yangoro balamek. 9#Mzm. 118:26Nimi nauba Yesus balamok pik ek, hnon nim era eimik dobdo balamek bok, hnon nim era men mengewoka balameekanya, sikja lelemek ara,
”Daud bedya me nek gibnok! Wenelesilnya bedya si sibuka yeilimoknya bera alak hyak perobaʾ dangalalul! Imik Neyung hyak imik sam ululanya bek giblenok!”
wenyaboka lelemek.
10Anya wera, Yesus ara Yerusalem heik hnoumung nong ok sam wekel yanggok dara, heik era doluwoka lan-lan al yibok. Wenyek heik enyek an nim edya dara, ”Ban benera heknyek yalamla do?” wenyaboka heildal yabek. 11Dara, Yesus balamokaʾ amba nimi nauba neikaʾ balamek nim edya, ”Alda ununumnaʾ lelelanya, Yesus ara an, alda Galilea sokok Nazaret heikek abnya bera an,” wenyalamek.
Yesus Ara Imik Neyung E Eremek Sam Wekel Byuk Yuba
(Mrk. 11:15-19; Luk. 19:45-48; Yoh. 2:13-22)
12Wera Yesus ara, Imik Neyung e eremek sam wekoka, anyagan bonaʾ beiyiboka dekoka rupiah amomaʾ elekdangoka ulumek nim ek yakal yabasuk. Anya, Yesus ara rupiah amomaʾ ubdangoka deklemek yanganaʾ gal ab, yalma wininga gouboka beiyiboka deklemek yanganaʾ gal eb dara, dolub menegok. 13#Yes. 56:7; Yer. 7:11Anya unulumek nim ek an, ”Imik Neyung yuba bukuk sam momnya dobokaʾ ara, Nadya e nera henga uboka Imik Neyung ak molon e alamnamak. Bok ugunja dara, hoga don nim e nenelelum!” hyok.
14Wera henga luma nang eb, nonga heilisuk nang eb dara, Yesus ak Imik Neyung ek sam ulumokaʾ ak yek dara, hwebsuk. 15Bok Imik Neyung yuba wa gakaʾ dub nang eb, yuba neksin nang eb dara, Yesus adya ban lok so unulumokaʾ anyek eiyiboka, mek-mek mab edya, ”Daud bedya me hyak pe ulumla!” alamekaʾ anyek keboka, hyak yu ganya bobek. 16#Mzm. 8:3Dara sikja Yesus ak, ”Sikda an wenyalamakaʾ ara, anda kelam de?” hyek. Wenyek Yesus adya, ”Yo, naba kenadyok umna,” hyookanya, ”Mab ab, momden mab eb dara, perob senewoka giblenokaʾ aboka, anda unusulum, an momnya dobokaʾ ara, ugunda eininggululum de?” hyok. 17Dara Yesus ara sikenek loboka, heik enyek anyebaʾ ara, Betania heikek bindiwoka anyagan mabok.
Doka Orok Gal Ek Wema Dabok Yuba
(Mrk. 11:12-14, 20-24)
18Wera hyak lugunaʾ nong enyek, Yesus ara onoʾ saaboka, Yerusalem heikek yalamok dara, hyak gwaneng ok nong ubok. 19Dara, hnon ara gala hnon pikek sam sekemokaʾ ak eibuk. Wera Yesus ara, ara galdok enyek daknamna senewoka kemel byuk bok, gal era doka mounaʾ orokokanya, meklaʾ dem ok bolomok. Anasa Yesus adya gal enyek an, ”Anda eimik era doka hyak mekaʾ hnon moubnenggunulam!” hyok. Dara gal era al wene sab-sab yalagok. 20Dara, Yesus adya alja yuba doro diriga ban nang edya, ban unuwokaʾ anyek eibeekanya, sikda hyak loka dabsuk. Anya Yesus ak, ”Ban gal era hekaʾ adya hyak berra aboka yalegal do?” aboka heibek. 21#Mat. 17:20; 1Kor. 13:2Anasa Yesus adya sikenek, ”Aldib, ugunda ganya daldom-daldom anaʾ loboka, dib senelemnelum dara, nadya ara gal ek wema dabne sok, ugumbabya anasonya nera unuwanasom. Dara nenyek ok gom, alda ban mein enyek an lebnelumja: Somokdangoka senenggom mek gwanek sam bologoldal bilom, henelum dara al gigiwoka unuwanamla. 22Anya ugunda al unuwanamlaʾ anyaʾ dib senewoka, ugunja heng uboka mololemnelumaʾ nidyaʾ ara, anera gigiwoka dobnelum,” hyok.
Yesus Adya Unulumokaʾ Damok Amba Heibek Yuba
(Mrk. 11:27-33; Luk. 20:1-8)
23Wera Yesus ara, Wenelesilnya bedyaʾ e eremek sam wekoka anyagan yuba anam neklesuk salek bok, Imik Neyung yuba wa gakaʾ dub nang eb, Yahudi dub nang eb dara yeiniboka, ”Ban nidyaʾ unululamaʾ ara, hek migib damok edya ululam do? Goma heknedya anaso unululom aboka wa nen elegajok do?” aboka heibek. 24Wenyek Yesus adya sikenek, ”Nababya ugunuk heibnesin. Ugunda nadya heibnesinya nenyek pe lebnumun dara, wera nababya ugunja heinulum damok era, anadya nara yokaʾ-yokaʾ ara unulamna aboka neknesin. 25Yohanes bera heknedya migib edya meka dalasuk do? Imik Neyung migib adya gom, nim adya migib edya gom?” aboka heibsuk. Wenyek Imik Neyung yuba wa gak nang eb, Yahudi dub nang eb dara, sik gangganek sam hek damok edya unulumok aboka saldalamekaʾ ara, ”Nunda Imik Neyung migib adya henemab dara, alja nuk, Wera dara hekasa ugunda dib senenggululum do, henesil. 26Bok, Nimi migib adya, henemab dara, Yohanes bera nimi nidyaʾ adya dara, senenggom ununumnaʾ lenya senelemakaʾ anasa, nimek lok ulumab,” aboka sabdek. 27Wenyaboka, ”Nunda elgoma,” hyek. Wenyek Yesus adya sikenek, ”Wera anasa nababya, damok enedya nara yokaʾ-yokaʾ unulamnaʾ ara, anedya unulamna aboka neknenggunusin,” hyok.
Mabo Penya Sunuwoka Lebok Yuba
28Dara onoʾ Yesus adya hnon lebokaʾ ara, ”Ban yub enesa dara, ugunja dara hekaʾ senewolum do? Wera nimi ben hnon memabo penya beiyimok. Dara, sikjaʾ neyung bedya yando me nek biniboka, Najabo, anda sumen anggur wak sam wel bininelem, hyok. 29Bok me nera, Neyung, na lek, hyok. Bok onoʾ eimik era, angoo senewoka ganya dangawoka or wel byuk. 30Dara, sikja neyung bera onoʾ weibsa me nek biniboka, al onsok orugok. Wenyek me nera, Neyung, perob, wera or wel binimna, hyokjok, eimik era lek aboka lobok. 31Anasa ban penya mabo dara, hek me nek sikjaʾ neyung bedya senemokaʾ ara gigiwoka unuwok do?” wenyaboka heibsuk. Dara, Imik Neyung yuba wa gak nang eb, Yahudi dub nang eb, sikja dara, ”Yando me nek,” hyek. Anasa Yesus adya sikenek, ”Ugunda banyek dib senewanalumaʾ ara: Mok soko amba rupiah molowoka dolomak nang eb, salyaʾ malya ura yabalamak gelewa enyek, Imik Neyung wenesin heikek men weknemaakanya, ugunuk dara, orok. 32#Luk. 3:12, 7:29-30Dara, Yohanes bera Wenelesilnya bedya unu ulunok senelelanya nenyek nekel yousuk bok, alja neklesuk yub era ugunda dib senewanggulum. Bok mok soko amba rupiah molowoka dolomak nang eb, salyaʾ malya ura yabalamak gelewa eb danyek, sikenek dib senemek. Wera ugunja dara, sikda dib senemekaʾ ara hnon seleb henga eiyilum bok anaba, ugunda eib kwebnenggulumukanya, Imik Neyung ak dib senewanggulum,” hyok.
Anggur Wa Pe Meewoka Welemek Nang Yuba
(Mrk. 12:1-12; Luk. 20:9-19)
33 #
Yes. 5:1-2
Dara Yesus ara, ”Ugunda ban sununaʾ enyek hnon kebnalum. Nimi ben hnon anggur wa soko meboka ninimok. Dara nidyaʾ lekaʾ dob ganagoka, dok meka londenaʾ amba, soko mek si pika weiliwoka, diri bun damba e im nong ok somok. Anya alda yok nim ek, ugunja weboka meewoka ulumnenulum abgogowok dara, alda yok heikek byuk. 34Wera doka dakna salek seleb oka dok dara, wa damnya bera galdoka dakoka beibnok aboka, alja oruknaʾ nang ek bo bokol yousuk. 35Bok wa weboka melemek nang edya, doka do yananulum aboka orugosuk nang enyek, ben hnonda embengaʾ saboka obeekanya, hnonnya bera dibaʾ obek, anya yoknya bera girik adya saboka beibik. 36Dara onoʾ wa damnya bera, men dara nimi mek soʾ bokol yeilisuk bok, wenyek dara, nimi nauba bokol yousuk. Bok al nang danaba neik so unu saboka obsik. 37Wenyek wa damnya bedya ganya era, Nadya me yokaʾ ak dara, perobaʾ leboka, obnenggunumak, senewoka alja me nek bokol yok. 38Wera wa damnya bedya me yalamokaʾ ak eibek dara, wa weboka meewoka ulumek nang era, wenyabdek, Wera wa damaʾ lunuwanamla me nera an. Alja wa nera nuk wa damaʾ danamabaʾ anasa, me nera obnemab! wenyabdek. 39Dara me nera somowoka wa legaʾ weilik sam bobogeekanya, saboka dibaʾ obek.”
40Wenyaboka Yesus ara sikenek heibsuk, ”Wei, wera wa damnya benyek yanasobok dara, wa welemek nang ek ara, hekaʾ hubnesuso do?” aboka heibsuk. 41Wenyek sikja Yesus ak, ”Sikenek obnesisookanya, wa ara yok nim ek pe weboka doka dakoka, al damnya bek eleganeseng nim enyek, welemnenulum aboka, lebnamso,” hyek. 42#Mzm. 118:22-23Danyek Yesus adya sikenek, ”Ugunda Imik Neyung yuba momnya dobokaʾ ara hnon mekaʾ eininggululum de?
E sonaʾ nang edya, loboka e songgulumak girik era, men perob girika dangamok. Anera Imik Neyung adya unusukaʾ ara an, perob nongaʾ senelemab e!
aro momnya dobok,” hyok.
43Dara Yesus adya, ”Anasa ugunda pe beknelum, ugunuk ab Imik Neyung wenesinaʾ damok ara, gwenewoka, Imik Neyung yuba doboka pe unulumnamak nim ek eleganamla. 44Nimi nidyaʾ girik enyek an malyingginimak nim era, soldowoka denghenemaakanya, girik enedya obnesil nim era, onoʾ on girik enedya youboka aso danamak,” hyok. 45Danyek Imik Neyung yuba wa gakaʾ dub nang eb, Yahudi dub nang eb dadya, nidyaʾ Yesus adya sunuwoka lebok yuba kebek dara, wera ban nidyaʾ ara nunsamba geklewoka lebsil senewoka ella ubek. 46Anasa sikda Yesus ak, salawoka henga goubnobaʾ aboka ubek bok, nimi nidyaʾ ara, Yesus ak senenggom ununumnaʾ lelelanya ulumla senelemeknya nenesa, unuwanamab senemek ganya era, nuk obsijek senewoka, lok anasa lomek.
Actualmente seleccionado:
MATIUS 21: LAINLC
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
