LUKAS 23
23
Yesus Ara Pilatus Bek Bo Byik Yuba
(Mat. 26:59-66; Mrk. 14:55-64; Yoh. 18:19-24)
1Yesus ak henga gouboka bo biniboka wekemek nang era, nidyaʾ sekoka Yesus ak doboka sikda dubnya Pilatus bek bo byik. 2Bo biniboka wera sondaʾ amba miniwoka Yesus ara unulamla-unulamla aboka yana kiboka lelemek. Anya sikja dara, ”Ban benera nunda Yahudi nimi sokok an malya nenelesilaʾ ak eillilemabnya bera an,” alamek. Alak danyek, ”Nara Kristus dubnya ulumnaʾ, alamlakanya, Kaisar dubnya bek ara ugunja dara, rupiah eleknaʾ ara mem, aboka yuba seklamla,” aboka lelemek. 3Dara Pilatus bedya Yesus ak, ”Anda aldib Yahudi nim edya sikja dubnya ululam de?” aboka heibuk. Danyek Yesus adya, ”Alan anja lelam an,” hyok. 4Dara Pilatus bedya yuba wa gakaʾ dub nang eb nimi nauba longol yeilimek nang ebdak, ”Alak henga geregoka obnesengaʾ nong malya unaʾ enyek dib unulamlaʾ ara, nadya dara mekaʾ eibnenggubna,” hyok. 5Bok nimi nauba hyak dukaʾ lolowoka lelemekja, ”Alja neklesil yub edya, nimi nauba Yudea sam malya nenero yousuk, men dara Galilea mok eb einimokaʾ ara, wera nunjaʾ ak an lero unulusilaʾ an,” aboka lelemek.
Yesus Ara Herodes Bedyaʾ Saramek Sam Bo Byik Yuba
6Pilatus bedya ban wenyan yub enyek kebok dara, ”Ban benera Galilea nang de?” aboka heibsuk. 7Dara, Yesus ara aldib Herodes dubnya ulumla mok ebnya an yuba kebok dara, Pilatus bedya Yesus ara, Herodes bek ban salek era Yerusalem heikek ulumokaʾ ak bo bululum aboka orugosuk.
8Herodes bera orowek Yesus adya yokaʾ-yokaʾ lok so beknaʾ nauba unululamnya aboka lelemekaʾ anyek keboka, hnonda al nong ak ok okoka eibsinya senelemok bok adya, wera Yesus anyek alak bo yek dara, hyak eiya dabok. Anya Herodes bedya dara, Yesus ara alda lok soʾ hnon laga unuwanamla senemok. 9Anasa Herodes bedya Yesus ak ara, yokaʾ-yokaʾ nauba heilimok bok, Yesus ara hyakaʾ mekaʾ yuba doro sabnenggumok. 10Dara onoʾ yuba wa gakaʾ dub nang eb, yuba neksin nang eb dara, sikba anyagan yeiniboka Yesus ak malya unulamla aboka yana kiboka nauba lelemek. 11Dara, Herodes beb, alja yin bonaʾ dub nang eb dadya, Yesus ak hyak nauba eirigala nenewoka malya uboka saboka oboka, nauba derewoka walamekaʾ ara, sene dub nang akleng ongiyiwok dara, onoʾ Pilatus dubnya bek onsok saaboka bo bulululum aboka orugusuk. 12Dara al ban sum nong enyek, Herodes beb Pilatus beb, isaʾ nenebdangoka ulurekaʾ ara, neikaʾ ek nang dangoka hibdek.
Yesus Ara Somoganamla Aboka Lebek Yuba
(Mat. 27:15-26; Mrk. 15:6-15; Yoh. 18:39–19:16)
13Pilatus bera yuba wa gakaʾ dub nang eb, yuba neksin nang eb dem salyaʾ nim eb mamagiyiwosuk. 14Dara sikenek lebsukaʾ ara, ”Ugunda ban benyek nak bo yeiniboka, alda hyak nimi nauba malya nenelesil hunulum. Wera nadya aljaʾ hogung ab yana lelewan bok, ugunja alda anaso-anaso malya unaʾ unulamla aboka yana kilumnya nera mekaʾ eibnenggubna. 15Anasonya neikek Herodes beneba anasoʾ hnon eibnenggublaʾ anasa, Yesus ara onoʾ nak an saaboka bo bululum aboka wenyhesil. Ban benera alak sang oboka dibneseng malya unaʾ era hnon unuwanggubuk. 16Anasa wera, nadya legebnaʾ adya deboka obgogowanya dara, henga lob lobnamna,” hyok. 17(Pilatus bera alda sobaʾ ban perob sum yenewan dara, nimi henga geregenanya bera hnon dem nim emba lobol lolosuk.)
18Ban lebokaʾ kebek dara, nimi nauba anyagan longol bilimek nim edya bii aboka lelemekja, ”Bera hyakaʾ obnok! Alda Barabas benyek nunsamba henga lob lobsilom!” alamek. 19(Barabas bera henga geregemekaʾ ara nauba heikek doluwoka malya uboka, nimi hnon omokaʾ anasa henga geregemek.)
20Pilatus bera Yesus anyek henga lobsinya senen ganya bomokaʾ anasa, alda nimi nauba longomek nang ek saaboka yuba sal eleklesuk. 21Bok nimi longomek nim edya, ”Bera oboka gal ak glabnok! Bera oboka gal ak glabnok,” alamek. 22Dara onoʾ Pilatus bera winilinya sum sikenek bii aboka lebokja, ”Bok alja dara, hek malya unaʾ ek ubuk do? Alak okoka ban malya unaʾ enesemba oboka dibnesengnya nera, nara kemenaba hyakaʾ mekaʾ anaba eibnenggumna bar! Alda legebnaʾ adya ok deboka obnya dara, henga lob lobnamna,” aboka lelemok.
23Bok nimi nauba longomek nim edya hyak yeiriwoka alda oboka gal ak glabnokaʾ aboka, nauba lelemekaʾ adya, wera sikja wenyalameknya nedya sikda migiba dok. 24Wera nimi longomek nang edya lelemek yuba sunuwoka gigiwoka, Pilatus bera Yesus ak or oboka gal ak glabnelum aboka lebsuukanya, 25sikja nunsamba henga lobnesilim alameknya, malya uboka nim omokaʾ anasa henga geregemeknya benyek, wera siksamba heng lobsuk. Anya wera, Yesus ak ugunja unuwanamab senemunya nera or unulululum aboka doboka elegosuk.
Yesus Ara Gal Ak Oboka Glabek Yuba
(Mat. 27:32-44; Mrk. 15:21-32; Yoh. 19:17-27)
26Dara anyagan longol yeilimek nang edya Yesus ara doboka bo gobek. Pikek anam bo beekanya, nimi ben hnon alja si Simon Kirene mok ebnya bek alda anam heikek yanggok bok, soruka salawoka Yesus oboka glabnemek gal era, anja Yesus balya pik bo binilam aboka orugoka boyiwek.
27Nimi nauba Yesus bo balamekaʾ weilik ara diriga ban dara, ana gangganek ara hnonda gelewa ak balamek. Gelewa dara, Yesus amba nauba ngeboka engebgiga balamek. 28Bok Yesus adya sikenek keeboka lebsukaʾ ara, ”Wei, ugunda Yerusalem gelewa o! Ugunda nasamba engenenaʾ ara mem. Alda ugun nong ab ugunja mab emba danyek engeldalalulum. 29Me bonaʾ orok gelewa eb, me hnon yak danganaʾ orok gelewa eb, me hnon mouma dininaʾ orok gelewa eb danyek, pelemak, henemak salek hnon yanalabok anasa, ugunsamba engeldalalulum! 30#Hos. 10:8; Why. 6:16Ban salek nimi nauba ara, nauba mein ak lebnemakja, Wera anda dakoka lendeweisilom! Mek mein ak anaba, nuk joboka lendeweisilom! henemak. 31Anasa wera, embengaʾ ulumla gal ak anyek babya nim adya anaso unuwanamak dara, wera orowek oulaʾ olomla gal ek ara, eimik era hekaʾ hubnemak do?” hyok.
32Onoʾ nimi penya nang, sikda nidyaʾ penya nang seik malya urekaʾ anasa, Yesus ab neikaʾ oboka gal ak glabnemab aboka bo bilisik. 33Wera, Nim Huk Yanggol Mein alamek meinik sam bo bisik dara, Yesus ab penya malya urek nang eb dara, ben hnonda sirik ek sam, ben hnonda waneng ek sam, Yesus ara hnoumung unuwoka oboka gal ak glabsik. 34#Mzm. 22:19Dara Yesus ara lero mololomokja, ”Neyung o, ban nang enedya unulumakaʾ ara, damok ara elgomjok ulumakaʾ anasa, sikja malya unaʾ era sikenek ab memelesilom,” hyok. Yesus adya ongolomok akleng era, heknedya dobnamla aboka, yina bomdewoka bokol dalamek.
35Yahudi dub nang edya Yesus ak geklewoka derewoka walamek dara, anyagan seklemek nang era, ngolukdo seklemek. Walamek nang edya dara, ”Alda Kristus, nimi bleblulaʾ aboka, Imik Neyung adya aldib weboka domlya dara, yok nang ek seleb alja bleblesuk bok dara, wera al damnya saaboka blebdolul!” aboka lelemek. 36#Mzm. 69:22Yin bonaʾ nang edyaʾ anaba Yesus ak geklewoka derewoka walamek. Dara yu mek enyek Yesus ak gweboka diniwoka lelemekja, 37”Anda aldib Yahudi nang dubnya ulumen bok dara, wera an damnya saaboka blebdalom!” aboka lelemek. 38Yesus oboka glamek gal dubuk ara, lero momnya domekja, ”Yahudi nang mok soko dubnya bera an e!” aro domek.
39Dara onoʾ dib malya umokaʾ anasa, Yesus ab neikaʾ oboka glasiknya waneng ek samnya bedya Yesus ak, ”Anda nimi blebsinaʾ dubnya unggululam de? Wei, nun hnon an dam nang hnon blebsilom!” aboka lelemok. 40Bok onoʾ sirik ek sam alja hem be neikaʾ oboka glasiknya bedya wenyanaʾ mem aboka, ”Anda Imik Neyung ak ara, lok ubnenggunggel de? Amba nunda neikaʾ seleb alab oboka gal ak glabasak. 41Alda nuk dara, aldib nunja okoka malya ubnumaʾ amba sunuwoka usak. Bok alak dara, hyak malya unaʾ orok bok, oboka gal ak glabamak!” hyok. 42Dara onoʾ benedya Yesus ak, ”Yesus o, anda eimik dubnya dangoka yanggamena dara, nak pe seiniwoka bekmoubnenelem!” hyok. 43Danyek Yesus adya benyek, ”Anak dib lebgen. Anda al sumen eneba, neikaʾ nab anab Firdaus heikek ulunam,” hyok.
Yesus Nonga Somogok Yuba
(Mat. 27:45-56; Mrk. 15:33-41; Yoh. 19:28-30)
44Yubyek dukdukanek nonga wenyek henga dinginaʾ loboka gunugomok. Soko heika nidyaʾ ara gunaʾ ok dangoka inimokaʾ moruwoka sinik anaso dok. 45#Kel. 26:31-33Yerusalem heikek Imik Neyung e lomok sam weknaʾ pikek goluwoka wiknelemek boksom era, gweldegoka penya nenewok. 46#Mzm. 31:6Danyek Yesus ara senenggomaʾ ngeboka lebnemokaʾ, ”Neyung o! Anjaʾ soruk lomok sam nadyaʾ embengaʾ unaʾ ganya era, elekdan!” hyok. Seleb wenyabgogowok dara, alda somogok.
47Anyagan yin bonaʾ dubnya bera ban nidyaʾ unuwokaʾ anyek, okoka eibuukanya, alda Imik Neyung ak perob aboka giboka lebokja, ”Aldib, alda hyak pelelanya bek ulumla!” hyok.
48Nimi nauba Yesus oboka gal ak glablemekaʾ anasa, ngolugel yeilimek nim era, ban nidyaʾ unulumokaʾ ara okoka eibek. Anasa sikda nidyaʾ nonga boukoka obdangdo engebgiga e pik byik. 49#Luk. 8:2-3Nimi nidyaʾ Yesus ak eiyiboka ella ulumek nim era, Galilea mok ebaʾ Yesus ab neikaʾ ulumek gelewa eb dara, mok so seklemeekanya, nidyaʾ unulumokaʾ ara gobdo kemelemek.
Yesus Beʾ Dakoka Dibek Yuba
(Mat. 27:57-61; Mrk. 15:42-47; Yoh. 19:38-42)
50-51Yudea sokok ab Arematea heikek abnya nimi si Yusuf be hnon ulumok. Alda perobnyekanya, Imik Neyung ak pe unuwoka, Imik Neyung dubnya uboka wenelemnesilya sum eibnunaʾ aboka diri ulumok dara, nimi nidyaʾ adyaʾ anaba alak perob senelemek. Al nong ak yana lelesin wa welemak nang dangoka ulumok bok, yana lelesin nang edya unuwanamab aboka, unulumeknya nera, alda lek senelemok. 52Yusuf bera Pilatus bek biniboka, Yesus ara beʾ dakoka dibnamnaʾ anasa nak lebnelom aboka molol byuk. 53Dara alda Yesus diyimekaʾ ak ab beʾ dakdo boblenggoka, boksom adya Yesus nonga waaboka kebok. Unuwok dara, Yesus nong ara, girik lomok nimi hnon mekaʾ angawoka dibnenggumek girik lomok dibuk. 54Ban unuwok sum era, lam sum ek unuwok, anya Sabat mem sum alamek sum era oka dok.
55Galilea mok ebaʾ ara, Yesus ab neikaʾ yeilimek gelewa dara, dilil yabok dara, neikaʾ biniboka dibek girik lom eneba seleb eibek. Al gelewa dara, Yesus adya beʾ ara girik ek sam hekaʾ huboka meiyiwoka dibakaʾ ara seleb okoka eibek. 56#Kel. 20:10; Ul. 5:14Gelewa dara, sikda ek biniboka, Yesus adyaʾ beʾ galak ngiknobaʾ aboka, gen-gen song meklaʾ ab, ngiknaʾ mek ab meewoka beil byik. Sabat mem sum seleb lebek dara, sikjaʾ yuba dolomekaʾ sunuwoka wa wenaʾ ara or lo pemek.
Actualmente seleccionado:
LUKAS 23: LAINLC
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
