Luka 21
21
Kĩeo kĩa mũka ntigwa
(Mar 12.41-44)
1Jesũ nĩ araithĩrĩrie akĩona bũrĩa itonga jiekagĩra iewa jiao ĩthandũkũni rĩa mwothi, kũu Hekarũni. 2Agĩcoka akĩona mũka ntigwa mũthĩni akĩruta ciringi jiĩrĩ jia rũthuku#21.2 ciringi jiĩrĩ jia rũthuku: Mbeca jia baita nini buru ũgũrini. 3Akiuga, “Ndĩbwĩra na ma atĩ mũka ntigwa ũũ akũruta mbeca nyingĩ nkũrũki ya bau bangĩ bonde. 4Gĩtũmi nĩ atĩ barĩa bangĩ barĩruta imwe jia irĩa igũtigara barĩkia kũingia mabata mao, ĩndĩ mũka ũũ anarĩ mũthĩni o ũgu, aruta o na kĩrĩa ankĩagũra gĩa kũrĩa nakĩo.”
Jesũ kwaria maũntũ megiĩ kwomorangwa gwa Hekarũ.
(Mat 24.1-2; Mar 13.1-2)
5Na rĩ, arutwa bamwe ba Jesũ nĩbaragia bakiugaga bũrĩa Hekarũ yagemetue na maiga ma goro na iewa ĩrĩa Ngai arutagĩrwa. Nawe Jesũ akiuga atĩrĩ, 6“Kagiita gakeja ino jionde bũkwona jiomorangwe, kwage ĩiga o na rĩmwe ĩgũrũ rĩa rĩrĩa rĩngĩ.”
Mathĩna na mĩnyamaro
(Mat 24.3-14; Mar 13.3-13)
7Arutwa bae bakĩmũũria atĩrĩ, “Mũrutani, maũntũ mama magekarĩka rĩ? Nĩmbi ĩgatwonia atĩ maũntũ mama marĩ akuĩ gwĩkarĩka?”
8Jesũ akĩbeera, “Ĩmenyagĩĩreni bũtĩkeje kwaĩrua; nĩũntũ antũ baingĩ bakeja bagĩtũmagĩra riĩtwa rĩakwa bakiugaga, ‘Nĩni Kristũ!’ na ‘Kagiita nĩ gakinyu!’ Bũtĩkabathingate. 9Bũtĩgakĩre rĩrĩa bũkegua nteto jia ndũa na mbũkanĩĩro; no mwanka maũntũ mau mambe matwĩkĩke, ĩndĩ tĩtakuga mũthiro wa ndĩ ũrĩ akuĩ gũkinya.”
10Akĩthi na mbere kũbera, “Ndĩ igaũkanĩĩra na monene maũkanĩĩre. 11Gũntũ kwingĩ gũkagĩa na ithingithia nene, ĩũra na mĩrimũ ya mĩthiro, na imaũntũ jioneke kuuma ĩgũrũ jia gũkĩrithia mũno na kũmakanithia. 12Ĩndĩ mbere ya maũntũ mau monde mekarĩka bakabũgwata na babũthĩnie. Bakabwira sinagoguni nĩkenda bũgambithue na babũthaĩkithie njera, na babwire mbere ya anene na ma gavana nĩũntũ bwa riĩtwa rĩakwa. 13Gaka nĩko gakethĩrwa karĩ kanya kenu kũruta ũira bwakwa. 14Bũtĩgatinde gwĩtanga bũgĩciria bũrĩa bũkauga rĩrĩa bũkagambithua. 15Nĩni nkabũa ũũgĩ bwa kwaria bũrĩa bũtĩkaũmĩrua kana bũkararua nĩ anthũ benu. 16Bũgakunyanĩrwa o na nĩ ajiari benu, nĩ barĩa bũjiaranĩrĩtue nabo, nĩ ndũgũ na acoore benu; na bamwe benu bakaũragwa. 17Bũkathũũrwa nĩ antũ bonde nĩũntũ bwa riĩtwa rĩakwa. 18Ĩndĩ gũtĩ rũjuĩrĩ o na rũmwe rwa kĩongo kĩenu rũkaũra. 19Kũũmĩria kwenu nĩ ku gũgatũma bwonokia mĩoyo yenu.
Jesũ kwaria maũntũ megiĩ kũmomorangwa kwa Jerusalemu
(Mat 24.15-21; Mar 13.14-19)
20“Ĩndĩ ĩrĩa bũkona mũjiĩ mũnene wa Jerusalemu ũgĩcĩgĩĩrua nĩ mbũtũ ya athigari, bũmenye kagiita kau ga kũmomorangwa karĩ akuĩ. 21Kagiita kau barĩa bakethĩrwa barĩ Judea nĩ baũre bakeithe irĩmani; barĩa bakethĩrwa barĩ ndani ya taũni bakaumagara baume ku, na barĩa bakethĩrwa barĩ mĩgũndani batĩtonya ku. 22Nĩũntũ iu nĩ jio ikethĩrwa irĩ ntukũ jia kĩerithanio, nĩkenda monde marĩa mandĩkĩtwe maingĩke. 23Wũũi kĩrĩ barĩa bakethĩrwa barĩ na nda na barĩa bakethĩrwa barĩ na twana twa gwonkia! Nĩũntũ ndĩ ĩno ĩkagĩa na kũthĩnĩka kũnene ĩndĩ ya kũerithua kwa antũ baba. 24Bamwe bakaũragwa na rũyiũ na bangĩ batawe bathamithue bathi bakĩnyagaragua antũni bonde ba ndĩ. Nabo antũ batĩ Ayahudi bakathũkangia Jerusalemu nkinya rĩrĩa kagiita kao ga kwathana gakathira.
Kwĩja kwa Mwana wa Muntũ
(Mat 24.29-31; Mar 13.24-27)
25“Gũkoneka ndwano riũani na mwerini, na nkinya njatani, nabo antũ ba ndĩ jionde bakagĩa na kũthĩnĩka na ũkĩri nĩũntũ bwa mĩrurumo na mĩkuũko ya ĩria. 26Antũ bakagirĩka nĩ ũkĩri, beterete kwona bũrĩa ndĩ ĩgekara, nĩũntũ mainya ma ĩgũrũ bakainainua. 27Nĩrĩo bũgacoka bwone Mwana wa Muntũ ejĩte arĩ ĩtuni, arĩ na inya na ũkengi mũnene. 28Rĩrĩa bũkona maũntũ mau mambĩria gwĩkarĩka rĩ, rũngamani wega, nĩũntũ wonokio bwenu bũkethĩrwa bũrĩ akuĩ.”
Ũrutani kuumania na mũfigi
(Mat 24.32-35; Mar 13.28-31)
29Jesũ agĩcoka akĩbaa ngerekano ĩno: “Ĩcirĩrieni mũfigi, na mĩtĩ ĩrĩa ĩngĩ yonde. 30Rĩrĩa bwona ĩkĩririba nĩbũmenyaga thano ĩrĩ gũkuĩ gũkinya. 31Ũgu no bu o na bwi, rĩrĩa bũkona maũntũ magĩkarĩka, bũkamenya Ũnene bwa Ngai bũrĩ akuĩ.
32“Ndĩbwĩra na ma atĩ rũjiaro rũrũ rũtĩthira maũntũ mama monde matĩkarĩkĩte. 33Ĩgũrũ na ndĩ ikathira, ĩndĩ jiugo jiakwa itĩkathira.
Gĩtũmi gĩa kwĩmenyeera
34“Ĩmenyagĩĩreni nkoro jienu itĩgatawe nĩ ndĩa na ũrebi, na gwĩtanga na maũntũ ma ũtũũro bwa gũkũ ndĩ. Bwarega kwĩmenyeera ntukũ ĩu ĩkabwĩthĩĩra o rĩmwe, 35ta mũtego, tontũ ĩkeja kĩrĩ antũ bonde barĩa batũũraga gũkũ ndĩ yonde. 36Ĩkaragani bwĩũgĩte magiita monde, bũkĩrombaga Ngai abũe inya ya kũmĩĩria maũntũ mama monde magekarĩka, na abũe inya ya kũmba kũrũngama mbere ya Mwana wa Muntũ.”
37Ntukũ o ntukũ Jesũ nĩarutanaga Hekarũni, na gwatuka akathi kũmama kĩrĩmani kĩrĩa gĩĩtagwa kĩa Mĩolĩbu. 38Na rũkĩĩrĩ mũno antũ bonde nĩbejaga kĩrĩ we Hekarũni kũmũthĩkĩĩria.
Actualmente seleccionado:
Luka 21: LUKA
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
God's word open for all
©Bible Society of Kenya, 2021
