YOËL 3
3
Ki Allah in monisig kon bangusa mita
1Ki Tuhan in noguman, “Kon singgai tatua Yerusalem bo Yohuda in poguḻiton-Ku in kobiagannea motompia. 2Bayongan in bangusa in sipunon-Ku bo diaan-Ku kon Ḷopá Pohohakiman. Bo sisigan-Ku in mosia kon tua popisí in aid monia moraat kon umat-Ku sin mosia in nosila-silaidon mako kon butá in Israel bo umat-Ku in iḷumbú monia kon butá mita in intau ibanea. 3Mosia in nopogonik in undi sin monantú mongo ki ine in mokouḻí kon intau mita inta sinoko dakop. Pinotaḷui monia in mongodeaga bo tayowmobiag sin baḻíon ata. Bo doit boḻinea in pakéon monia posundaḷan bo ponginuman kon anggur. 4Onuon monimu in Akuoi naa, ei Tirus, Sidon bo bayongan in butá in Pilistin? Moibog degá in iko motuḻí kon yaat in ginamu kon i-Nakó? Yo, tarimadon in tontuḻí-Ku inta ḷagidon moiangoi. 5Buḷawan bo saḷaka-Ku in inagowdon monimu, bo kapunyaan-Ku inta koboḻi in dinia monimu pinobayá in kuilmu. 6Intau in Yohuda bo Yerusalem in dinia monimu pinoyayú kon butá monia; onda intua pinotaḷui monimu kon bangusa in Yunani. 7Yo tanaa in diaan-Ku in mosia nongkon tampat inta pinopotaḷuian monimu kon i monia, bo tuḻían-Ku in aid moraatmu kon i monia. 8#Yes. 14:29-31, 23:1-18; Yer. 47:1-7; Yeh. 25:15–28:26; Am. 1:6-10; Zep. 2:4-7; Za. 9:1-7; Mat. 11:21-22; Luk. 10:13-14 Ki adí monimu ḷoḷaki bo bobay in potaḷui-Ku kon intau in Yohuda, bo potaḷui bui monia kon i Syeba, butá inta totok in moyayú. Akuoi, ki Tuhan, ain noguman.
9Potaaudon in naa kon bangusa mita: Posadiadon sin moparang bo poridomok! Pokisindogaidon in intau mita mongobarani bo moḷoḷaki; sipundon in bayongan in tontara, bo bayádon! 10#Yes. 2:4; Mi. 4:3 Tontaḷdon in mata in pajekomu mobaḻí kedang, bo tosilad roratabmu mobaḻí totumbuk. Bo intau inta moyangkó in musti moguman, ‘Akuoi in mayábí doman moparang naonda bo tontara!’ 11Igai, ḷagidon angoi, #3:11: Kamungkinan moḷoben mangaḻenea: ḷagidon angoi. Ibrani: Tuḷungaidon kaasí. ei bangusa mita nongkon bayongan in tampat! Poyosipundon kon ḷopá tatua.”
O, Tuhan, potabádon in tontara-Mu monubu kon i monia! 12Ki Tuhan in noguman bui, “Bangusa mita in mustibí mosadia bo mayá in Ḷopá in Pohakiman. Kon tua Akuoi ki Tuhan in monisig kon bangusa mita inta noyodiugmai in umat-Ku. 13#Why. 14:14-16, 19-20, 19:15 Mosia in totuubí moraat; ratabdon in mosia naonda bo gandum inta ain noḷutú kon gobá. Runtaiaidon in mosia naonda bo anggur kon bonu in pomomugutan kon anggur inta nopuḻing modapot in moiḻimpó. 14Ribuan in intau in kon Ḷopá Pohohakiman. Sin kon tua singgai i Tuhan in ḷagidon moiangoi. 15Mata in singgai bo buḷan in simindipdon, bo tundi mita in diádon monindar bui.”
Ki Allah in momarakat kon umat-Nea
16 #
Am. 1:2
Ki Tuhan in nopodongog in singog-Nea noḷangon nongkon Sion, buḷud-Nea;
nongkon Yerusalem modoradádon in singog-Nea.
Ḷangit bo butá moḻiai popisí-Nea.
Táe ki Tuhan in umuranbí moduḷu
bo moḷukad kon Israel, umat-Nea.
17“Ei Israel, tanaa in kotaauandon monimu,
kon Akuoibí in ki Tuhan Allahmu.
Akuoi in nogutun kon Sion, buḷud-Ku inta motusi,
Dá Yerusalem in mobaḻí doman kotá inta motusi,
intau ango-angoi in diá bidon mokopotuot bui.
18Kon singgai tatua buḷud mita in mopuḻingbidon in gobá in anggur.
Bobiagon mita in mokaan bidon kon bonok kon tombuḷud mita inta moḷumbá.
Ongkag mita kon Yohuda
diábí kon dodai in onda in modait in tubignea.
Ongkag tobatú in moiḻigbí nongkon Baḷoi Tuhan,
bo mopomuntad in tubig moonow kon Ḷopá in Akasia.
19Mesir in mobaḻídon buḷud inta mobota-botak,
bo Edom in mobaḻídon moḷogat, diá bidon pogutunan in intau.
Popisí in mosia in nonubudon kon intau in Yohuda,
bo noḻimod kon intau kon butá tatua inta diá in taḷánea.
20-21Bo kinotutugan in dugú monia in batukon-Kubí in tontuḻínea, #3:20-21: Tongonumai in terjemahan dungkuḷmai: Batukon-Kubí in tontuḻínea. Ibrani: Poniata-Kubí kon diá kotaḷá.
inta noḻimod kon inia in matoibí sibaton-Ku.
Táe Yohuda bo Yerusalem in umuranbí oyúon in mogogutunnea,
bo Buḷud in Sion in umuranbí pogutunan-Ku.”
Actualmente seleccionado:
YOËL 3: INOMOG
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Alkitab Singog In Mongondow Masa In Tanaa © Indonesian Bible Society, 2016.