YOHANES 8
8
1Táe ki Yesus in minayá in Buḷud Zaitun. 2Nopoikoḷomai kon singgai, subupa Sia in minayádon bui in Baḷoi Tuhan, bo nobayong intau in namangoi kon i-Nia. Ki Yesus in iḻimitú bo nomangkoidon nobogoi in totundú kon i monia. 3Dodai in Sia yogot motundú, mototundú mita kon agama Yahudi bo intau mita in Parisi nodia mangoi kon i Yesus kon tobatú bobay inta kinokadapatan nokituaḻing. Bobay tatua pinoki sindogan monia kon yuak, 4bodongka noguman kon i Yesus, “Pak guru, bobay tanaa kinokadapatan nami koyogot nokituaḻing. 5#Im. 20:10; Ul. 22:22-24 Bo kon hukum agama oyúon in atorang kon bobay ná tanaa in mustibí ara bo in batu dapot in matoi. Aka podudui in raian i Pak Guru yo naonda?” 6Ḷoḻibó monia tua in potayakanbí monia kon taḷá i Yesus, sinbá oyúon in baḻíon monia dodoyonan popotaḷáan kon i-Nia. Táe ki Yesus tongá kinumuyung bo nopomais in tononuyú-Nea kon butá. 7Naonda in umurandon monia dodakan, dinumungá in Sia bo noguman kon i monia, “Ki ine in kon sigad monimu in diá kon dosa, yo munadon sia in mogarab in batu kon bobay tatua.” 8Onda intua ki Yesus kinumuyung bui bo nomais bui kon butá. 9Naonda in nokodongogmai kon singog i Yesus natua, minayádon mosia nonaḷámai kon tampat tatua, nobatu-batú pinangkoi kon intau inta nogurang totok. Pangabisannea in dongkadon ki Yesus takin bobay tatua inta simindogpa mako kon tampatnea. 10Bo ki Yesus in dinumungá bo noḻibó kon bobay tatua, “Onda in mosia komintan? Diá degá in nohukum kon inimu?”
11“Diá, Pak Guru,” tubagnea.
“Tua in nopia,” guman i Yesus, “Akuoi in diábí doman mohukum kon inimu. Táe bayádon, bo donaaidon bui momia kon dosa.”]#8:11: Kon bonu in nobayong in naska bo terjemahan dungkuḷmai, diábí in tonsilai tanaa (7:53–8:11); oyúon in nomais naonda Yoh. 21:24; oyúon doman in noidudui kon Luk. 21:38; bo oyúon in naska tobatú inta nomais noiduduimai kon Yoh. 7:36.
Ki Yesus bayag in Dunia
12 #
Mat. 5:14; Yoh. 9:5 Ki Yesus in buipa doman noguman kon i monia, “Akuoi naa in bayag in dunia. Intau inta dumudui kon i-Nakó in diá bidon sia mayá kon bonu in sindip, táe oyúondon in bayag kon kobiagannea.”
13 #
Yoh. 5:31
Bo intau mita in Parisi in noguman kon i-Nia, “Iko nion in mongongumanbí kon soaḷ kaadaan-Mu tontaní, dá onu in inouman-Mu nion in diábí totuu.”
14Ki Yesus in notubag, “Umpakabí in Akuoi mongonguman kon soaḷ kaadaan-Ku tontaní, táe totuubí onu inouman-Ku tua, sin kinotaauan-Kubí kon nongkon onda in Akuoi namangoi bo kon onda in bayáan-Ku. 15Moiko in mohakim kon intau podudui in cara intau, Akuoi in diábí mohakim kon tobatúmai intau. 16Táe aka Akuoi bo mohakim kon intau, yo onu inta sinantú-Ku tua in moadilbí, sin Akuoi in deemanbí tongá Aku-Akuoi mita, Akuoi in noyotakinbí i Amá-Ku inta nopotabá kon i-Nakó. 17Kon bonu in Hukum i Musa pinais nanaa: Kosakusian inta mobanar in nongkon kosakusianbí in intau doyowa. 18Inta nobogoi in kosakusian soaḷ Akuoi in doyowabí, Akuoi bo ki Amá-Ku inta nopotabá kon i-Nakó.”
19Dá iḻibó monia, “Kon onda in ki Amá-Mu tua?”
Ki Yesus in notubag: “Akuoi ande ki Amá-Ku in tumpaḷa diá kinotaauan monimu. Aka kuma bo kinotaauan monimu in Akuoi, yo tantú kotaauan bidon monimu in ki Amá-Ku.”
20Bayongan in tua siningog i Yesus wakutu in Sia yogot motundú kon bonu in Baḷoi Tuhan kon diugmai in kas pobobogoian kon doit sosumba. Táe diábí in tobatúmai intau nodomok kon i-Nia, sin deemanpabí wakutunea.
Ki Yesus Deemanbí Nongkon Dunia naa
21Ki Yesus in bui noguman kon i monia, “Akuoi in mayá, bo moiko i motayakbí kon i-Nakó, táe moiko in matoibí kon bonu in dosamu. ‘Tampat inta bayáan-Ku, diábí kodapotan monimu.’ ”
22Dá itoi mita in Yahudi in noguman, “Degá bo ḻimimodbí tontaní in Sia nion, sin Sia in moguman, ‘Tampat inta bayáan-Ku, diá kodapotan monimu.’ ”
23Bo ki Yesus in noguman kon i monia: “Moiko nion in namangoi nongkon ḻimonag; táe Akuoi in namangoibí nongkon ḻimonik. Moiko in nongkon duniabí naa, táe Akuoi in deemanbí nongkon dunia naa. 24Tuamai Akuoi in noguman kon i monimu, kon moiko in matoibí kon bonu in dosa aka diá mopirisaya kon ‘Akuoibí in Sia inta sinumangoi Akuoi Oyúon’.”#8:24: AKUOI OYÚON: Tangoi tatua in pinotuju kon tangoi inta pinaké i Allah kon moponiata kon ki ine in Sia (Iḷn. 3:14).
25Mosia in noḻibó bui, “Sabanarnea ki inebí Iko nion?”
Ki Yesus in notubag, “Onupabí in mangaḻe mongonguman takin monimu nion!#8:25: Onupabí in mangaḻe mongonguman takin i monimu: ande “ná inta ain pinoguman-Ku kon i monimu dungkuḷ”. 26Mobayongpabí in musti poguman-Ku bo hakimon-Ku soaḷ moiko nion. Táe Sia inta nopotabá kon i-Nakó in diábí mouboḷ. Bo Akuoi in mopotaau kon dunia naa onu inta dinongog-Ku nongkon i-Nia.”
27Diá kinomangaḻean monia kon Sia tua in koyogotbí mongonguman kon i monia soaḷ ki Amá. 28Manangka intua ki Yesus in noguman kon i monia, “Bain poḷantudon monimu in ki Adí Intau, bain tua bo kotaauan monimu kon Akuoibí naa in Sia inta sinumangoi ‘AKUOI OYÚON’, bo kotaauandon monimu kon diábí in tobatúmai in pinomia-Ku inta nongkon ibog-Ku tontaní. Akuoi in tongábí moguman kon onu inta sinundú i Amá-Ku kon i-Nakó. 29Bo Sia inta nopotabá kon i-Nakó koyota-yotakin-Kubí, diábí dodai onda in pinomayá-Nea mako in Akuoi tontaní, sin Akuoi in umuranbí mogaid kon onu inta mokosanang kon gina-Nea.”
30Nopaḷut mako noguman kon natua in ki Yesus, nobarong intau nopirisaya kon i-Nia.
Ki Allah inta diá mouboḷ mopoḷuat kon i monimu
31Onda intua ki Yesus in noguman kon intau mita in Yahudi inta ain nopirisaya kon i-Nia, “Aka moiko bo umuran dumudui kon inta sinundú-Ku, yo moiko in totu-totuudon mobaḻí dumodudui-Ku, 32dá kotaauandon monimu in ki Allah inta mobanar tua, bo popisí intua dá moiko in poḷuatondon.”
33 #
Mat. 3:9; Luk. 3:8 Mosia in noguman, “Kami naa in buíbí i Abraham, kami in diápabí dodai onda in nobaḻí ata i inekadon! Yo onu i makusud-Mu in moguman, ‘Moiko in poḷuatonbí’?”
34Dá ki Yesus in noguman kon i monia, “Poguman-Kudon kon i monimu, intau inta nogaid kon dosa, nobaḻí ki ata in dosanea tatua. 35Bo tobatú ata in diábí mokouḻí kon pogutunan motantú kon bonu in motoḷuadí, táe aka adí yo umuranbí mokouḻí kon tampat kon bonu i motoḷuadí. 36Manangka intua, aka Adí mopoḷuatdon kon i monimu, yo moiko in totu-totuudon moiḷuat. 37Kinotaauan-Kubí kon moiko nion in buíbí i Abraham. Tongá moiko in moḷongasi moḻimod kon i-Nakó, popisí in moiko doí motarima kon totundú-Ku. 38Onu in inontong-Ku kon i Amá-Ku tua in poguman-Ku. Ná doman moiko mogaid kon onu inta pinoguman i amá monimu.”
39Mosia in notubag, “Ki amá nami in ki Abraham.”
“Aka moiko bo totu-totuu ki adí i Abraham,” guman i Yesus, “pastibí kon aidanbí monimu#8:39: Aka moiko bo totu-totuu … pastibí kon aidanbí monimu: tongonumai in naska dungkuḷmai: Aka kuma moiko … yo aidaidon. in onu inta inaidan i Abraham. 40Akuoi in mopotaau in onu in totuu kon inimu inta ain dinongog-Ku nongkon i Allah, táe ḷongasion monimu ḻimodon in Akuoi. Ki Abraham in diábí mogaid kon natua! 41Moiko in mogaidbí kon onu inaidan i amá monimu tontaní.”
Táe mosia in notubag, “Kami naa in deemanbí adí kon boyot. Ki Amá nami in tongábí tobatú, Sia tua in ki Allah tontaní.”
42Dá ki Yesus in noguman kon i monia, “Aka ki Allah tua ki Amámu, yo motabibí in moiko kon i-Nakó, sin Akuoi in namangoibí nongkon i Allah. Bo deemanbí ibog-Ku tontaní in namangoi, táe ibogbí i-Nia inta nopotabá mangoi kon i-Nakó. 43Nongonu sin diábí komangaḻean monimu in onu in pinoguman-Ku? Popisíbí in moiko diá mokotahang in mokodongog kon totundú-Ku. 44Ibilisbí in ki amámu, bo moiko in moibog dumudui kon ibog i amámu tatua. Nongkon pinomangkoianpabímai Ibilis tua moḷoḻimod. Doíbí in sia kon onu inta moitutui, sin diábí in moitutui kon inia. Aka sia bo monguboḷ yo biasabí intua, sin natuabí in sipatnea. Sia mouboḷ bo pangkoi in bayongan uboḷ. 45Táe Akuoi in mogumanbí kon onu in mobanar, bo popisí in tuata moiko diá mopirisaya kon i-Nakó. 46Ki ine in kon sigad monimu in motaau moponiata kon oyúon in dosa-Ku? Aka totuu in pinoguman-Ku, yo nongonu sin moiko in diábí mopirisaya kon i-Nakó? 47Intau inta nongkon i Allah in mokidongogbí kon singog i Allah. Táe moiko in deemanbí nongkon i Allah, tuamai moiko in doí mokidongog.”
Ki Yesus bo ki Abraham
48Itoi mita in Yahudi tatua in notubag kon i Yesus, “Totuubí in singog nami kon Iko nion intau in Samaria inta kinotoḷangan in dimbuḷó!”
49Ki Yesus in notubag, “Akuoi in diábí kinotoḷangan in dimbuḷó. Akuoi in totokbí mohoromat kon i Amá-Ku, táe moiko in moningkuḻe kon i-Nakó. 50Akuoi in diábí motayak kon kahoromatan-Ku tontaní. Oyúonbí in mobogoi in kahoromatan kon i-Nakó. Sia tuata inta mohakim. 51Naa in poguman-Ku kon i monimu, inta dumudui kon singog-Ku, sia in diá bidon kawasaan in popatoi.”
52Dá itoi mita in Yahudi tatua in noguman bui kon i Yesus, “Tanaa in kinotaauandon totok nami kon Iko nion in totu-totuudon kinotoḷangan in dimbuḷó! Sin ki Abraham tontaní ain minatoi, ná doman tua in nabi mita. Táe Iko in moguman, ‘Intau inta dumudui kon singog-Mu, diá bidon kawasaan in popatoi.’ 53Aka ki Abraham tontaní ain minatoi, bo nabi mita komintandon minatoi, Iko nion ki ine? Umpaka Iko in mokawa-kawasa nongkon i amá nami ki Abraham!”
54Ki Yesus in notubag, “Aka kuma bo motayakbí in Akuoi kon kahoromatan-Ku tontaní, yo kahoromatan tatua diábí in mangaḻenea. Inta mohoromat kon i-Nakó in ki Amá-Kubí inta inanggap monimu ki Allah monimu, 55bokaka diá nokanal monimu in Sia. Aka Akuoi in moguman kon diá kinotaauan-Ku in Sia, dá mouboḷ in Akuoi ná moiko. Kinotaauan-Kubí in Sia bo Akuoi in dinumuduibí kon singog-Nea. 56Ki amá monimu in ki Abraham nopia totok in ginanea sin sia mokoontong kon singgai-Ku. Sia in nokoontongdon bo nopiadon in ginanea!”
57Bo intau mita in Yahudi in noguman kon i Yesus, “Diápa tugat ḻima nopuḷú notaong in umur-Mu, bo Iko in moguman kon ain nokoontong kon i Abraham?”#8:57: Iko in nokoontongdon kon i Abraham?: tongonumai in naska dungkuḷmai: Eta degá ki Abraham nokoimontandon in nokoontong kon inimu?
58Ki Yesus in notubag, “Poguman-Kudon kon i monimu, Wakutu in ki Abraham diápa noilahir, Akuoi naa in koyongan bidon oyúon.”
59Bo intau mita in Yahudi tatua in nogamá kon batu sin pogandur kon i-Nia; táe ki Yesus inumadop, bodongka nonaḷámai kon Baḷoi Tuhan.
Actualmente seleccionado:
YOHANES 8: INOMOG
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Alkitab Singog In Mongondow Masa In Tanaa © Indonesian Bible Society, 2016.
