YOHANES 6
6
Ki Yesus Nobogoi in Kaanon kon intau ḻima noribu
(Mat. 14:13-21; Mrk. 6:30-44; Luk. 9:10-17)
1Nopaḷut mako kon tua ki Yesus minayá in ḷoḷan Danow Galilea inta sinangoian Danow Tiberias. 2Noiyaputmai in tua, mobayong in intau in dinumudui kon i-Nia sin nokoontongdon in mosia kon inta mokoherang inta pinomia i Yesus kon intau mita nongotakit inta sinokoundamanan-Nea. 3Ki Yesus in notakod kon buḷud, bo iḻimitú kon tua takin murí-Nea mita. 4Wakutu intua diádon moonggot in Singgai Moḷoben Paska intau in Yahudi. 5Dodai in ki Yesus nobobui magí-mako, inontong-Nea in intau moyo-moyodudui in mamangoi kon i-Nia. Dá Sia noḻibó kon i Pilipus, “Kon onda i motaau naton potaḷuian kon kaanon, sinbá bayongan in intau tanion in mongaan?” (6Kinotaauan bidon i Yesus onu in musti aidan-Nea, táe Sia in noguman natua sin monungkuḷ kon i Pilipus.)
7Ki Pilipus in notubag, “Aka roti bo tongá boḻi in doyowa nogatut doit saḷaka#6:7: doit saḷaka: Doit saḷaka tobatú in tondan pogaidan tosinggai in mogogaid biasa (ind. Mat. 20:2). yo diábí tugat pokaan kon intau mita tanion, umpakabí tongá poyopiḻikon mako.”
8Murí i Yesus tobatú inta ki Andreas ki utat i Simon Petrus noguman kon i Yesus, 9“Kon naa oyúon in adí ḷoḷaki inta nodia kon roti ḻima nobatú bo toyá doyowa nobungá. Táe diábí pongonu aka kon intau moantó tanion?”
10Ki Yesus in noguman, “Pokiḻitúaidon in intau mita tanion.” Kon tampat tatua nobayong in bonok, dá intau mita tatua iḻimitú kon bonok. Mosia komintan tua oyúonbí in ḻima noribu in ḷoḷaki. 11Onda intua ki Yesus nogamá kon roti bo nopoyaput in sukur kon i Allah. Nopaḷut mako kon tua sinila-silai-Nea mako in roti tatua kon intau moantó tatua. Noiduduimai kon tua sinila-silai-Nea domandon in toyá tatua, bo mosia in komintan nongaan kinooibogbí monia. 12Naonda in komintandon nongaan nobotug, ki Yesus noguman kon murí-Nea mita, “Sipundon in ki agat mita in roti inta diá kinaan monia sinbá diá mogoguyaat.” 13Bo sinipun monia. Nosipun magí mopuḷú bo doyowa nokompé ki agat in kaanon inta tongá nongkon roti ḻima nobatú bo pinokaan kon intau mobayong tatua.
14Naonda intau moantó tatua nokoontong kon inta mokoherang pinomia i Yesus, mosia in noguman, “Totuu, naabí in nabi#6:14: Nabi: Indoiai 1:21. inta i harap mako mamangoi in dunia!” 15Kinotaauan i Yesus kon mosia in mamangoi sin momakisa kon i-Nia mobaḻí Datu monia. Tuamai in Sia minayádon kon daerah inta notombuḷud.
Ki Yesus minaya-mayá kon tudu in tubig
(Mat. 14:22-33; Mrk. 6:45-52)
16Naonda mulaidon moungkoḷom, murí mita i Yesus nosiḻigdon bo minayá in danow. 17Bo mosia in sinumakoi kon uangga bo minayá in Kapernaum. Nodoḷomdon, táe ki Yesus in diápa doman namangoi kon i monia. 18Dodai intua momangkoidon mobokoḷ in danow tatua sin tompot mogirup moropot. 19Naonda in noyayúdon pinobotoian monia, degá ḻima ande onomdon nokilo in binayáan monia, mosia in nokoontong kon i Yesus nopoangoi in uangga takin minaya-mayá kon tudu in tubig. Mosia in totokdon noondok. 20Táe ki Yesus in noguman, “Dika moondok sin Akuoibí in naa!” 21Bo takin pia in gina mosia nonongganutdon kon i-Nia sinumakoi kon uangga, bo dodaipa doman tua uangga monia noitubudon kon tampat bayáan monia.
Intau mita notayak kon i Yesus
22Nopoikoḷomai kon singgai, intau moantó inta umuranpa kon ḷoḷan danow, in nonotaaudon kon tongábí tobatú in uangga kon tua. Kinotaauandon doman monia kon murí-Nea mita in sinumakoidon kon uangga bo inumuna minayá. Ki Yesus in diápabí sinumakin. 23Noiduduimai kon tua tongonumai uangga nongkon kotá in Tiberias namangoi bo sinumubu kon diug in tampat pinokaanan kon intau moantó kon roti naonda in ki Tuhan nopoyaput in sukur. 24Naonda in intau moantó tatua diádon nokoontong kon i Yesus bo murí-Nea mita kon tampat tatua, mosia in sinumakoi kon uangga tatua bo minayá in Kapernaum motayak kon i Yesus.
Ki Yesus Roti Inta Mobogoi in Kobiagan
25Naonda in intau mita tatua noyodungkuḷdon i Yesus kon ḷoḷan danow, mosia in noḻibó kon i-Nia, “Pak Guru, dodai onda ki Pak Guru noidapot in naa?”
26Tubag i Yesus, “Totuubí kon moiko in notayak kon i-Nakó deemanbí popisí in kinomangaḻeandon monimu in makusud in inta mokoherang mita pinomia-Ku, táe popisíbí in moiko nongaandon nodapot in nobotug. 27Donaaibí mogaid sinbá mokouḻí kon kaanon inta modai-daitpa bo inta mobongkog. Táe pogaidbí sinbá mokouḻí kon kaanon inta diá mobongkog bo inta mobogoi in kobiagan mononoi. Kaanon tatua in ogoibí i Adí Intau kon i monimu, sin Sia ain ilantik i Allah inta ki Amá.”
28Dá mosia in noḻibó kon i-Nia, “Onu in musti pomiaan nami, sinbá kami in mogaid kon oaidan inta kinoibog i Allah?”
29Ki Yesus in notubag, “Tanaabí in kinoibog i Allah nongkon i monimu: Popirisayadon kon i-Nia inta pinotabá mangoi i Allah.”
30Dá kai monia doman, “Aka natua, onu in tanda poontong i Pak Guru kon inami, sinbá kami in mokoontong bo mopirisaya kon i Pak Guru? Onu in aidan i Pak Guru? 31#Iḷn. 16:4, 15; Mzm. 78:24 Mogoguyang nami#6:31 nami: ande kita. nokaan kon manna kon padang gurun, ná inta pinais kon bonu in Buk Motusi, ‘Sia in nobogoi in roti nongkon soroga.’ ”
32Bo Ki Yesus in noguman kon i monia, “Pirisayabí: Deemanbí ki Musa, táe ki Amá-Kubí in nobogoi kon inimu#6:32: Deeman ki Musa … kon inimu: ande onu inta inogoi i Musa kon inimu. in roti inta totuu nongkon soroga. 33Sin roti inta inogoi i Allah in Siabí inta noponag nongkon soroga bo nobogoi in kobiagan kon intau kon dunia.”
34Dá mosia in noguman, “Pak Guru, umurandon ogoiai in roti tatua in kami.”
35Dá kai Yesus doman, “Akuoibí naa in roti inta mobogoi in kobiagan, intau mita inta mamangoi kon i-Nakó in diá bidon angoian bui in gogoy. Bo intau inta mopirisaya kon i-Nakó in diá bidon moyoga-yogang bui.
36Táe ná kain singog-Ku kon i monimu, umpakabí ain inontong monimu in Akuoi, táe diábí mopirisaya in moiko. 37Bayongan in intau inta inogoi i Amá-Ku kon i-Nakó in mamangoibí kon i-Nakó. Ki inekabí in mamangoi kon i-Nakó diábí in diá tarimaan-Ku. 38Sin Akuoi in namangoi nongkon soroga deemanbí mamangoi mogaid kon onu inta kinoibog-Ku tontaní, táe mogaidbí kon inta kinoibog-Nea inta nopotabá kon i-Nakó. 39Bo naabí in kinoibog i-Nia inta nopotabá kon i-Nakó: Sinbá bayongan intau inta inogoi kon i-Nakó, diá tobatúmai in mobuḻi; táe bá biagon-Ku in mosia kon singgai ponantúan. 40Totuu, naabí in kinoibog i Amá-Ku: Bá bayongan intau inta nokoontong kon Adí bo nopirisaya kon i-Nia mokouḻí kon kobiagan mopia bo mononoi, bo mobiag bui kon singgai ponantúan.”
41Intau mita Yahudi mulaidon mongunsingog kon i Yesus, sin ki Yesus in noguman: “Akuoi in roti inta noponag nongkon soroga.” 42Mosia in noguman, “Sia naa in ki Yesus, ki adí i Yusup toh? Kinotaauanbí nami in ki iná bo ki amá-Nea! Yo nongonu sin Sia in mogumanbí, kon Sia in noponag nongkon soroga?”
43Dá ki Yesus in noguman kon i monia, “Donaai mongunsingog. 44Diábí in tobatúmai intau motaau mamangoi kon i-Nakó, aka diá diaan mangoi i Amá inta nopotabá mangoi kon i-Nakó. Ki ine in mamangoi kon i-Nakó, yo biagon-Kubí in sia kon singgai ponantúan. 45#Yes. 54:13 Kon bonu in Buk in nabi mita pinais nanaa: ‘Komintan intau tundúonbí i Allah.’ Dá bayongan intau inta ain nokodongog kon totundú bo nobalajar nongkon i Amá, mamangoibí kon i-Nakó. 46Tongá tua in deemanbí mangaḻenea kon oyúondon intau inta ain nokoontong kon i Amá. Tongábí Sia inta namangoi nongkon i Allah in nokoontongdon kon i Amá.
47Pokotaaudon: Intau inta mopirisaya, oyúonbí in kobiagan mopia bo mononoi. 48Akuoibí naa in roti inta mobogoi in kobiagan. 49Mogoguyang monimu in nokaandon kon manna kon padang gurun bo mosia ain minatoi. 50Táe diábí natua in roti inta noponag nongkon soroga; intau inta mokaan kon roti tatua in diábí matoi. 51Akuoibí in roti inta noponag nongkon soroga, roti inta mobogoi in kobiagan. Intau inta mokaan kon roti tanaa in umuranbí mobiag. Roti inta ogoi-Ku kon kobiagan intau kon dunia naa in awak-Kubí.”
52Nokodongogmai kon tua, intau mita in Yahudi nobobayowan. Mosia in nosingog: “Umpaka intau tanion mokobaḻí mobogoi in awak-Nea sin kaanon naton?”
53Bo ki Yesus in noguman kon i monia, “Poguman-Kudon kon i monimu, Aka moiko bo diá mokaan kon awak i Adí Intau bo monginum kon dugú-Nea, yo diábí in moiko mobiag. 54Intau inta mokaan kon awak-Ku bo monginum kon dugú-Ku sia in mokouḻí kon kobiagan mopia bo mononoi bo biagon-Kubí in sia kon Singgai Ponantúan. 55Sin awak-Ku in totu-totuubí kaanon bo dugú-Ku in totuubí kon inumon. 56Intau inta mokaan kon awak-Ku bo monginum kon dugú-Ku, umuranbí in Sia motobatú takin-Ku, bo Akuoi i motobatúnea doman. 57Ki Amá inta nobiag tua, in nopotabá kon i-Nakó, bo Akuoi doman in nobiagbí nongkon i Amá. Natua doman in intau inta mokaan kon awak-Ku, sia in mobiagbí doman nongkon i-Nakó. 58Naabí in roti inta noponag nongkon soroga: deemanbí ná roti inta kinaan in mogoguyang monimu. Sin naonda in nokaan mako kon roti tatua, mosia in minatoi doman. Táe intau inta mokaan kon roti tanaa in umuranbí mobiag.”
59Tua komintan in pinoguman i Yesus dodai in Sia nobogoi in totundú kon baḷoi pososambayangan kon Kapernaum.
Singog mita inta mobogoi in kobiagan mopia bo mononoi
60Naonda in nokodongog kon singog mita i Yesus tatua, nobayong kon sigad in murí-Nea mita in noguman, “Totundú tanaa totuu mobogat. Ki inebí in mokomampu in motarima kon tua!”
61Kinotaauanbí i Yesus kon murí-Nea mita in mongunsingogbí doman kon soaḷ tatua. Dá tuamai Sia in noguman, “Degá mokotersinggung kon i monimu in singog-Ku mita tatua? 62Yo onu degá in mobaḻí aka moiko in mokoontongdon kon i Adí Intau mamonik bui kon tampat-Nea inta muna? 63Rohobí i Allah in nobogoi in kobiagan kon intau. Ropot in intau naa diá baragunanea. Singog mita inta pinosingog-Ku kon i monimu naa in singogbí mita in Roho i Allah bo singogbí inta mobogoi in kobiagan. 64Tongá oyúon doman kon sigad monimu in diá mopirisaya.” (Kinotaauan bidon muna i Yesus in intau mita inta doí mopirisaya, bo ki ine mobaḷui in pirisaya kon i-Nia.) 65Bo ki Yesus in bui noguman, “Tuamai Akuoi in mopotaaudon kon inimu, diábí tobatúmai in intau in motaau mamangoi kon i-Nakó, aka diá kinoibog i Amá.”
66Nongkon dodaidon in tuata bo nobayong in dumodudui-Nea in nonaḷámaidon kon i-Nia, bo doídon dinumudui kon i-Nia bui. 67Bo ki Yesus noḻibó kon murí-Nea inta mopuḷú bodoyowá tatua, “Yo degá moiko in monaḷá domanmai kon i-Nakó?”
68 #
Mat. 16:16; Mrk. 8:29; Luk. 9:20 Dá ki Simon in noḻibó, “Tuhan, kon i inepa in bayáan nami? Tosingogon i Tuhan mobogoi in kobiagan mopia bo mononoi. 69Kami naa in nopirisaya bo noyakin bidon kon ki Tuhanbí in totabá inta motusi nongkon i Allah.”
70Ki Yesus in notubag: “Kinotaauan bidon monimu kon Akuoibí in nomiḻí kon i monimu mopuḷú bodoyowá naa? Tongá tobatú kon sigad monimu nion in kinawasa in Ibilis!” 71Ki Yudas ki adí i Simon Iskariot i makusud i Yesus tatua. Sin ki Yudasbí tuata in moposarakan kon i Yesus, umpaka sia in murí doman i Yesus inta kon sigad in murí-Nea mopuḷú bodoyowá.
Actualmente seleccionado:
YOHANES 6: INOMOG
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Alkitab Singog In Mongondow Masa In Tanaa © Indonesian Bible Society, 2016.
