YOHANES 4
4
Ki Yesus nongonguman takin Bobay in Samaria
1Dinongogdon in intau mita in Parisi kon ki Yesus ain nokouḻí poḷat nobaptis kon intau mobayo-bayongdon kon dumodudui i Yohanes. (2Sabanarnea i Yesus in diábí nobaptis táe murí-Neabí mita.) 3Naonda in kinotaauan i Yesus kon tua komintan dinongogdon in intau mita in Parisi, dá Sia in minayá nongkon Yudea bo nobuidon kon Galilea. 4Kon binayáan-Nea tatua musti in Sia moitaḻib kon Samaria. 5#Kḻn. 33:19; Yos. 24:32 Dá nodapotdon in ki Yesus kon kotá tobatú kon Samaria, Sikhar in tangoinea. Ḻipú tatua diá noyayú nongkon butá inta inogoi i Yakub koḻipod kon i Yusup, ki adínea. 6Kon tua oyúon parigí i Yakub. Noḷopídon totok in ki Yesus sin bobayáan tatua, tuamai in Sia iḻimitúpa kon bingkímai in parigí tatua. Dodai intua noutudon in singgai, degá jam mopuḷú bo doyowa. 7-8Bo murí-Nea mita minayádon in kotá sin notaḷui kon kaanon.
Diá noonggot kon tua oyúon tobatú bobay in Samaria in namangoi sin monangkob. Ki Yesus in noguman kon inia, “Iná, motaau degá in Akuoi moigum kon tubig inumon-Ku?”
9 #
Ezr. 4:1-5; Neh. 4:1-2 Bobay tatua in notubag, “Ki Tuang intau in Yahudi, bo akuoi naa inta in Samaria; nongonu sin ki Tuang moigumbí kon tubig inumon kon inakó?” (Sin intau mita in Yahudi diá noyoyobayatan intau mita in Samaria.)#4:9: intau mita in Yahudi diá noyoyobayatan intau mita in Samaria: ande intau in Yahudi doí mopomaké in galas ande palo inta pinaké in intau in Samaria.
10Ki Yesus in notubag, “Aka kuma bo kinotaauanmu in totabi i Allah bo kinotaauanmu in ki ine in noigum kon inumon kon inimu, yo nopasti bidon kon iko tontaní in moigumbí kon tubig inumon kon i-Nia tua. Bo ogoian-Neabí iko in tubig kobiagan tatua.”
11Dá bobay tatua in noguman doman, “Diá in totayuk i Tuang bo nodaḷom totok in parigí tanaa. Kon ondabí in kouḻían i Tuang kon tubig inta mokobiag tua? 12Ki Yakub mogoguyang nami, ain nobogoi in parigí tanaa kon inami.#4:12 kami: ande kita. Bo sia tontaní ain nogamá kon tubig inumonnea nongkon naa; ná doman tua in ki adínea mita bo bobiagonnea mita. Degá ki Tuang in moḷobe-ḷoben nongkon i Yakub?”
13Dá kai Yesus doman, “Intau inta monginum kon tubig tanaa in buipabí moyogang, 14táe intau inta monginum kon tubig ogoi-Ku in diá bidon moyoga-yogang, sin tubig inta ogoi-Ku kon inia in mobaḻí bidon bokaká kon bonu in awaknea, bo umuran ḷumuai bo mobogoi in kobiagan mononoi.”
15Guman in bobay tatua, “Tuang, ogoiaidon in akuoi in tubig tatua, sinbá diádon moyoga-yogang in akuoi; bo diáka bidon mopobui-buimai kon naa sin monangkob.”
16Guman i Yesus kon inia, “Bayádon bo oiní in ki buḷoimu mamangoi in naa.”
17Bobay tatua in notubag, “Diábí in ki buḷoiku.” Guman doman i Yesus bui,
“Totuu in tubagmu nion.” 18“Sin iko in koḻimadon pinobuḷoi, bo ḷoḷaki inta nobiag noyogaḷummu tanaa mako in deemanbí ki buḷoimu.”
19Bobay tatua in noguman, “Kinotaauankudon tanaa kon ki Tuang in tobatúbí nabi.” 20“Mogoguyang nami nosumba kon i Allah kon buḷud tanaa, táe intau mita toḻipúan i Tuang moguman kon tongábí kon Yerusalem in tampat pososumbaan in intau kon i Allah.”
21Ki Yesus in noguman kon inia: “Popirisayadon, komintanmai intau in mosumba kon i Amá, deeman bidon kon tombuḷud tanaa bo deemanbí doman kon Yerusalem. 22Moiko intau in Samaria mosumba kon i inta diá kinotaauan monimu, táe aka kami intau in Yahudi nosumba kon i-Nia inta kinotaauan nami, sin kasaḷamatan in namangoi nongkon intau in Yahudi. 23Táe moiangoibí in wakutunea, sedang bo noiangoi bidon, takin in kawasa in Roho i Allah intau mita in mosumba kon i Amá inta mobanar ná inta kinoibog i Amá. 24Sin ki Allah in Rohobí bo tongábí takin Roho i Allah dá intau mita in motaau mosumba kon i Amá podudui in kaadaan-Nea.”
25Bobay tatua in noguman kon i Yesus, “Kinotaauankubí kon Datu Mopoposaḷamat (inta sinangoi ki Kristus) in mamangoibí. Aka Sia mamangoi, potaau-Neabí in bayongan in yagi-yagi kon i naton.”
26“Akuoibí naa inta i makusudmu nion”. guman i Yesus, “Akuoi inta moyosingogmumai tanaa.”
27Bo dodai intua murí mita i Yesus noiangoidon bui. Mosia in noherang totok in nokoontong kon i Yesus nongonguman takin tobatú bobay. Táe diá in tobatúmai in mosia in nokobaḻí noḻibó kon bobay tatua, “Onu in paraḷu i iná?” andeka noḻibó kon i Yesus, “Mongo onu in inouman i Amá takin bobay tatua?”
28Bo bobay tatua in nonaḷámaidon kon tampayangnea kon tua bo minayá in kotá bo noguman kon intau mita kon tua, 29kai-nia “Koḻigai, mayá in kita moindoi kon intau inta nopotaau kon inakó kon bayongan inta ain pinomiaku. Degá bo Siabí tua in Datu Mopoposaḷamat?” 30Dá mosia nobuatdon nongkon kotá bo minayá nokipodungkuḷ kon i Yesus.
31Dodai intua murí-Nea mita in nonongganutdon kon i Yesus nongaan. “Pak Guru,” kai monia, “Mongaandon.”
32Táe ki Yesus in notubag, “Kon i-Nakó oyúon in kaanon inta diá kinotaauan monimu.”
33Dá murí-Nea mita in nosiḻibóandon, nanaa “Degá oyúondon intau in nogatod mangoi kon kaanon kon i-Nia?”
34Ki Yesus in noguman, “Kaanon-Ku naa in dumuduibí kon onu inta kinoibog i-Nia inta nopotabá kon i-Nakó, bo moginḷapat kon oaidan inta pinoki aid-Nea kon i-Nakó. 35Kai monimu in ‘opatpa nobuḷan bo mokoyut.’ Táe Akuoi in moguman kon inimu: Indoiaika magí-mako in gobá inta ain nodarag bo noḷutúdon, motaaudon koyuton! 36Bo tanaapabí doman mako bo intau inta mokokoyut tua in motarima kon tondan in pinogaidannea bo mosipundon kon bungai in kobiagan mopia bo inta mononoi. Dá intau inta nomuḷa bo inta nokoyut tumpaḷabí moḷunganga in gina. 37Totuubí in toḻibag nanaa, ‘Tobatú in momuḷa, ibanea i mokoyut.’ 38Akuoi in mopotabá kon i monimu mayá mokoyut kon gobá inta deeman moiko in nomuḷa; intaudon ibanea in nogaid kon tua, bo moiko in motarima kon kauntungan nongkon oaidan monia tua.”
39Nobayong in intau in Samaria inta nogutun kon kotá tatua in nopirisaya kon i Yesus popisí in nokodongog kon ouman in bobay tatua. Sin bobay tatua in noguman, “Sia in noguman kon inakó kon bayongan inta ain pinomiaku.” 40Dá naonda in intau mita in Samaria mita tatua noyodungkuḷ i Yesus, mosia in nopoigum totok sinbá, mogutunpa in Sia takin monia. Dá ki Yesus in nogutunpa kon tua takin i monia doyowa nosinggai.
41Bo nodugangdon nobayong in intau nopirisaya kon i Yesus sin nokodongogdon tontaní kon totundú-Nea. 42Mosia in noguman kon bobay tatua, “Mopirisayadon in kami in tanaa, deeman bidon tongá popisí in onu inta inoumanmu kon inami, táe kami in nokodongogdon tontaní kon tosingogon-Nea. Bo kinotaauandon nami kon Sia tua in totuubí Mopoposaḷamat in dunia.”
Ki Yesus nongundam kon adí in tobatú pogawai kon komaḻig
43Naonda in doyowadon nosinggai in nogutun kon Sikhar, minayádon in ki Yesus kon Galilea. 44#Mat. 13:57; Mrk. 6:4; Luk. 4:24 Ki Yesus tontaní in nogumandon nanaa, “Tobatú nabi in diábí horomaton kon ḻipúnea tontaní.” 45#Yoh. 2:23 Táe naonda in Sia noiyaputmai in Galilea, intau mita in nonontomu kon i-Nia takin sanang in Gina, sin wakutu in Singgai Moḷoben Paska kon Yerusalem, inontongdon monia in bayongan inta pinomia i Yesus.
46 #
Yoh. 2:1-11
Noiduduimai kon tua ki Yesus in buidon minayá in Kana inta kon Galilea, kotá inta pernadon pinomiaan-Nea kon inta mokoherang, “Tubig nobaḻí anggur.” Kon kotá tatua oyúon in tobatú pogawai kon komaḻig, dodai intua ki adínea in notakit kon Kapernaum. 47Naonda in dinongognea kon ki Yesus in nongkon Yudea namangoidon in Galilea, dá sia in minayádon kon i Yesus nopoigum sinbá mamangoipa in Kapernaum bo mongundam kon i adínea inta dongkadon oḷaton. 48Ki Yesus in noguman kon pogawai in komaḻig tatua, “Aka moiko bo diá nokoontong kon inta mokoherang mita, yo tantú diábí in moiko mopirisaya.”
49Táe pogawai komaḻig tatua in noguman, “Tuang, ḷagidon angoi bá diápa matoi in ki adíku.”
50Ki Yesus in noguman kon inia, “bayádon, nopia bidon in ki adímu.”
Intau tatua in nopirisaya kon singog i Yesus bo minayá. 51Kon daḷanpa, bobantungnea mita in nonontomudon kon inia bo noguman, “Ki adí i Tuang in nopiadon.”
52Dá iḻibóneadon kon i monia mongo jam tongonu nopia in ki adínea. Tubag monia, “Koḷabung, degá jam imitánea singgai bo noinggamá in patúnea.” 53Bo kinotoropandon in pogawai in komaḻig tatua kon jam natuata in ki Yesus in noguman kon inia: “Nopia bidon in ki adímu.” Dá sia takin tombonu in baḷoinea komintandon nopirisaya kon i Yesus.
54Tua in tanda mokoherang induanea inta pinomia i Yesus kon Galilea naonda in Sia nongkon Yudea.
Actualmente seleccionado:
YOHANES 4: INOMOG
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Alkitab Singog In Mongondow Masa In Tanaa © Indonesian Bible Society, 2016.
