MATIUS 7

Hal ngehakimi jelma

(Luk. 6:37-38, 41-42)

1“Dang hak ngehakimi jelma bareh, in keti tenggalan juga dang dihakimi ulih Allah. 2#Mrk. 4:24 Mani injuk repa keti ngehakimi jelma bareh, injuk reno juga Allah haga ngehakimi keti. Rik ukoran sai keti pakai untuk ulun bareh, haga dipakai juga ulih Allah untuk keti. 3Mengapi keti ngeliak secuil kayu delom mata puarimu, sedangko balok delom matamu tenggalan mak keti perhatiko? 4Injuk repa keti dapok ngucakko jama puarimu, ‘Ija kuluahko kayu secuil ano jak matamu,’ sedangko di delom matamu tenggalan wat balok? 5Hai munafik! Luahko pai balok jak matamu tenggalan, ampai niku ngeliak jelas, rik dapok ngeluahko secuil kayu jak mata puarimu.

6Dang keniko barang sai suci jama kaci, in kaci udi dang bebalik rik nyerang niku. Rik dang keniko mutiara jama babui, in babui udi dang ngilik-ngilik mutiara udi.”

Ngilu, sepok, rik ketuk

(Luk. 11:9-13)

7“Kiludo, maka keti haga nerima. Sepokdo, maka keti haga mansa. Ketukdo, maka rangok haga dibukakko untuk niku. 8Mani jelma sai ngilu haga nerima; jelma sai nyepok haga mansa; rik jelma sai mengetuk, haga dibukakko rangok. 9Di hantara keti api wat bak sai ngeniko batu jama anakni, kik ia ngilu ruti? 10Atau ngeniko ulai, kik ia ngilu iwa? 11Walaupun keti jahat, keti pandai juga ngeni sai betik jama anak-anakmu. Apilagi Bapamu di surga! Ia lebih lagi haga ngeniko sai betik jama jelma sai ngilu jama Ia.

12 # Luk. 6:31 Perlakukodo jelma bareh injuk keti mirak diperlakuko ulih tian. Udido inti hukum Musa rik ajaran nabi-nabi.”

Rangok sai mepelik

(Luk. 13:24)

13“Kurukdo ngeliu rangok sai pelik, mani rangok rik renglaya sai nuju mik neraka balak rik berak, rik lamon jelma sai ngeliuni. 14Kidang pelik rik payahdo rangok rik renglaya sai ngusung jelma mik jama hurik. Rik angkah cutik jelma sai ngehaluni.”

Batang rik uahni

(Luk. 6:43-44)

15“Hati-hatido tehadap nabi-nabi palsu. Tian ratong jama keti bekedok biri-biri, kidang tian sebenorni injuk serigala sai buas. 16Keti haga kenal tian jak hasil perbuatanni. Semak keruwi mak ngeluahko uah anggor, rik semak keruwi mak ngehasilko uah ara. 17Jak batang sai subor dihasilko uah sai betik, rik jak batang sai mak subor uahni sai burak. 18Batang sai subor mak dapok ngehasilko uah sai burak, rik batang sai mak subor mak dapok ngehasilko uah sai betik. 19#Mat. 3:10; Luk. 3:9 Unggal batang sai mak ngehasilko uah sai betik, dipelok rik disuah. 20#Mat. 12:33 Injuk reno muneh jama nabi-nabi palsu. Keti haga kenal tian jak hasil perbuatanni.”

Perbuatan, lain hak cawa

(Luk. 13:25-27)

21“Mawat sunyinni jelma sai ngurau Nyak, ‘Tuhan, Tuhan,’ haga jadi anggota umat Allah, kidang angkah jelma-jelma sai ngelakuko kehaga-Ni Bapa-Ku sai di surga. 22Waktu Rani Kiamat lamon jelma haga cawa jama Nyak, ‘Tuhan, Tuhan, bukankah jama gelar-Mu sekam radu nyampaiko luhot-Ni Allah? Rik bukankah jama gelar Tuhan juga sekam radu nguser ruh-ruh jahat rik ngadako lamon keajaiban?’ 23#Mzm. 6:9 Kidang Nyak haga ngejawab, ‘Nyak mak pernah kenal keti! Mikdo jak ija, keti sai ngelakuko kejahatan!’ ”

Tukang nyani lamban sai pandai rik tukang nyani lamban sai bugu

(Luk. 6:47-49)

24“Nah, jelma sai ngedengi cawa-Ku inji, rik nurut, gegoh injuk jelma bijak sai ngebangun lambanni di atas batu. 25Pada waktu labung ratong, rik way banjer ratong rik angin badai memukul lamban udi, lamban udi mak rubuh mani radu dibangun di atas batu.

26Rik jelma sai ngedengi cawa-Ku inji, kidang mak nurut, ia gegoh injuk jelma bugu sai ngebangun lambanni di atas heni. 27Pada waktu labung ratong, rik way banjer ratong rik angin badai memukul lamban udi, lamban udi rubuh. Rik cadangni hibat nihan!”

Kuasa Isa

28 # Mrk. 1:22; Luk. 4:32 Akherni Isa selesai ngajar, rik jelma-jelma sai wat di dudi hiran nihan ngedengi ajaran-Ni. 29Mani Ia ngajar jama wibawa, mak injuk guru-guru agama tian.

Actualmente seleccionado:

MATIUS 7: LAILJP

Destacar

Copiar