Génesis 1
1
Di balna yamna
1Tatuna kaupak di balna yamna kidika, Papang yaklauwi yamna kisang dawak sau kidika bik. 2Sau adika wayani kaput bik laih disdai; bitik laih kuma tuhni puksani manah awaihdai, dawak Papang spiritni kidika was minit yakat awaihwādai.
3Dawak Papang yulna: “¡Yaringni kalahwang!”#2 Kor 4:6. ,#Jn 1:1-3.
Dawak yaringni kalahna. 4Kaput laih Papang talna yaringni kidika yamni dai, dawak yaringni kidika puksani kaupak dakyakna 5dawak yaringni kidika ayangni pakna “madah”, dawak puksani kidika laih “pukta”. Kaput laih tatuna ma as kidika laihna dai.#1.5 Barangni yulnin kat: Ma-ulahu dawak mapiris karak dawak ma as dai. Hibru kulnin lani laih kaput kidika ma as ki.
6Usnit kat Papang yulna: “Kudungni as kalahwang dawak was kidika sahwi yakwang, bahang kaput laih adika sahwi yakna karang.”
Dawak kaput kalahna.#1.6 Dawak kaput kalahna: grik kau laih kaput yulwi. Hibru kau laih adika yulni witni yakat kalahwi, s.d. 7 yakat. 7Papang yaklauwi pa kudungni yamna was kidika sahwi yakna atnin; sahyakna as kidika laih pa kudungni dinit yakat watna, dawak sahyakna ūk kidika laih minit yakat watna. 8Dawak kudungni kidika Papang yaklauwi pakna “kisang”.#2 Pi 3:5. Dawak kaput laih ma bu laihna dai.
9Kaput dawak Papang yulna: “Kisang dinit yak was balna kidika pa aslah uduhwang, kaput laih buhni kidika kalahwarang.”
Dawak kaput kalna. 10Kaput laih buhni kidika Papang yaklauwi ayangni pakna “sau”, dawak was balna aslah kalahna dai kidika laih ayangni pakna “kuma”.
Dawak Papang talwak bitik laih yamni dai, 11dawak yulna: “Sau kidika pan balna satni mahni ukuswang, kaput bik laih dibasta balna kidika minik sani balna yayakwang, dawak pan tanit nunuhni balna kidika laih minik yayakwang.”
Dawak kaput kalahna. 12Bahang sau adika dibasta satni balna kalawak ukusna: dibasta satni balna miniksani yayakwa kidika, dawak pan nunuhni balna minik yakwa kidika bik. Kaput laih Papang talwak yamnidai. 13Kaput yamna yakat ma bās laihna.
14-15Kaput dawak Papang yulna: “Kisang yak yaringni balna kidika kalahwang, dawak sau yakat yaringni kalawang, dawak pukta kidika yaringni karak silp kalahwang, dawak kaput bik laih ma balna kidika kulnin sip karang, kurih balna kidika dawak ma nunuhni balna kaiwa kidika bitik.”
Dawak kaput kalna. 16Dawak, Papang yaklauwi yaringni bu yamna: nuhni kidika laih madah yakat yaringni kalanin, dawak dibin kidika laih pukta yakat yaringni kalanin. Kaput bik laih yala balna bik yamna. 17Papang yaklauwi yaringni kidika kisang yakat āna yaringni duna atnin yulni sau akat, 18yaringni kalana atnin madah dawak pukta yakat bik, dawak yaringni kidika yaklauwi sahwi yakna atnin pukta dawak madah karak, bahang kaput yamwi dawi talwak yamnidai. 19Kaput yamna yakat ma arungka laihna dai.
20Usnit kat Papang yulna: “Was yaklauwi waspa dini mahni yakwarang, dawak dilawani duwa balna bik sau minit yak witingna bahlwi yaklalauwarang lawanina kau.”
Dawak kaput kalahna.#1.20 Dawak kaput kalahna: grik kau kaput yulwi. Hibru kau laih adika yulni kalahwas ki. 21Papang yaklauwi kuma yakat di nunuhni balna kidika yamna, kaput bik waspa yak di sangnika duduwa balna dawak di lawani duwa balna kidika bitik.
Dawak Papang witing talwak di balna bitik yamnidai, 22dawak Papang yaklauwi blisyamna di balna yamna kidika bitik adika yulni kau: “Walamanabis yakta kuma kidika bitik bahngtanauh, dawak sau yakat di lawani duwa balna kidika mahni palni karang.”
23Kidika balna yamwakat ma singka laihna dai.
24Kaput laih Papang yulna: “Sau adika sangnika duwa dini balna satni bitik yamwang: asangpas dini dawak tinglau balna bitik, dawak kaput bik pasnina kau mumurwa balna kidika bitik.”
Dawak kaput kalahna. 25Papang yaklauwi asangpas dini dawak tinglau balna yamna kidika yamni talna dai bitik.
26Kaput dawak yulna: “Waralaih muih kidika yamdang. Mayang apat karang,#1 Kor 11:7. dawak witingna waspa dini balna, di lawani duwa balna, kaput bik tinglau balna, asangpas dini balna, di balna pasni kau mumurwa balna kidika bitik minitna yakat parasni duduwarang.”
27Papang muih yamna kat,
sihm witing Papang kaput yamna dai;
al dawak yal bik yamna dai,#Mt 19:4; Mk 10:6.
28dawak Papang yaklauwiwiting blinisin kidika diana:#Gn 5:1-2.
“Walamanabis mahni yaktanama;
dawak sau adika buhngdatamanna tingmana yakat maintalnama;
waspa dini balna, di lawani duwa balna,
dawak pasnina kau mumurwa balna kidikabitik tingmana dinit yakat karang.”
29Usnit dawak diyulna: “Talnauh, yang manna yakat manatayang sau akat pan balna bitik miniksani duduwa balna kidika, dawak kaput bik minik yakwa panan balna bik. Bahang kidika balna laih manna kasnamna karang. 30Kaunah asangpas dini balna, pasnina kau mumurwa balna, uhbinina, kidika balna laih diatayang witingna kasninna kidika dibasta.”
Bahang kaput kalnadai, 31dawak Papang talwak witing yamna balna kidika bitik laih yamni dai. Bahang kaput laih ma tiaskauas laihna dai.
Actualmente seleccionado:
Génesis 1: SUMU
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Biblia Sumo
Texto © Sociedad Bíblica de Nicaragua 1998
