La Cantica di li Cantici 6
6
1Lu me dilettu scinniu ’ntra lu so jardinu ’ntra l’ ariola di l’ aromi, pri pasciri ’ntra l’ orti, e cogghiri li gigghi.
2Iu sugnu di lu me dilettu, e lu me dilettu, ca pasci ’ntra li gigghi, è miu.
3Bedda sì tu, o amica mia, duci, e maistusa comu Gerusalemmi: terribili comu un’ armata priparata a cummattiri.
4Leva li to occhi di supra di mia, ca mi fannu allucintari. Li to capiddi sù comu ’na mandra di crapi, ca accumpareru di Galaad.
5Li to denti sunnu comu ’na mandra di pecuri, ca vennu d’ essiri lavati, tutti cu dui seguaci gemelli, nè cci nn’ è sterili ’ntra d’ iddi.
6Comu la scorza di lu granatu sunnu li toi masciddi, senza chiddu, chi si cci trova ammucciatu.
7Cci sunnu sissanta rigini, ottanta concubini, e di li picciutteddi nun cc’ è numeru.
8Una è la me palumma, la mia perfetta, è l’ unica di la so matri, e l’ eletta di la so genitrici. La vittiru li donzelli, e la vantaru comu beatissima: li rigini e li concubini, e la laudaru.
9Cui è chista, ca s’ avanza comu l’ aurora, ca spunta, bedda comu la luna, unica comu lu suli, terribili comu un’ armata priparata a cummattiri?
10Scinnivi ’ntra lu jardinu di li nuci, pri vidiri li puma di li vaddati, e guardari si la vigna fussi ciuruta, e si sbucciassiru li granata.
11Nun lu vitti: l’ anima mia si turbau pri causa di li carri d’ Aminadab.
12Torna, torna, o Sulamiti, torna, torna, acciò ti vidissimu.
Actualmente seleccionado:
La Cantica di li Cantici 6: SCN
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
First published in 1860 and 1861.