Dw 3
3
Gyisɛse nee Nekɔdimɛse
1Nrenya bie wɔ ɛkɛ, bɛfɛlɛ ye Nekɔdimɛse. Ɔle Dwuu mgbanyima ne mɔ ko yɛɛ ɔboka fane ne mɔɔ bɛfɛlɛ ye Falasii la anwo. 2Kenle ko nɔɔzo ɔhɔle Gyisɛse ɛkɛ ne na ɔzele ye kɛ, “Relabae, yɛze kɛ wɔmɔ a ɛle kilehilevolɛ mɔɔ Nyamenle ɛzoa wɔ a. Awie biala ɛnrɛhola nwanwane ninyɛne mgbole mɔɔ ɛlɛyɛ la bie yɛ kyesɛ Nyamenle nee ye lua.”
3Gyisɛse buale ye kɛ, “Meka nɔhalɛ meahile wɔ: awie biala ɛnrɛnwu Nyamenle Belemgbunlililɛ ne kyesɛ bɛwo ye fofolɛ.”
4Nekɔdimɛse bizale ye kɛ, “Kɛ ɔkɛyɛ na sonla mɔɔ ɛwie nyi la bɛawo ye fofolɛ ɛ? Ɔnrɛhola ɔ nli akunlu wolo ɔnrɛmaa bɛnrɛwo ye fofolɛ!”
5Gyisɛse buale kɛ, “Meka nɔhalɛ ne meahile wɔ: kyesɛ bɛfa nzule nee Sunsum Nwuanzanwuanza ne bɛsɔne sonla anrɛɛ ɔnrɛnwu Nyamenle Belemgbunlililɛ ne ɛlɛ. 6Mɔɔ bɛkɛlua nwonane ne azo bɛkɛwo ye la le nwonane, yɛɛ mɔɔ bɛkɛlua Sunsum ne azo bɛkɛwo ye la le sunsum. 7Mmamaa ɔyɛ wɔ ɛzulolɛ kɛ meha kɛ, ‘Ɔwɔ kɛ bɛwo wɔ fofolɛ’ a. 8Anwoma ne bɔ kɔ ɛleka mɔɔ ɔkulo la; ɛte ɔ ne, na ɛnze ɛleka mɔɔ ɔvi ɔba a, yɛɛ ɛnze ɛleka mɔɔ ɔkɔ a. Zɔhane ala yɛɛ awie biala mɔɔ bɛkɛwo ye Sunsum nu la de a.”
9Nekɔdimɛse bizale ye kɛ, “Kɛ ɔkɛyɛ na ɛhye ayɛ zɔhane ɛ?”
10Gyisɛse buale ye kɛ, “Ɛle Yizilayɛ kilehilevolɛ kpole zɛhae, noko ɛnze ɛhye? 11Meka nɔhalɛ meahile wɔ: yɛka mɔɔ yɛnwu ye na yɛbɔ mɔɔ yɛde la nolo, noko bɛ biala ɛnlie yɛ edwɛkɛ ne ɛndo nuhua. 12Saa meka ninyɛne mɔɔ wɔ ewiade ye anu la anwo edwɛkɛ mekile bɛ na bɛnlie bɛnli a, ɛnee saa meka anwuma lɔ edwɛkɛ mekile bɛ a kɛ ɔkɛyɛ na bɛalie bɛali ɛ? 13Awie biala noko ɛtɛkɔle anwuma lɔ kɛ Sonla Ra ne mɔɔ vi anwuma lɔ rale la ala.”
14 #
Ɛdi 21.9
Kɛmɔ Mosisi manle kɔbele ɛwɔlɛ ne zo wɔ baka zo wɔ ɛsɛlɛ ne anu la, zɔhane ala yɛɛ bɛbamaa Sonla Ra ne zo a, 15amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ. 16Ɔluakɛ Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ. 17Ɔluakɛ Nyamenle anzoa Ɔ Ra ne wɔ ewiade ye kɛ ɔrabua menli mɔɔ wɔ nu la ndɛne, na ɔralie ewiade amra ngoane.
18Mɔɔ kɛlie Ralɛ ne kɛli la bɛnrɛbua ye ndɛne, na mɔɔ anlie ye anli la, bɛbua ye ndɛne dɛbadɛba, ɔboalekɛ yeanlie Nyamenle Ara kokye ne yeanli. 19Kɛ ndɛnebualɛ ne de la ɛne: wienyi ne ɛra ewiade ye na bɛ ninyɛndane ti, menli kulo awozinli tɛla wienyi ne. 20Awie biala mɔɔ yɛ ninyɛndane la kyi wienyi ne yɛɛ ɔnrɛlua nu ɛlɛ, ɔboalekɛ ɔnrɛhulo kɛ ɔkɛye ye nyɛleɛ ɛtane ne mɔ ɔkɛhile. 21Na mɔɔ di nɔhalɛ la kɔ wienyi ne anu, amaa wienyi ne ada agua ye gyima kpalɛ mɔɔ ɔlile la azo ahile kɛ ɔbɛlɛle ɔ nwo aze ɔmanle Nyamenle.
Gyisɛse nee Dwɔn
22Ɛhye anzi, Gyisɛse nee ye ɛdoavolɛma ne hɔle Dwudiya maanzinli nu. Ɔlile kenle ekyi wɔ ɛkɛ ne na ɔzɔnenle menli. 23Mekɛ ne anu ɛnee Dwɔn noko ɛlɛsɔne menli wɔ Enɔn mɔɔ bikye Salem la, ɔboalekɛ nzule dɔɔnwo wɔ ɛkɛ, na menli dɔɔnwo hɔle ɔ nwo ɛkɛ manle ɔzɔnenle bɛ. 24#Mat 14.3; Mak 6.17; Luk 3.19-20 (Mekɛ ne anu ɛnee bɛtɛtole Dwɔn efiade.)
25Dwɔn ɛdoavolɛma ne bie mɔ bɔle ɔ bo kɛ bɛ nee Dwuuma bie mɔ su kpolera wɔ ɛzonlenlɛ nu ɛnluanlɛ nwo. 26Yemɔti bɛhɔle Dwɔn ɛkɛ ne na bɛbizale ye kɛ, “Kilehilevolɛ, ɛkakye nrenya ne mɔɔ ɛnee nee wɔ wɔ azule Dwɔdan ne anzi lɔ, mɔɔ ɛhanle ɔ nwo edwɛkɛ la ɔ? Kɛkala ɔlɛsɔne menli, na awie biala asɛɛ ɛlɛkɔ ye ɛkɛ.”
27Dwɔn buale kɛ, “Awie biala ɛnrɛnyia ɛhwee kyesɛ Nyamenle fa maa ye. 28#Dw 1.20 Bɛdabɛ bɛdi daselɛ kɛ menganle kɛ, ‘Tɛ me a mele Mɛzaya ne, na bɛzoanle me kɛ menlumua ɔ nyunlu.’ 29Atɔfolɛ nrenya ne a le mɔɔ gya atɔfolɛ ne la, saa atɔfolɛ nrenya ne agɔnwo ne mɔɔ gyi ahane la te atɔfolɛ nrenya ne ane a, ɔ nye die. Me fɛlɛkolilɛ ne, ye munlililɛ kɛ de la ɛne. 30Ɔwɔ kɛ ɔyɛ sonlakpole ɔtɛla me, na meyɛ ekyi.”
Mɔɔ vi anwuma ba la
31Sonla mɔɔ vi anwuma ba la le sonlakpole tɛla bɛ muala; mɔɔ vi ewiade ye anu la le ewiade ɛdeɛ yɛɛ ɔka ewiade edwɛkɛ, na sonla mɔɔ vi anwuma la bo ɔ muala azo. 32Ɔka mɔɔ yenwu ye nee mɔɔ yede la, noko awie biala ɛndie ye edwɛkɛ. 33Mɔɔ die ye edwɛkɛ ne to nu la kile maa bɛnwu kɛ Nyamenle le nɔhalɛ. 34Mɔɔ Nyamenle ɛzoa ye la ka Nyamenle anloa edwɛkɛ, ɔboalekɛ Nyamenle maa ye Sunsum ne yi ye tɛkɛɛ. 35#Mat 11.27; Luk 10.22 Selɛ ne kulo Ɔ Ra ne, na yeva ninyɛne muala yewula ɔ sa nu. 36Awie biala mɔɔ die Ralɛ ne di la lɛ ngoane mɔɔ ɛnlɛ awieleɛ, na mɔɔ kɛkpo kɛ ɔnrɛlie Ralɛ ne ɔnrɛli la ɛnrɛnyia ngoane mɔɔ ɛnlɛ awieleɛ la ɛlɛ, Nyamenle ndeanlɛ ne wɔ ɔ nwo zo dahuu.
Actualmente seleccionado:
Dw 3: NB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible in Nzema © Bible Society of Ghana, 1998.
