Mɔl 43
43
Dwosefi amediema ne mɔ nee Bɛngyaman sia ahɔ Yigyibiti
1Akee ɛhɔne ne yɛle kpole wɔ Keena. 2Yemɔti mɔɔ bɛwiele abɛlɛ ne mɔɔ bɛhɔdɔle wɔ Yigyibiti la di la, Gyekɔbo hanle hilele ɔ mra ne mɔ kɛ, “Bɛhɔ bieko, bɛhɔdɔ aleɛ ekyi bɛrɛlɛ yɛ.”
3Na Dwuda hanle kɛ, “Nrenya ne hakyele yɛ anyebololɛ zo kɛ, saa yɛanva yɛ diema ekyi ne yeamba a, ɔnrɛnlea yɛ nyunlu fee. 4Yemɔti saa ɛkɛmaa yɛ nee yɛ diema ne kɛhɔ ɛdeɛ a, yemɔ yɛkɛhɔ yɛkɛhɔdɔ aleɛ yɛkɛra. 5Na saa ɛnrɛmaa ɔnrɛhɔ ɛdeɛ a, ɛnee yɛnrɛhɔ, ɔluakɛ nrenya ne se, ‘Saa bɛanva bɛ diema ne bɛamba a, bɛnrɛnwu me nyunlu.’ ”
6Gyekɔbo mɔɔ ɛnee bɛfɛlɛ ye Yizilayɛ la zele kɛ, “Duzu ati a bɛhanle bɛhilele nrenya ne kɛ bɛlɛ bɛ diema kakula bieko wɔ ɛkɛ a? Bɛ nee me anli ye boɛ fee.”
7Bɛbuale kɛ, “Nrenya ne bizebizale yɛ edwɛkɛ dɔɔnwo mɔɔ fane yɛ nee yɛ nwo amra anwo. Ɔbizale yɛ kɛ, ‘Asoo bɛ ze tɛte aze? Bɛlɛ adiema bieko wɔ ɛkɛ ɔ?’ Mɔɔ ɔbizebizale yɛ la yɛɛ yɛmanle ye nwolɛ mualɛ a. Yɛnze kɛ ɔkɛha ɔkɛhile yɛ kɛ, ‘Bɛva bɛ diema ko ne bɛrɛla.’ ”
8Dwuda hanle hilele ɔ ze kɛ, “Maa me nee kakula ne ɛhɔ, amaa yɛanyia aleɛ yɛali, na ɛdawɔ nee yɛdayɛ nee ngakula ngyikyi ne mɔ anwu. Mefa me nwo meabɔ agyinlanu meamaa ye. 9Saa edwɛkɛ bie a, biza medame. Saa meanva ye meanzia meamba, meanva ye meambanwula ɛ sa nu a, ɛnee fa nwolɛ ngyelelɛ ne kyele me dahuu. 10Saa tɛ ɛhye mɔɔ ɛzi yɛ aze la a, anrɛɛ yɛhɔ yɛra fane nwiɔ.”
11Akee Gyekɔbo zele bɛ kɛ, “Saa zɛhae ala a ɔwɔ kɛ ɔyɛ a, ɛnee bɛyɛ ɛhye: bɛva maanle ye anu nzoleɛ kpalɛ ne mɔ bie wɔ bɛ ahodoku ne mɔ anu, ayile nwole evuanlɛ ekyi, wolɛ ekyi, ɛyɛlɛ, alufuanlɛ, ‘pesetakayo’ ma, yɛɛ ‘alemɔndo’ bɛhɔmaa nrenya ne kɛ ye ahyɛlɛdeɛ ɔ. 12Ezukoa ne mɔɔ bɛvale bɛguale bɛ ahodoku ne mɔ anloa la, bɛva ye mɔnwo, ɔkɛyɛ kɛ anyefo ɔ. 13Akee bɛva bɛ diema ekyi ne na bɛha bɛ nwo bɛhɔ nrenya ne ɛkɛ. 14Nyamenle Bedevinli#43.14 Nyamenle Bedevinli: Hibulu “Ɛle Hyadae.” (El Shaddai). ne ɛmaa nrenya ne ɛnwu bɛ anwunvɔne na ɔmaa bɛ nee bɛ diema ko ne nee Bɛngyaman ɛzia ɛrɛla. Saa me mra ne mɔ fi me sa ala a, ɛnee mewie ala ɛne.”
15Yemɔti mgbavolɛ ne mɔ vale ahyɛlɛ ninyɛne ne, bɛvale ezukoa ne mɔnwo, bɛvale Bɛngyaman, na bɛzile nu bɛhɔle Yigyibiti, na bɛhɔle Dwosefi sua nu. 16Dwosefi nwunle Bɛngyaman la, ɔzele sonvolɛ ne mɔɔ nea sua nu ɛkɛ ne la kɛ, “Fa menli ne mɔ bɛla sua nu, ku nane to aleɛ na me nee bɛ bakpula yɛ sa ɛnɛ ewia ye.” 17Nrenya ne yɛle mɔɔ Dwosefi zele ye la na ɔvale mgbavolɛ ne mɔ ɔhɔle Dwosefi sua nu.
18Bɛ nee bɛ dwule Dwosefi sua nu ɛkɛ ne la, ɛzulolɛ hanle bɛ na bɛhanle kɛ, “Ezukoa ne mɔɔ bɛziale bɛvale bɛsisianle yɛ ahodoku ne mɔ anloa la ati deenyi yɛɛ ɛmaa bɛva yɛ bɛra ɛke a. Ɔyɛ ɛhye, amaa yeanyia edwɛkɛ yeatia yɛ na yeaza yɛ yɛalie yɛ asoaso ne mɔ, na yeayɛ yɛ ahanra.” 19Yemɔti bɛhɔle sonvolɛ ne mɔɔ nea Dwosefi sua nu ɛkɛ ne la anwo ɛkɛ na bɛ nee ye gyinlanle anlenkɛ ne anloa dendɛle, na bɛzele ye kɛ, 20“Yɛmenle, yɛlumua yɛra ɛke ko yɛradɔ aleɛ yɛhɔ. 21Mɔɔ yɛhɔdwule ɛleka mɔɔ yɛsokoɛ la, yɛzianyizianyinle yɛ ahodoku ne mɔ anloa, na yɛnwunle kɛ awie biala ezukoa ne mɔɔ ɔduale la, bɛzia bɛva bɛzia ye kodoku ne anloa. Yemɔti yɛzia yɛva ezukoa ne yɛra. 22Yɛ nee ezukoa fofolɛ mɔɔ yɛfa yɛadɔ aleɛ la noko ɛra. Yɛnze ahenle mɔɔ vale ezukoa ne wulowulale yɛ ahodoku ne mɔ anu a.”
23Sonvolɛ ne zele bɛ kɛ, “Bɛmmasulo, bɛha bɛ ahonle bɛgua azule nu. Bɛ Nyamenle ne nee bɛ ze Nyamenle ne a kɛbezɛ ɛva ezukoa ne ɛwulowula bɛ ahodoku ne mɔ anu a. Bɛ ezukoa ɛdeɛ ne, me sa hanle ye bɔkɔɔ.” Akee ɔvale Semɛyɔn ɔvindele ɔrɛlɛle bɛ.
24Sonvolɛ ne mɔɔ vale mgbavolɛ ne mɔ hɔle Dwosefi sua nu la manle bɛ nzule bɛnrinzinrinzinle bɛ gyakɛ anwo. Akee bɛmanle bɛ asoaso ne mɔ aleɛ. 25Bɛwiele la, bɛboɔboale ahyɛlɛ ninyɛne ne mɔ mɔɔ bɛ nee bɛ hɔle kɛ bɛfa bɛahɔmaa Dwosefi la anloa na bɛhendɛle kɛ saa ɔba ewia ne a bɛava bɛamaa ye, ɔluakɛ bɛdele kɛ ɔba a ɔ nee bɛ bakpula bɛ sa. 26Dwosefi dwule sua nu la, bɛvale ninyɛne ne mɔɔ bɛ nee bɛ hɔle la bɛrale sua ne anu, bɛbɔle bɛ ti aze bɛmanle ye na bɛvale ninyɛne ne mɔ bɛmanle ye. 27Ɔbizale bɛ agbɔkɛ nu na ɔbizale kɛ, “Bɛ ze te kpɔkɛ ɔ, meka nrenya kpanyinli ne mɔɔ bɛhanle ye edwɛkɛ la? Ɔtɛte ngoane nu ɔ?”
28Bɛbuale kɛ, “Wɔ sonvolɛ ne, mɔɔ le yɛ ze, te kpɔkɛ; ɔtɛte ngoane nu.” Na bɛbɔle bɛ ti aze na bɛbutubutule ɔ nyunlu ɛkɛ.
29Dwosefi manle ɔ nye zo la, ɔnwunle ɔ diema Bɛngyaman, ɔ nli ara ne, na ɔbizale kɛ, “Bɛ diema ekyi ne mɔɔ bɛhanle ye edwɛkɛ la, yemɔ ɛhye ɔ? Me ra nrenya, Nyamenle ɛnwu wɔ anwunvɔne!” 30Na Dwosefi dwazole ndɛndɛ hɔle kɛ ɔkakpondɛ ɛleka yeavea yeazu, ɔluakɛ ɛnee ɔ nwo ɛlɛdɔ ɔ diema ne. Na ɔwolole ye suakunlu ɛkɛ ne na ɔzunle. 31Akee ɔnrinzinle ɔ nyunlu, ɔzɔle ɔ nwo, na ɔvindele ɔrahanle kɛ, “Bɛziezie aleɛ ne.” 32Bɛzieziele ye aleɛ ɛdeɛ ngome na bɛzieziele mgbavolɛ ne mɔ ɛdeɛ ngome, yɛɛ Yigyibitima noko mɔɔ wɔ ɛkɛ ne bie la ɛdeɛ ngome. Ɔboalekɛ ɔnle kɛ Yigyibitima nee Hibuluma bɔ nu di aleɛ. Ɔle bɛkyi ɔmaa Yigyibitima. 33Bɛmanle mediema ne mɔ dɛnlɛdɛnlanle aze, bɛ nee Dwosefi bɛ nye bɔ zolɛ. Bɛdɛnlanle ye kɛmɔ bɛ awolɛ nu gyinlabelɛ si de la, kpanyinli ne lumua yɛɛ kakula ne li amozi. Na mgbavolɛ ne mɔ vale azibɛnwo nleɛnleanle bɛ nyunlu. 34Bɛvale aleɛ bɛvile Dwosefi ɛkponle zo a bɛrɛlɛle bɛ a, na ko biala ɛdeɛ mɔɔ ɔnyianle la, Bɛngyaman nyianle ye mɔnwo nnu. Na bɛ nee Dwosefi nlonle na bɛ nye liele.
Actualmente seleccionado:
Mɔl 43: NB
Destacar
Compartir
Comparar
Copiar
¿Quieres guardar tus resaltados en todos tus dispositivos? Regístrate o Inicia sesión
Bible in Nzema © Bible Society of Ghana, 1998.
