Mɔl 38
38
Dwuda nee Teemaa
1Ɔrale kɛ, mekɛ ne anu ala Dwuda vi ɔ mediema ne mɔ anwo na ɔdule ɔ nee nrenya bie mɔɔ vi sua ne mɔɔ bɛfɛlɛ ye Adɔlam la azo la hɔdɛnlanle. Bɛfɛlɛ nrenya ne Haela. 2Dwuda nwunle Keena bɛlɛra bie wɔ ɛkɛ, bɛfɛlɛ ɔ ze Hyua. Ɔgyale ye na ɔ nee ye lale. 3Bɛlɛra ne nrenzɛle na ɔwole ralɛ nrenya, na Dwuda donle ye Ɛɛ. 4Ɔnrenzɛle bieko na ɔwole nrenya, na ɔdonle ye Onan. 5Eza ɔwole nrenya bieko, na ɔdonle ye Hyila. Dwuda wɔ Akezebe la yɛɛ ɔwole ralɛ nrenya ɛhye a.
6Na Dwuda gyale raalɛ maanle ɔ ra kpanyinli Ɛɛ. Bɛfɛlɛ raalɛ ne Teemaa. 7Na Dwuda ara nrenya kpanyinli Ɛɛ le amumuyɛ, yemɔti Ɛdɛnkɛma hunle ye. 8Na Dwuda zele Onan kɛ, “Ɛ nee ɛ diema ne aye ne ɛhɔla, na bu adiema nrenya amaamuo maa ye, amaa ɛ diema ne anyia ɔ bo zo amra.” 9Onan nwunle kɛ saa ɔyɛ ye zɔhane a, mralɛ mɔɔ ɔbawo bɛ la ɛnle ye ɛdeɛ. Yemɔti ɔ nee ye hɔlale la, ɔdule ye nlanzule ne ɔguale, ammaa raalɛ ne annrenzɛ na yeanwo mralɛ yeammaa ɔ diema ne. 10Na mɔɔ ɔyɛle la anzɔ Ɛdɛnkɛma anye, na ɔhunle ɔdaye noko. 11Akee Dwuda zele ɔ ra ne aye Teemaa kɛ, “Kɔdɛnla ɛ ze sua nu di wɔ kunlane ne, kɔdwu kɛ me ra Hyila kɛnyi la.” Ɔhanle ɛhye, ɔluakɛ ɛnee ɔsulo kɛ Hyila noko kɛwu kɛ ɔ mediema ne mɔ la. Yemɔti Teemaa hɔdɛnlanle ɔ ze sua nu.
12Mekɛ guale nu la Hyua ara raalɛ ne mɔɔ Dwuda gya ye la wule. Ɔwiele ye kunlane ne kyi la, ɔhɔle ɛleka mɔɔ bɛpepɛ ye mboane nwo enrinli la wɔ Temenasuazo. Ɔkɔ la ɔ nee ɔ gɔnwo Haela mɔɔ vi Adɔlam la a hɔle a. 13Bɛhanle bɛhilele Teemaa kɛ, “Ɛ hu ɔ ze ɛlɛkɔ Temenasuazo ahɔpepɛ ye mboane nwo enrinli.” 14Yemɔti ɔkpale ye kunlanvolɛ adɛladeɛ ne ɔguale, ɔyɛle ɔ nwo boɛ na ɔvale ɛdanlɛ ɔguale ɔ ti zo, ɔvale bie ɔkyekyele ɔ nwo na ɔhɔdɛnlanle Yineem sua zo, wɔ Temenasuazo adenle nu. Ɔluakɛ ɔnwunle kɛ Hyila ɛnyi yɛɛ bɛtɛmanle ɔtɛgyale ye a.
15Dwuda nwunle ye la ɔdwenlenle kɛ awie mɔɔ di tuutuu la ɔ, ɔluakɛ ɛnee yeheda ɔ nyunlu amuala. 16Dwuda hɔle ɔ nwo ɛkɛ ne wɔ adehane ne na ɔzele ye kɛ, “Dwazo, maa me nee wɔ ɛhɔla,” ɔluakɛ ɛnee ɔnze kɛ ɔ ra ne aye ne ɔ.
Raalɛ ne bizale ye kɛ, “Saa ɛ nee me da a, duzu a ɛkɛmaa me a?”
17Dwuda buale kɛ, “Mebamaa bɛarɛlɛ wɔ me mboane ne mɔ ko.”
Raalɛ ne bizale ye kɛ, “Duzu yɛɛ ɛfa wɔali agyinlanu kɔkpula kɛ bɛ nee boane ne kɛra la a?”
18Dwuda bizale ye kɛ, “Duzu a menva menli agyinlanu a?”
Ɔbuale ye kɛ, “Fa wɔ kpɔdelera ne, wɔ nyɛma ne nee wɔ kpɔma ne mɔɔ ɛlɛ ye ɛ sa nu la.” Yemɔti Dwuda vale ninyɛne ɛhye mɔ manle ye, na ɔ nee ye lale, na raalɛ ne nrenzɛle. 19Raalɛ ne dwazole hɔle, ɔhɔyele ɛdanlɛ ne mɔɔ ɔvale ɔhedale ɔ nyunlu la, na ɔvale ye kunlane adɛladeɛ ne mɔ ɔwulale.
20Nzinlii mɔɔ Dwuda zoanle ɔ gɔnwo Adɔlamenli ne kɛ ɔva abɔnkye ralɛ ne ɔhɔ na ɔlie ninyɛne mɔɔ ɔvale ɔlile agyinlanu wɔ raalɛ ne ɛkɛ ne ɔrɛla la, ɔkpondɛle ye biala na yeannwu ye. 21Ɔbizebizale mrenya mɔɔ wɔ ɛkɛ ne la kɛ, “Tuutuunli ne mɔɔ dɛnlanle Yineem adenle ne foa ko ɛkɛ ne la wɔ nienwu?”
Bɛbuale ye kɛ, “Tuutuunli biala ɛtɛbale ɛke.”
22Yemɔti ɔziale ɔhɔzele Dwuda kɛ yeannwu tuutuunli ne, yɛɛ mrenya mɔɔ wɔ sua ne azo la se tuutuunli biala ɛtɛbale ɛkɛ.
23Na Dwuda zele kɛ, “Maa ɔva ninyɛne ne mɔ ɔyɛ ye ɛdeɛ, anrɛɛ bɛkɛzele yɛ. Ɛdawɔ wɔnwu kɛ menvale abɔnkye ralɛ ye memanle ɛhɔle yɛɛ wɔannwu ye a.”
24Ɛhye anzi siane nsa, awie hanle hilele Dwuda kɛ, “Teemaa, mɔɔ le ɛ ra ne aye ne ɛbɔ tuutuu ɛbɛla, na yenrenzɛ.”
Dwuda zele kɛ, “Bɛva ye bɛrɛla bɛmaa yɛyela ye.”
25Mɔɔ bɛtwili ye bɛahɔyela ye la, ɔvale nrɛlaleɛ ɔhɔmanle ɔ hu ɔ ze Dwuda kɛ, “Ahenle mɔɔ lɛ ninyɛne ɛhye mɔ la a nee me ɛlɛnrenzɛ a. Yemɔti mebodo wɔ, nea bɛ kpalɛ na ɛbanwu ahenle mɔɔ kpɔdelera ne, nyɛma ne, yɛɛ kpɔma ne le ye ɛdeɛ la.”
26Dwuda nwunle ninyɛne ne la, ɔliele ɔdole nu kɛ ɔdaye a ɔlɛ bɛ a na ɔhanle kɛ, “Ɛvalɛ mɔɔ meanva ye meamaa me ra Hyila la ɛmaa yeyɛ sonla tenlene yedɛla me.” Na ɔ nee ye anla bieko.
27Mekɛ dwule na ye awolɛ hanle ye la, bɛnwunle kɛ ɔbawo ndalɛ. 28Ɔ ko hanle ye la, ngakula ne mɔ ko vale ɔ sa lumuale, na ahenle mɔɔ die awolɛ ne la vale nyɛma kɔkɔlɛ kyekyele ɔ sa, na ɔhanle kɛ, “Ɛhye a le kpanyinli a.” 29Noko mɔɔ ɔhwenle ɔ sa ɔhɔle ala la yɛɛ ɔ diema nrenya ne mɔɔ ɔ nee ye la ɛkolɛ ne anu la rale a. Na mɔɔ die awolɛ ne la hanle kɛ, “Na duzu hehɛlɛhehɛlɛ ɔ!” Yemɔti bɛvɛlɛle ye Pɛlɛze.#38.29 Pɛlɛze: Ɔ bo a le “Bɔfanu.” 30Nzinlii akee ko ne ɔdaye ɔrale, nyɛma kɔkɔlɛ ne bɔ ɔ sa, na bɛdonle ye Zilaa.#38.30 Zilaa: Ɔ bo a le “Wienyi.” Ɔkɛyɛ kɛ nyɛma kɔkɔlɛ ne mɔɔ bɛvale bɛdole ɔ sa la ati a bɛdonle ye duma zɔhane a.
Actualmente seleccionado:
Mɔl 38: NB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible in Nzema © Bible Society of Ghana, 1998.
