Mɔl 33
33
Gyekɔbo yia Yisɔ
1Gyekɔbo manle ɔ nye zo la, ɔnwunle kɛ Yisɔ ɛlɛba, na menli ɛya nna li ɔ nzi. Yemɔti ɔhyɛle ngakula ne mɔ ɔmanle Liya nee Relahyɛle, yɛɛ ye sonvolɛ mraalɛ nwiɔ ne. 2Ɔmanle ye sonvolɛ mraalɛ nwiɔ ne nee bɛ mra ne mɔ lumuale, Liya nee ɔ mra ne mɔ doa bɛ, yɛɛ Relahyɛle nee Dwosefi li bɛ nzi. 3Ɔdaye mumua ne ɔzenle ɔlile bɛ nyunlu, na mɔɔ ɔbikyele ɔ diema Yisɔ la, ɔvale ɔ nyunlu ɔbutule aze fane nsuu kolaa na yeahɔdo ɔ diema ne. 4Na Yisɔ nriandile rayiale ye, yɛle ye atuu, ɔbɛkale ɔ kɔme na ɔvole ɔ nvoka anwo, na bɛ mu nwiɔ bɛzunle. 5Mɔɔ Yisɔ manle ɔ nye zo na ɔnwunle mraalɛ ne mɔ nee ngakula ne mɔ la, ɔbizale Gyekɔbo kɛ, “Nwane mɔ a le ɛhye mɔ mɔɔ ɛ nee bɛ lua la?”
Gyekɔbo buale kɛ, “Ngakula ɛhye mɔ a Nyamenle ɛlolɛ nu yeva yemaa wɔ sonvolɛ a.” 6Akee ye sonvolɛ mraalɛ ne nee bɛ mra ne mɔ rabɔle bɛ ti aze manle Yisɔ; 7Liya nee ɔ mra ne mɔ yɛle ye zɔhane ala, yɛɛ akee Dwosefi nee Relahyɛle bɛdabɛ noko bɛrabɔle bɛ ti aze bɛmanle Yisɔ.
8Yisɔ bizale ye kɛ, “Na ekpunli ɛhendeɛ ne mɔ mɔɔ me nee bɛ yiale la abo a le duzu?”
Gyekɔbo buale kɛ, “Bɛle me menle ɛdeɛ, amaa meazɔ ɛ nye.”
9Yisɔ zele ye kɛ, “Me diema, mɔɔ melɛ la zonle, yemɔti maa ɔwɔ ɛkɛ. Fa wɔ debie.”
10Gyekɔbo buale kɛ, “Kyɛkyɛ, mebodo mesɛlɛ wɔ, saa mezɔ ɛ nye ɛdeɛ a, ɛnee die me ahyɛlɛdeɛ ne. Ɔluakɛ ɛ nyunlu mɔɔ menwu, nee ɛ nye mɔɔ mezɔ la le kɛ menwu Nyamenle. 11Mebodo mesɛlɛ wɔ, die me ahyɛlɛdeɛ ne mɔɔ meva merɛlɛ wɔ la, ɔboalekɛ Nyamenle ɛlo me kpole, yɛɛ mɔɔ melɛ la zonle.” Gyekɔbo hanle toonwo manle Yisɔ liele ahyɛlɛdeɛ ne.
12Akee Yisɔ zele Gyekɔbo kɛ, “Maa yɛzɔ yɛ adendulɛ ne azo. Mebalumua na bɛadoa me.”
13Gyekɔbo buale kɛ, “Me menle ɔdaye ɔze kɛ ngakula ne mɔ anwo ɛnyɛ se, yɛɛ eza ɔwɔ kɛ menea nlankɛ nee mboane mralɛ ne mɔ mɔɔ no nyɛfonlɛ la. Saa bɛtia kpole bɛmaa ɔbo zolɛ a, bɛ muala bɛbawie wu. 14Mesɛlɛ wɔ, dumua na medame noko mebayɛ ye bɛtɛbɛtɛ, kɛmɔ nyɛmoa ne mɔ nee ngakula ne mɔ anwosesebɛ si de la, na me nee bɛ ara ɛ nwo lɔ wɔ Yidɔm.”
15Yisɔ zele ye kɛ, “Ɛnee maa mengyakyi me menli ye mɔ bie ɛ nwo ɛke.”
Gyekɔbo buale kɛ, “Saa ɛ kunlu ɛdwo me nwo ɛdeɛ a, ɛnee noko ɛhye mɔ ɛngyia biala.” 16Yemɔti Yisɔ ziale hɔle Yidɔm kenle ko ne ala. 17Na Gyekɔbo vale ɔ ti bɔle Sɛko adenle zo. Ɔzile sua ɔlale nu na ɔsisile kpɔda ɔmanle ye nlankɛ ne mɔ. Ɛhye ati bɛfɛlɛ ɛkɛ ne Sɛko.#33.17 Sɛko: Ɔ bo a le “Kpɔda dɔɔnwo.”
18Na Gyekɔbo dwule suakpole Hyikɛm azo anzonudwolɛ nu, wɔ Keena azɛlɛ zo. Ɔvi Mɛsɔpɔteemea a ɔradwule ɛkɛ ne a. Ɔyɛle ye azokoɛleɛ wɔ suakpole ne kandiba. 19#Dwɔ 24.32; Dw 4.5 Ɔdɔle azɛlɛ ne mɔɔ ɔdɛnlanle zolɛ la dwɛtɛ fufule ɛya ko ɔvile Hyikɛm ɔ ze Heemɔ abo zo amra ne mɔ lɔ. 20Ɔzile azukponle wɔ ɛkɛ ne na ɔdonle ye Ɛle-Ɛlohee Yizilayɛ.#33.20 Ɛle-Ɛlohee Yizilayɛ: Ɔ bo a le, “Nyamenle, Yizilayɛ Nyamenle.”
Actualmente seleccionado:
Mɔl 33: NB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible in Nzema © Bible Society of Ghana, 1998.
