Mɔl 30
30
1Mɔɔ Relahyɛle nwunle kɛ ɔ nee Gyekɔbo anwo la, ɔ nye bolole ɔ diema raalɛ ne, na ɔzele Gyekɔbo kɛ, “Maa menwo mralɛ anrɛɛ menwɔwu.”
2Gyekɔbo vale Relahyɛle anwo ɛya na ɔzele ye kɛ, “Mele Nyamenle mezɔ wɔ awodeɛ ne anloa kɛ ɛmmawo mralɛ ɔ?”
3Relahyɛle zele kɛ, “Me sonvolɛ raalɛ Belehaa ɛne, ɛ nee ye ɛla maa ɔwo ralɛ ɔdo me gyakɛ azo, na eza ɔlua ɔ nwo zo meanyia mralɛ.” 4Yemɔti ɔvale ye sonvolɛ raalɛ Belehaa ɔmanle Gyekɔbo kɛ ɔ ye ɔ. Na Gyekɔbo nee ye lale. 5Belehaa nrenzɛle na ɔwole ralɛ nrenya ɔmanle Gyekɔbo. 6Akee Relahyɛle hanle kɛ, “Nyamenle ɛli me edwɛkɛ ɛmaa me, na yedie me ne, na yemaa me ralɛ nrenya.” Yemɔti ɔdonle ye Dan.#30.6 Dan: Ɔ bo a le “Nyamenle ɛli me edwɛkɛ ɛmaa me.” 7Relahyɛle sonvolɛ raalɛ Belehaa eza nee Gyekɔbo nrenzɛle na ɔwole ralɛ nrenya bieko. 8Na Relahyɛle hanle kɛ, “Me nee me diema raalɛ ne yɛpele kpole kpalɛ, na meli konim.” Yemɔti ɔdonle ye Nafetalae.#30.8 Nafetalae: Ɔ bo a le “Konle.” (Meho konle kpole ne meli konim.)
9Mɔɔ Liya nwunle kɛ ye awolɛ ne ɛtika la, ɔvale ye sonvolɛ raalɛ Zelepa ɔmanle Gyekɔbo kɛ ɔ ye ɔ. 10Liya sonvolɛ raalɛ Zelepa nee Gyekɔbo wole ralɛ nrenya. 11Na Liya hanle kɛ, “Meyɛ saleɛnli”, yemɔti ɔdonle ye Gaade.#30.11 Gaade: Ɔ bo a le “Moavolɛ.” 12Liya sonvolɛ raalɛ Zelepa eza nee Gyekɔbo wole ralɛ nrenya. 13Na Liya hanle kɛ, “Fɛlɛko ɛyi me! Ɔluakɛ mraalɛ bavɛlɛ me fɛlɛko;” yemɔti ɔdonle ye Ahya.#30.13 Ahya: Ɔ bo a le “Fɛlɛko.”
14Mekɛ dwule mɔɔ bɛte hwiiti la, Wulubɛn hɔnwunle baka bie mɔɔ bɛfɛlɛ ye mandileki la wɔ ɛya ne anu, na ɔdudule ɔrɛlɛle ɔ nli Liya. Na Relahyɛle hanle hilele Liya kɛ, “Mebodo wɔ, maa me ɛ ra nrenya ne mandileki ne bie.”
15Liya bizale ye kɛ, “Ɛdwenle kɛ ɔle nzɛmedɛ kɛ wɔza me wɔlie me hu la ɔ? Yeanga ye zɔhane, eza ɛbalie me ra ye mandileki ne noko.”
Relahyɛle buale ye kɛ, “Ɛ ra ne mandileki ne ati, ɛnɛ nɔe Gyekɔbo nee wɔ bala.”
16Mɔɔ aleɛ muanle nwolɛ, na Gyekɔbo vi ɛbɔ nu ɛlɛba la, Liya hɔyiale ye adenle na ɔzele ye kɛ, “Ɔwɔ kɛ ɛba me ɛkɛ ne ɛnɛ, ɔluakɛ meva me ra ne mandileki mebɔ wɔ ɛkpa.” Yemɔti ɔ nee ye hɔlale kenle ko ne nɔe ne.
17Na Nyamenle diele Liya nzɛlɛlɛ. Ɔnrenzɛle na ɔ nee Gyekɔbo wole ɔ ra nrenya mɔɔ tɔ zolɛ nnu la. 18Liya hanle kɛ, “Nyamenle ɛdua me ɛkpabɔdeɛ ne ɛmaa me, ɔluakɛ menvale me sonvolɛ raalɛ ne memanle me hu.” Yemɔti ɔdonle ye Yesakaa.#30.18 Yesakaa: Ɔ bo a le “Nyamenle ɛdua me ɛkpabɔlɛ kakɛ.” 19Liya nrenzɛle bieko na ɔwole Gyekɔbo ara nrenya mɔɔ tɔ zolɛ nsia la. 20Na ɔzele kɛ, “Nyamenle ɛlo me agyalɛ nu ahyɛlɛdeɛ mɔɔ le kpalɛ a. Kɛkala akee me hu bali me eni, ɔboalekɛ mewo mralɛ mrenya nsia memaa ye.” Yemɔti ɔdonle ye Zɛbulɛn.#30.20 Zɛbulɛn: Ɔ bo a le “Mrenya nsia.” 21Nzinlii ɔwole ralɛ raalɛ na ɔdonle ye Daena.
22Akee Nyamenle hakyele Relahyɛle na ɔdiele ye nzɛlɛlɛ, ɔdukuele ye awodeɛ ne ɔmanle ye. 23Ɔnrenzɛle na ɔwole ralɛ nrenya. Na ɔhanle kɛ, “Nyamenle ɛkpa me nyiane.” 24Ɔdonle ye Dwosefi#30.24 Dwosefi: Ɔ bo a le “Nyamenle ɛkpa me nyiane.” na ɔhanle kɛ, “Mesɛlɛ Ɛdɛnkɛma kɛ ɔmaa me ralɛ nrenya bieko.”
Gyekɔbo nee Leeban ngyehyɛlɛ ne
25Mɔɔ Relahyɛle wole Dwosefi la, Gyekɔbo zɛlɛle Leeban kɛ ɔmaa ye adenle ɔmaa ɔhɔ ye sua zo. 26Ɔzele ye kɛ, “Maa menva me mraalɛ ne mɔ nee me mra ne mɔ, mɔɔ bɛ ti menzonlenle wɔ la mengɔ. Ɛdawɔ ɛze ɛzonlenlɛ mɔɔ meva mezonle wɔ la.”
27Leeban buale ye kɛ, “Saa ɛkɛmaa me adenle a anrɛɛ meha ɛhye, menwu kɛ ɔlua wɔmɔ ɛ ti, Ɛdɛnkɛma ɛyila me. 28Yemɔti ka mɔɔ ɛkɛlie la, na menwɔdua menwɔmaa wɔ.”
29Gyekɔbo hanle kɛ, “Ɛdawɔ ɛze kɛ mezi mezonle wɔ nee kɛ wɔ nlankɛ nee mboane ɛzi ɛda me mekɛ zo la. 30Ɔluakɛ ɛnee wɔ nyɛmoa le ekyi bie yɛɛ membale a, kɛkala bɛ nwo ɛzo dɔɔnwo kpalɛ, yɛɛ medame me ti, Ɛdɛnkɛma ɛyila wɔ wɔ debie biala anu. Na kɛkala menea a akee yedwu mekɛ mɔɔ ɔwɔ kɛ medwenle me sua nu amra anwo a.”
31Leeban bizale ye kɛ, “Duzu yɛɛ menva memaa wɔ a?”
Gyekɔbo buale ye kɛ, “Menlie debie. Saa ɛkɛyɛ ɛhye ɛkɛmaa me a, anrɛɛ menwɔnlea wɔ mboane ne mɔ bieko. 32Maa meneɛnlea wɔ mboane ne mɔ anu ɛnɛ demua ye ala, na menye boane anwo ndeta biala nee boane ralɛ anwo bile biala, yɛɛ abɔnkye anwo ndeta biala, na fa bɛmɛ yɛ me ahatualɛ. 33Ɛhye yɛɛ saa kenle bie ɛkpondɛ me nɔhalɛ a ɔbamaa wɔanwu ye a. Ɛbanleɛnlea mɔɔ wɔva wɔmaa me la anu na abɔnkye biala mɔɔ anwo ɛnle ndeta anzɛɛ boane anzɛɛ boane ralɛ biala mɔɔ anwo ɛnle ndeta anzɛɛ boane ralɛ biala mɔɔ anwo ɛnle bile mɔɔ ɛkɛnwu ye wɔ me mboane nee me mbɔnkye ɛdeɛ ne mɔ anu la kile kɛ menwuale.”
34Leeban zele ye kɛ, “Ɔle kpalɛ! Yɛ ye kɛ mɔɔ wɔha la.” 35Na kenle ko ne, Leeban yeyele mbɔnkye nyinli nee mbelɛ anwo ndetɛndeta nee mboane mralɛ mɔɔ le bile la ɔmanle ɔ mra mrenya ne mɔ kɛ bɛhɔzie. 36Ɔ nee bɛ hɔle ɛleka mɔɔ saa ɛvi Gyekɔbo anwo ɛkɛ ne ɛkɔ lɔ a bɛtia kenle nsa la. Na Gyekɔbo nleanle Leeban mboane ne mɔɔ hale la.
37Akee Gyekɔbo hɔpɛle “alemɔndo”, “pɔpola”, yɛɛ “pilen” mbaka amolɛ na ɔyeyele bɛ nwo abonle ne bie ndenrɛndenra, ɔmanle mbaka ne mɔ anwo yɛle ndetɛndeta. 38Ɔvale mbaka ne mɔ mɔɔ yezunzo nwolɛ abonle ne bie mɔ la ɔhɔguale mboane ne mɔ nee mbɔnkye ne mɔ ahyɛnze anzɛɛ ninyɛne mɔɔ bɛno nu nzule la anu. Ɔyɛle ɛhye, ɔluakɛ saa nyɛmoa ne mɔ ba kɛ bɛbanlo nzule a, yɛɛ bɛfola bɛ nwo a. 39Na kɛmɔ nyɛmoa ne mɔ fola bɛ nwo wɔ mbaka anwo ndeta ne mɔ anwo la ati, bɛwo bɛ mra a nyɛmoa mralɛ ne mɔ anwo le ndeta.
40Gyekɔbo yele mboane mralɛ ne mɔ vile mbɔnkye ne mɔ anu na ɔmanle bɛ nye hɔle Leeban nyɛmoa anwo bile nee ndetɛndeta ne mɔ anwo. Ɔyele ye nyɛmoa ɛdeɛ ne ɔvile Leeban ɛdeɛ ne anu. Yeanva bɛ yeambɔ Leeban ɛdeɛ ne anu.
41Saa ayɛmoa bie mɔɔ anwo yɛ se la ɛlɛnrenzɛ a, Gyekɔbo fa mbaka ne mɔ gua ɛleka mɔɔ ayɛmoa ne mɔ no nzule la, amaa yeawo ndeta. 42Na saa ayɛmoa ne anwo ɛnyɛ se a, yemɔ ɔnyɛ ye zɔhane. Yemɔti ɛnee nyɛmoa ne mɔ mɔɔ anwo yɛ se la amuala le Gyekɔbo ɛdeɛ, yɛɛ mɔɔ anwo ɛnyɛ se la amuala le Leeban ɛdeɛ. 43Gyekɔbo yɛle ye zɛhae na ɔnyianle ɔ nwo kpole kpalɛ; ɔnyianle nyɛmoa, sonvolɛ mrenya nee mraalɛ, afunlumu nee asoaso dɔɔnwo.
Actualmente seleccionado:
Mɔl 30: NB
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Bible in Nzema © Bible Society of Ghana, 1998.
