Saint Matthieu 7

1Da oui tane wal baï ya, an klime tane wal baï hi oui ya. 2Baï ko̱ jing walabaï on ko̱ ouime wal baï hi kli, yé kli ndé wal baï hi oui kéng, baï ko̱ jing fèn léna ko̱ ouime lé kli, yé kli ndé lé oui kéng. 3Da baïfèn da mome ko̱ njaka pa an bil nona yine no, da tane ga kèrè toul paraponron di ko̱ na an bil dodok nono ya lé? 4Da ka mboro hane, mi mome sa hi yine no: Mo yèng an mème bi njaka pa guèfal an bil nono, da mono, paraponron di mi na an bil dodok nono lé? 5Mo ba njou‐mongnafèn, mo ti bi paraponron di guèfal an bil dodok nono ti dambèl, da afal mo ma ko̱ guèl tang ta baï bina njaka pa guèfal ko̱ mi na an bil nona yine no.

6Oui hi fèn ko̱ ba tangna fofoto hi nvali ya, da oui wou zaou perle abaïli an mbèla ngoïyali ya, maléba touya kli ma nda zaou perleli on ka bo̱ko̱ kli, da kli féré ka noung oui.

7Oui oui, da yé kè ma hi oui; oui nza da yé oui jing; da oui hang njaka mboro, da yé kè ma bourou hi oui. 8Baï njoukouli bon on ko̱ oui, klime jing, da njoukou on ko̱ nza mi ko̱, da njoukou on ko̱ hang njaka mboro, yé bourou hi nè. 9Maléba njoukouna ba guè an woro baï, da tokoré goune nè mi oui nè baï tarou, yé kè ma hi ba kone hi nè lé? 10Maléba tokoré kème oui baï njouï, kè ma hi béké choï hi nè lé? 11Da on, tokoré ouime ko̱ ba békékè mi toutou baï hina bèla toul ndo̱ko̱ hi goune baïli, yé Baba abaï ko̱ kaou nonkala ma ji bo̱ko̱kè nyèta baï hina bèla fènli hi kli on ko̱ mi oui nè ya lé?

12Mono on, fènli bon ko̱ ouime ji ba a njoukouli mi nding hi oui, oui ndé nding hi kli on kéng, baï on ba guingna da prophèteli.

13Oui ri ka njaka mboro ko̱ mi aya, baï ko̱ njaka domboro mi ata, da domboro ba loukoukè ko̱ mi sé guè guèl hèrè, da njoukouli nyèta ko̱ ma ri sé guè bilkè. 14Baï domboro baï séna kan yana kambèlè mi tane ta, da njakakè mi aya, da njoukouli nyè ya ma jing njakakè.

15Oui ngou mboro wo̱ko̱ prophèteli ko̱ bou ga badoua ka gui mone baï, da an bil kli, kli ba naïn loupli ko̱ nzala i kli nyèta. 16Yé oui ma tou kli ka ba léna akli, njoukouna doulou léna di raisinli an gassa dili lé? maléba léna di njouili a mbissi lé? 17Mono on, bèla dili bon mi lé bèla lénakè, da poumna dili mi lé béké lénakè. 18Bèla di ma lé béké lénakè ya, da poumna di ma baï léna bèla lénakè ya. 19Dili bon on ko̱ mi lé bèla lénakè ya, yé kli ma koung ka wou kon hèlè. 20Da mono on, yé oui ma tou kli ka ba léna akli.

21Yé njoukouli bon on ko̱ mi di mi: Nanjou, Nanjou! kli bon ma sé bilkaou an nonkala ya, da ba kli on ko̱ kaou mara fal toula Baba ni ko̱ kaou an nonkala. 22Da ka séssé o̱kèo̱, yé njoukouli nyèta ma sa hi mi: Nanjou, Nanjou, na to̱ko̱ bong njaka Ouone ka ling‐o̱ jinguèl ya lé? Na ni zabololi tèn kala ka ling o̱ ya lé? Na nding kakaïya pinali ka ling‐o̱ ya lé? 23Ka séssé o̱kèo̱ soko yé mè sa bi kala hi kli: Mè tane tou oui bo̱ko̱ mbéo jinguèl ya, oui ourou guèfal an bèl moni, oui ko̱ sél guingna.

24Mono on, njoukouna ko̱ mi la baïnjaka ni, da nding fèn aïnli ko̱ mème sa, ka ko̱ nè mahana ka ho̱ko̱na njoukou, ko̱ za voulè an toul kone. 25Da mbame mi to̱, da mbi mi ou, da koukouna mi kou, ka fan kon voulou on, da kè tane lé ya, baï ko̱ bètèkè mi na ba toul kone. 26Da njoukouna ko̱ mi la baïnjaka ni, da nding mahana ko̱ mème sa ya, ka ko̱ nè mahana ka ba njou‐ngawa ko̱ mi za voulè an toul sarika. 27Da mbame mi to̱, da mbi mi ou, da koukouna mi kou, ka fan kon voulou on, da kè lé, da bèssi kon nyèta.

28Da baï mi gui mahana ka on, ko̱ Jésus mi sa baïnjaka aïnli o̱tou, laou a ro̱kè njoukouli mi sé siya baï toul to̱ko̱nafèn nè; 29baï ko̱ kème to̱ko̱ hi kli, mahana ka bina baïnjakè tou, da tane ti mahana ka njou‐to̱ko̱na bong guingnali ya.

Actualmente seleccionado:

Saint Matthieu 7: KBN1947

Destacar

Copiar