जकरिया 12
12
यरुसले़मिल्ले़ कुनिङ्मिहाॽ मे़ङ्मासि
1इस्राइलरे़ कुयाःम्बेओ यहवे दाङ्बे़ल्ले़ कुइङ्घङ् हाबा कन्लो॥ ताङ्साक्पा के़घिङ्बा, इक्सादिङ् खाम्बेःक्मे़ल्ले़ कुबुङ् के़युङ्बा नु मनाःल्ले़ कुयाम्साम्मिन् खे़न् सिगाङ् नावागे़न् चइःत् के़जोःक्पा यहवे दाङ्बे़ल्ले़ उवा चोगुॽ— 2“ओमे़त्ते़म्मे़ॽ, के़रे़क् पिसाङ् के़युङ्बा मनाहाॽ होॽदोन् होॽदोन् लॽमारे़ लागि आङ्गाॽ यरुसले़ःम्मिन् खोर्या हे़क्तङ्बा चोगुङ्ॽ॥ यरुसले़ःम्मिन् किर्गप् कप्मारे़ लागि यहुदान् निङ्मिहाॽनु सोरिक् फुङ्सिङ्॥
3“आल्ल खे़ल्ले़ याःन्दिक् इक्सादिङ् खाम्बेःक्कोबा के़रे़क् मे़न्छाम् सुवाङ्हाॽ खे़ल्ले़ कुदक्ले़ङ्वाओ मे़जुम्मिल्ले़ आङ्गाॽ यरुसले़ःम्मिन् के़रे़क् मे़न्छाम् याप्मिहाॽरे़ खुन्छिॽ लागि लत्छा मे़म्मुम्मनाबा याक्पेॽ चोगुङ् पिरुङ्सिङ्ॽ॥ खे़न् मुम्मा के़गोःप्पाहाॽ के़रे़क् मे़गाःन्लो॥”
4यहवे दाङ्बे़ल्ले़ पाःत्तुॽ, “खे़न् ये़न्नो आङ्गाॽ मे़न्छाम् सुवाहाॽरे़ खुन्छिॽ अन्हाॽ मिक्फःम्बा चोगुङ्सिङ्ॽ हे़क्क्याङ् के़रे़क् अन्हाॽ साॽरिक् मे़गिमे़सिर याःन्दुङ्सिङ्ॽ हे़क्क्याङ् अन्गे़युक्पाहाॽ मे़नाङ्ल याःन्दुङ्सिङ्ॽ॥ कर आङ्गाॽ यहुदाबा मनाहाॽ ओमे़त्तुङ्सिङ्ॽ॥ 5खे़ब्याङ् यहुदाबा लाम्लोबाहाॽरे़ खुन्छिॽ आप्फेक् निङ्वाॽओ अक्खे मे़बाःत्तुॽ, ‘यरुसले़ःम्मोबा मनाहाॽ के़धुम्बा मे़जोक्, थेआङ्भे़ल्ले़ मुक्साम्दाङ्बा यहवे दाङ्बे़न् खे़ङ्हाॽरे़ खुन्छिॽ निङ्वाॽफुमाङ्लो॥’”
6खे़न् ये़न्नो आङ्गाॽ यहुदाबा लाम्लोबाहाॽ यरिक् सिङ्हाॽओबा मिघाङ्ग्रोःक् याङ्मा साङ्ते़रे़ःङ् कुइसिक् नु चाधःङ्माहाॽरे़ कुलुम्मोबा हुरुरु के़दिःप्पा मि हे़क्तङ्बा चोगुङ्सिङ्ॽ॥ खे़ङ्हाॽरे़ काक् पिसाङ्बा, चुप्साङ् नु फे़न्छाङ् ले़प्माङ्बा के़रे़क् मनाहाॽ खाप्पुथ्यःङ् मे़जोगुसिॽ, कर यरुसले़ःम्मिन् आप्फेक् कुयुक्नाओ हाबा युङ्लो॥ 7आङ्गाॽ यहवे दाङ्बे़ल्ले़ यहुदाबा युङ्दे़न्हाॽ तगिए ताङ्से़ःप्तुङ्ॽ, हे़क्क्याङ् कम्भलॽरिक् दाउदरे़ कुहिम्सयङ्हाॽरे़ खुन्छिॽ मिमिदिङ्ङिन् नु यरुसले़म के़युङ्बाहाॽरे़ खुन्छिॽ मिमिदिङ्ङिन् यहुदाबाहाॽरे़न्नुःल्ले़ यरिक् मे़बोङ्ने़न्ल॥
8खे़न् ये़न्नो यहवे दाङ्बे़ल्ले़ यरुसले़म के़युङ्बाहाॽ ताङ्से़ःप्तुसिॽ, हे़क्क्याङ् खे़ङ्हाॽओ आत्तिन् के़रे़क्नुःल्ले़ मे़न्धुम्मनाबा चोक् खे़न् दाउदे़न् हे़क्तङ्बा पोङ्ॽ, हे़क्क्याङ् दाउदरे़ कुहिम्सयङ्हाॽ निङ्वाॽफुमाङ्ङिन् हे़क्तङ्बा मे़बोङ्ॽ, खे़ब्याङ् खे़ङ्हाॽरे़ खुन्छिॽ तगाङ् तगाङ् के़बेःक्पाहाॽ यहवे दाङ्बे़ल्ले़ कुमाङ्लाइङ्बा कुइसिक् मे़बोङ्लो॥
मे़धुबुबाल्ले़ कुलागि मे़रिङ्
9यहवे दाङ्बे़ल्ले़ पाःत्तु, “खे़न् ये़न्नो यरुसले़ःम्मिन् फप्मारे़ लागि के़दाबा के़रे़क् मे़न्छाम् सुवाङ्हाॽ हदॽ मे़ङ्मासि लाम् चोगुङ्ॽ॥ 10हे़क्क्याङ् आङ्गाॽ दाउदरे़ कुहिम्सयङ् नु यरुसले़म के़युङ्बाहाॽओ लुङ्गुम् हे़क्क्याङ् पेलिगे़न् तुवा के़जोःक्पा याम्साम्मिन् पाङ्घुङ् युसुङ्ॽ॥ खे़ङ्हाॽरे़ मे़धुबुबान् ओमे़मे़त्तु, हे़क्क्याङ् लत्थिक्पा साःल्ले़ कुलागि कुभा मे़रिङ् थक्पा कुइसिक् खुने़ॽ कुलागि खे़ङ्हाॽ मे़रिङ् मे़धक्, तुम्बा साःल्ले़ कुलागि मे़रिङ् मे़धक्पा कुइसिक् खे़ङ्हाॽ साॽरिक् मे़रिङ् मे़धक्लो॥ 11मगिद्दोबा ने़ने़बादे़न्नो हदद-रिम्मोनबा हे़क्के यम्बा हाःप्मा चिःङ्मा पोःक्खे़आङ् वये़, खे़ल्ले़ याःन्दिक् यरुसले़ःम्मो हाबा खाम्दाङ्बाए यम्बा मे़रिङ् थक्मा पोङ्ॽ॥”
12“लाजेॽ के़रे़क् हिम्सयङ् थक्मा खुन्छिॽ मेःत्हाॽआङ् वेॽ वेॽ मे़रिङ् मे़धक्, दाउदरे़ कुहिम्सयङ्बाहाॽ नु खे़ङ्हाॽरे़ खुन्छिॽ मेःत्हाॽ, नातानरे़ कुहिम्सयङ्बाहाॽ नु खे़ङ्हाॽरे़ खुन्छिॽ मेःत्हाॽ, 13ले़बिरे़ कुहिम्सयङ्हाॽ नु खे़ङ्हाॽरे़ खुन्छिॽ मेःत्हाॽ, सिमिरे़ कुधाःक्हाॽ नु खे़ङ्हाॽरे़ खुन्छिॽ मेःत्हाॽ, 14हे़क्क्याङ् के़दाङ्बा वेॽ के़रे़क् थाःक्हाॽ नु खे़ङ्हाॽरे़ खुन्छिॽ मेःत्हाॽ मे़रिङ् मे़धक्लो॥”
Actualmente seleccionado:
जकरिया 12: LIF
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2009, 2023, Wycliffe Bible Translators, Inc. All rights reserved.