मलाकि 3
3
1मुक्साम्दाङ्बा यहवे दाङ्बे़ल्ले़ पाःत्तुॽ, “ओमे़त्ताम्मे़ॽ, आबाङे आङ्गाॽ आइङ्घङ् के़साबे़न् पाङ्घुङ्ॽ, हे़क्क्याङ् खे़ल्ले़ आङ्गाॽ आदगि आदगि लाम् यारिप् चोगुरो॥ खे़न् ये़म्मो खे़निॽ के़गोःत्तुम्बा दाङ्बे़न् हक्चघत् आबाङे कुहिम्मो तारो, खे़निॽ सिराॽगे़धाङ्बा माङ्हुप्पिल्ले़न् इङ्गे़साबे़न् तारो॥”
2कर खुने़ॽ कुदामा ये़न्निन् हाःत्ले़ थम्मा सुक्तुबे? खुने़ॽ निधाःम्सिङ्ङिल्ले़ हाःत्ले़ ये़प्पाङ् ओमे़प्मा सुक्तुबे? थेआङ्भे़ल्ले़ खुने़ॽग साम्म्याङ् के़धक्पाल्ले़ साम्म्याङ्ङिन् योःम्मारे़ लागि मिन् मुःत्तुबा मिराःक् कुइसिक् लॽ हे़क्क्याङ् चाङ् वागे़हप्पाल्ले़ कुसागुन् हे़क्के लॽरो॥ 3खुने़ॽग युप्पा के़योःम्बा नु सेसे चोःक्मारे़ लागि युप्पा वागे़हप्पा हे़क्के पोङ्ङाङ् युङ्सिङ्॥ हे़क्क्याङ् साम्म्याङ् नु युप्पा योःम्मनाबा कुइसिक् निङ्वाॽफुसाम्बाहाॽ#३:३ हिब्रुओ ले़बिहाॽरे़ खुन्छिॽ मुॽइदाङ्सा पत् सुत्थो चोगुसिॽ॥ खम्भे़ल्ले़ यहवे दाङ्बाओ याम्मोआङ् खे़ङ्हाॽरे़ सुत्थो हुक्सोयाङ् मे़दारुॽ॥ 4खे़न् ये़न्नाङ्धो यहुदा लाजेॽ नु यरुसले़म ये़क्यक्कोबा मनाहाॽरे़ मे़दारुबा हुक्सोयाङ्हाॽ, तगि कुइसिःक्के यहवे दाङ्बे़ल्ले़ कुलागि ताःक्मा के़लाॽबा पोङ्॥
5मुक्साम्दाङ्बा यहवे दाङ्बे़ल्ले़ पाःत्तुॽ, “कर हे़क्के पोङ्मानुःल्ले़ तगि आङ्गाॽ खासे़न् लोःन्छे़ खे़निॽ पेसाङ् ताआ॥ साम्माङ्च्याःङ् मुरा के़मे़प्पा मनाहाॽ, इप्ना लोःम्भेत् के़बोःप्पा मनाहाॽ हे़क्क्याङ् इङ्ले़क्के तोःन्दि के़बिबाहाॽ, याःम्बक् के़जोःक्पाहाॽरे़ खुन्छिॽ नाम्याक् नुरिक् मे़म्बिमनाहाॽ कुये़म्बा के़सिमा मे़न्छुमाहाॽ नु ये़त्छा होॽदोःक्हाॽ निङ्वाॽ तादा के़जोःक्पा नु ताप्फे़ःल्लिक् के़मे़प्पाहाॽ वेॽ लाजेॽबा मनाहाॽरे़ खुनिॽ ले़प्माङ् कुदोःप्मा खासे़न् मे़ल्लोःम्मना मे़म्बिमनाबाहाॽ, हे़क्क्याङ् आङ्गाॽनु मे़ङ्गिमनाबा कन् के़रे़क् मनाहाॽ आङ्गाॽ हक्चघत् आप्तिक् कुःत्तुङ्सिङ्ॽ॥”
थिबोङ्लक् तोःम्मा पोङ्
6मुक्साम्दाङ्बा यहवे दाङ्बे़ल्ले़ पाःत्तुॽ, “आङ्गाॽ यहवे दाङ्बे़न् आभे़ल्ले़आङ् मिक्सेन् मे़ले़ङ्सिङ्ङान्ॽ॥ कल्ले़चोगुल्ले़ याकुबरे़ कुमुॽइदाङ्सासे खे़निॽ मे़म्मे़क्के के़वयि॥ 7खे़निॽ पाधे़बाहाॽरे़ खुन्छिॽ ये़म्माङ्धोए खे़निॽ आङ्गाॽ चोगुङ्बा उवाहाॽ खे़म्मा के़न्दे़न्दिन्नाङ् के़नुःक्खि के़बेगिआङ् के़वयि हे़क्क्याङ् खे़न् साम्योथिम्हाॽ मे़न्इःत्ते मे़न्नाःत्ते के़वयि॥ खे़निॽ आङ्गाॽ ले़प्माङ् नुःक्खे़म्मे़ॽ हे़क्क्याङ् आङ्गाॽ खे़निॽ ले़प्माङ् नुःङ्ङाॽ॥
“कर खे़निॽ याप्मि पान् से़ःन्गे़लाप्तिॽ, ‘आनिगे आक्खेलॽरिक् नुःक्खिगे़बे?’
8“थे मनाहाॽरे़ निङ्वाॽफुमाङ्ङिन् इङ्मे़ले़क्तुबि? हे़क्केसाङ् खे़निॽ आङ्गाॽ इङ्आग्ले़क्॥
“कर खे़निॽ याप्मि पान् से़ःन्गे़दोसि, ‘आक्खेलॽरिक् आनिगे इङ्ले़क्कासिगे़बे?’
“थिबोङ्लक् तोःम्मा नु हुक्सोयाङ्ङो खे़निॽ आङ्गाॽ इङ्आग्ले़क्॥”
9मुक्साम्दाङ्बा यहवे दाङ्बे़ल्ले़ पाःत्तुॽ, “खे़निॽ के़रे़क् सम्धाङ् माङ्दे साङ्ग्रा थ्ये़आङ् वाॽ थेआङ्भे़ल्ले़ खे़निॽ के़रे़क् सुवाङ्हाॽरे़ आङ्गाॽ याप्मि इङ्गे़ले़क्तिआङ् वाॽ॥ 10आङ्गाॽ आहिम्मो चामा थुङ्मा वाॽर फाॽआङ् के़रे़क् थिबोङ्लक्किन् चाधाःङ्ङो ताराम्मे़ॽ॥ कन् पाःन्नो आङ्गाॽ आसाॽरे़आङ् ओआमे़त्ते़ आसाॽरे़ॽ, आङ्गाॽ साङ्ग्राम्पेदाङ्बा लाम्धेःत्हाॽ हन्दुङ्ङाङ् कुयाङ्मारे़आङ् मे़हत्तुन्ल थारिक् हाङ्वागे़न् मुॽइसाम् खे़निॽ लागि सःक्सुङ् थासुङ्बि मे़धाआन्बि॥ 11खे़निॽ चा इक्ताप्हाॽ के़जाबाआङ् के़मे़ङ्बा निःङ्घुक्वाहाॽ आङ्गाॽ मे़क्खुङ्सिङ्ॽ, हे़क्क्याङ् खे़निॽ इक्ताप्पो के़युङ्बा पुरुप्लुप्सेःल्ले़ कुबुङ्ङो के़बप्पा कुजाॽहाॽ मे़न्दुम्मे मक्मे़धाने़न्॥ 12हे़क्क्याङ्धो के़रे़क् मे़न्छाम् सुवाङ्हाॽरे़ खे़निॽ मुॽइसाबाने़निङ् के़म्मे़त्तिॽ, थेआङ्भे़ल्ले़ खे़निॽ लाजेन् लत्छा साॽरिक्के सिक्के़सम्बा लाजेॽ पोङ्लो॥”
निङ्वाॽफुमाङ्ङिन् के़नुॽबा चोक्
13मुक्साम्दाङ्बा यहवे दाङ्बे़ल्ले़ पाःत्तुॽ, “खे़निॽ आङ्गाॽ आदक्ले़ङ्वाओ थःत्मे़न्दे़प्मनाबा के़साक्पा पान् के़बाःत्तुम्माङ् वाॽ॥
“हे़क्केसाङ् खे़निॽ आङ्गाॽ याप्मि पान् से़ःन्गे़दोसि, ‘आनिगे थेःल्ले़ कुयाःम्बेओ खे़ने़ॽ के़दक्ले़ङ्वाओ पान् पाःत्तुम्बे़आङ् वाॽबे?’
14“खे़निॽ के़बाःत्तुम्माङ् वाॽ ‘निङ्वाॽफुमाङ्ङिल्ले़ कुसे़वा चोःक्मा कुसुम्मे़दरुन्॥ खुने़ॽ कुइङ्जाङ्ङिन् नाःप्मा तिम्मा हे़क्क्याङ् मुक्साम्दाङ्बा यहवे दाङ्बे़ल्ले़ कुदगि के़सिबाहाॽरे़ खुनिॽ लागि मे़रिङ् के़धक्पा कुइसिक् लाङ्घेःक्माल्ले़ आनिॽ थे आघोसुम्माङ्बे? 15कर आल्लग यम्बा के़ले़ङ्सिङ्बाहाॽए मुॽइसाबा आमे़त्तुम्सिम्॥ से़क्खासाङ् ताप्फे़ःम्बा याःम्बक् के़जोःक्पा मनाहाॽए मे़नुॽमे़दाआङ् मे़वाॽ, हे़क्क्याङ् निङ्वाॽफुमाङ्ङिन् कुनिङ्वाॽ के़साॽबा मनाहाॽ खुम्दिङ्ङो मे़न्धाए मे़घे़त्छिङ् मे़घे़त्॥’”
16खम्भ्याङ् यहवे दाङ्बे़न्नु के़गिबाहाॽ ताॽमे़जे़क्खे़, हे़क्क्याङ् यहवे दाङ्बे़ल्ले़ खे़ङ्हाॽरे़ खुन्छिॽ पाःन्निन् सिङ्सिङ् ये़क्ये़क्काङ् खे़प्सु॥ यहवे दाङ्बे़न्नु के़गिबाहाॽ हे़क्क्याङ् खुने़ॽ कुमिङ्ङिन् इङ्धाङ् के़बिबाहाॽरे़ खुन्छिॽ निङ्वाॽसोक् किप्मनाबा साप्लाथःङ्मो खुने़ॽ कुदगिए मे़साप्तु॥
17मुक्साम्दाङ्बा यहवे दाङ्बे़ल्ले़ पाःत्तुॽ, “आङ्गाॽ खासे़न् चोगुङ्ङिल्ले़ याःम्मा, खे़ङ्हाॽ आङ्गाॽ आयाङ्सा कुन्धे मे़बोङ्॥ इङ्जाङ् के़इःप्पा के़नाःप्पा साहाॽ पाःल्ले़ लुङ्माॽ तुक्तुसिबा हे़क्के आङ्गाॽ खे़ङ्हाॽ लुङ्माॽ तुक्तुङ्सिङ्॥ 18हे़क्क्याङ् साम्योबा नु ताप्फे़ःम्बा याःम्बक् के़जोःक्पा खे़ब्याङ् निङ्वाॽफुमाङ्ङिल्ले़ कुसे़वा के़जोःक्पा नु कुसे़वा मे़न्जोःक्मनाबाहाॽ के़से़म्बा मिक्सेःन्निन् खे़निॽ याम्मो के़निसुम्लो॥”
Actualmente seleccionado:
मलाकि 3: LIF
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2009, 2023, Wycliffe Bible Translators, Inc. All rights reserved.