Romanos 8

Eta vitaresira emapa ema Machanewa Viya

1Puítisera, viti viáwa'akanaipa'i ema Jesucristo, waipa vikaikuñáima'i. 2Taicha eta máwa'asira'avi'i ema Machanewa ema Viya. Émapa, tikaepa'a'i eta tapamisira'avi'i eta pekatu, étapa eta támaparauchira'avi'i eta visiapiraya te ekuñaraki. 3Taicha ema Viya, eta máimaira'i eta vimaetumechirawa'i, vimárata'aira'i vítaucha'ini eta wanairipiana, mawanekapa tiúkupaika'i ema Machicha, makake'eyare'i eta juka viáke'e viti achaneana. Eta máijarasirawa'i, makamitiekene'aipa eta tapamisira'avi'i eta viáke'e eta vikapekaturairana. 4Maicha'i eta juka, apaesa waipa vikuimiyanawa vikue'ika eta panererukana tamaurikeneana, etachuchasera eta maimikatasira'avi'i ema Machanewa ema Viya.

5Nákanisera nasuapa'i eta tawara'akeneana eta náke'e, étachucha napanerecha'i eta náichiraya eta tamaurikeneana. Vítisera viti visuapana'i eta mawara'akeneana ema Machanewa ema Viya, étainapa vipanerechaya eta vikurisamurechiraya ema Viya. 6Nákani napanerecha'i eta tawara'akeneana eta náke'e, támaparauchaipa eta nasiapiraya te ekuñaraki. Vítisera vipanerechana'i eta mawara'akeneana'i ema Machanewa ema Viya, viti vítarekayare. Viúrinapa maye'e ema Viya. 7Nákani napanerechaichucha eta tawara'akeneana eta náke'e, ena makatianaruana'i ema Viya. Taicha wá'ikene náwara'aima'i nasuapa eta mawanairipi. 8Taicha, ena étachucha nakurisamurereka'i eta náke'e, wa'i náituka'ini nakurisamurecha'ini ema Viya eta mawara'akene'i.

9Puítisera eti, eta máwa'asira'eipa'i ema Machanewa Viya, waipa étaima'i epanerecha eta tawara'akeneana'i eta iáke'e. Étapa epanerechaya eta mawara'akeneana'i ema. Nákani wa'i máwa'aruanaina'ini ema Machanewa ema Viya, wá'iware machaneranaina'ini ema Cristo. 10Étisera, eta máwa'asira'eipa ema Cristo, tayanapane eta iáke'e eta táepeniraya táichavene'i eta pekatu, étasera eta iáchanewa títarekayarechucha, taicha ejákapakareipa'i me Viya. 11Táichavene eta máwa'asira'eipa puiti eti ema Machanewa Viya, ema kaechepuka'i ema Jesús, ema tiawa'aka'e'i eti. Émaparakaichu'i ema tikaechepuka'i te maekari ema Jesucristo. Émaichu tikaechepukayare eta iáke'eana tíjaraka'eyare eta arairu itaresiraya. Ema Machanewa Viya ema tiawa'aka'e'i eti.

12Taka'e, nuparapenaveana, vikatupara'apa waipa étaima'i visuapa eta tawara'akene eta viáke'e. 13Taicha te etachuchapuka esuapa eta tamaurikeneana tawara'akeneana'i eta iáke'e, tájinapa iuchukuiyaima'i, ekaikuchi'i eta épeniraya, té'esera é'ika'i eta mawara'akene'i ema Machanewa Viya, ínajikayarewa eta íchira eta tawara'akeneana'i eta iáke'e, ejákapainapa eta íkuchi'i eta ítaresirainapa.

14Taicha vimutu'i viti visuapana'i ema Machanewa Viya, machicha'avipa ema Viya. 15Taicha eti wa'i ejachapa'ini eta Machanewa, eta kamusurakare eta tiama'e'i eta episirayare'i, eta ekaye'ekene'i émaipa ema Machanewa Viya timetaka'avipa eta machichaira'avipa ema Viya. Taka'e ema Machanewa Viya émapa timitupirucha'avi'i te mamira'u ema Viya, taka'e vimijarecha'i “¡Tata nukaiyakene!” 16Émaichu ema Machanewa Viya ema tiawa'aka'avi'i eta viachanewa viti emara timireucha'aviyare'i eta machichaira'avi'i ema Viya. 17Eta makachicha'aviraipa ema Viya, vijakapainapa eta víkuchi'i máijararu'aviya. Vikutinapa ema Cristo eta máijarasira'i eta máikuchi'i ema. Puiti, eta vikatajiwaira'i te juka vítaresira'i, vikuti'i ema Cristo eta makatajiwaira'i, tási'a, vikachanénapa ema eta mávi'a'i eta majaraiwa'i.

Eta vikuchapira'i eta Majaraiwa

18Németeaka'i nuti, tayanapane ichapepuka eta vikatajiwaira'i puiti juka sácheana, tájinachucha táichawa'i taicha jarari'iyare eta ichape táitsiwayare, vijakapaya eta ichape viúrikakarewaya te majaraiwa ema Viya. 19Jé'eware, tétavikawa'i eta tajamurachakarewa'i te táitekapapa eta sácheyare, eta vímairaya eta vikuchapakene'i eta takaitsiwairaya eta viáke'e vimutu viti machichanaveana ema Viya. 20Taicha eta apake'e takamitiaka'i eta jé'esarekene taichekuine, takutikene te jena sácheyare vikuchapakene'i, tamutuinapa témitiakayare eta témekatajiwacha'avianaini'i te juka apake'e 21tamutuinapa arairuyare, tétavikawainapa eta táuriwaya eta apake'e. Vikapayakaya eta tamikauchira'aviya eta majaraiwa ema Viya, eta makatiuchira'aviya viti machichanaveana. 22Vecha'i puiticha eta apake'e takatajiwaira'i takuti'i eta sukatajiwaira esu súkani esena tikakatiru'a'i eta suínasira. 23Ema Machanewa Viya máitsiwachaipa eta viáchanewana. Waipa táesachaima'i vicha eta pekatu. Wáipaware víchaima'i eta tamaurikeneana. Tási'a, títauchawainapa eta makachichaira'avinapa ema Viya.

24Yátupi'i puiti eta machicha'avira'i ema Viya. Ichapeware eta vikasiñawa'i eta maye'e eta vikuchapira'i eta viúchukuirayare. 25Wákamicha tamutu, vímiyanawa eta vikasiñawaira'i eta maye'e támutu sácheana. Tapaenumawainapa víma'ainapa, tájinapa vikuchapaima'i.

26Éneichuware, ema Machanewa Viya tímikataka'avi'i tamutu eta vimarata'akeneana'i. Tavetiji tímikataka'avi'i eta vimaitusira'i eta viyujarasirana. Ema, tiyaseucha'avi te viáchanewana. Viúmiticha'i taicha muraka eta viwaraira'i eta mayasearuana. 27Émasera ema Viya máimati'i eta visamureana jákani viwara'akeneana viyaseaka, étaipa eta mayasearapi ema Machanewa Viya. Taicha ema Machanewa Viya máimati'i eta mawara'akeneana'i ema Viya, tási'a tiyaseucha'avi'i viti machanerana'i.

Ema Viya mawara'a tikachane'aviyare víti

28Véchaipa'iware tétavikawa'i eta majaneasira'avi'i ema Viya vimutu viti vémunakana'i ema. Tayanapane vikatajiwa'ipuka, ema tamutu'i tiuri máicha. Títauchawayare eta mapanereruana ema eta viúrikakareyare'i eta máichuira'avi'i. 29Akaneipa'i eta máimatira'avi'i, tinerejika'avipa machicha'aviyare'i. Mawara'a'i ema vikutiyare ema Machicha Jesucristo eta máuriwa'i. Tímikutijirikawayare'i viparapeya ema, véchavimuri'i eta makachichaira'avi'i. 30Ena manerejiruana'i ema Viya, maíchu'awarepa; eta nasuapira'i napauchapa ema, majakapawakapa. Tási'a, ena tijakapana'i maíjarakawapa eta naíkuchi'i eta naisiapiraya taye'e eta majaraiwa.

Eta máemunasira'avi'i ema Viya

31¡Tétavikawa'i eta makatiuchira'avi'i ema Viya! Tájina táichawa eta nakatianasira'avipuka nákani achaneana ¡Wá'isera nárata'a tikapakecha'avianaima'i! 32Eta majapanuira'avi'i ema Viya, wa'i mawayuaka'ini máijararekapa ema Machicha eta nakapasira'i víchavene'i vimutu víti. Tási'a, mavetijinapa eta makatiuchira'aviyare puiti te tamutu eta jákani víchawakenewana. 33Puiti tájinapa viviurewaina táimikuñaka'avi'ini viti manerejiruana'i, taicha ema Viya tépachiaka'avipa eta majakapira'avi'i. 34Tájinakenepa tímikuñaka'avima'i taicha ema Cristo máepenina'avipa, tichawaipaware títareka. Puíticha téjaka'i te mawaure ema Viya, téchejiuruka'avipa ema. 35Ema Jesucristo, wa'i máinajikaima'i eta máemunasira'avi'i. Tási'a, yátupina eta vikasiñairaina ema. Tayanapanepuka vikatajiwa'i, véku'apuka, te vítaji'apuka, wa'i vikainajiruka'ini máicha. Te típikarareka'avianapuka, te tipanajika'avianapuka, te nawara'apuka tikapaka'aviana, wá'ikenesera vikainajiruwa'ini máicha. 36Taichakene'i eta Takapika'ukene Ajureka:

“Tikatianakana'i ema Viya titanuka'aviana'i viti,

nawara'a tikapaka'aviyare

tiwapinawana'i eta nakapasira'avi'i,

takuti'i ena tikaparekana'i eta wakate.”

37Tétavikawa'i eta máetumechira'avi'i ema Jesucristo táichavene'i eta máemunasira'avi'i. 38Nuti nusuapakene ema Viákenu eta majaneasira'aviya, tájinakene tikaerajika'avima'i eta máemunasira'avi'i, wa'i étainapukaini eta vikatajiwapuka eta vítaresira, étainapukaini eta vépenira, étainapukaini tájinakene wa'i vipika'ini eta tipikakareana'i te juka apake'e, énainapukaini ena ichapemurikeneana maye'eana ángele ema wíinaraji, étaina'ipukaini eta náiñe'iwana'i. 39Tájinakene tikaerajika'avima'i enainapukaini ena tiavi'ana te anuke'e anuma, enainapukaini ena ereanana tiavi'ana te tamapikukene, etainapukaini eta maepiyaruana ema Viya takaerajika'avi'ini. ¡Tajina tikaerajika'avima'i te mamira'u eta maemunasira'avi'i ema Viya eta maimechira'avi'i eta maijare ema Viákenu Jesucristo!

Actualmente seleccionado:

Romanos 8: IGB

Destacar

Copiar