Marcos 16

Eta máechepusira ema Jesús te máekari

(Mt 28.1-10; Lc 24.1-12; Jn 20.1-10)

1Taka'e te jena sache sawarukene'i, tiyanapa esu María Magdalena, esu Salomé, ésupa esu apana María. Tiwacharekanapa eta tíjiyekene perfume nayariasi'ayare eta máke'e ema Jesús. 2Te apanapa sache, lumínkukene'i, nayatirupa tiyanana te máekari. Te tiúchukapa eta sache, títekapanapa ena eta te máekari. 3Eta napaisirapa'i, tiyaserejirikakanapaipa'i:

–¿Nája'apuka tikaerajikayare eta mari, taji'a eta ñekari?

4Te'esera te, náima'apa eta mari tájinaipa'i te tapajakura eta máekari, eta juka mari ichapeme'i. 5Te tisiapanapa eta te máekari, náima'aine'i ema amaperu achane tejaka'i te waure, eta mamuiri'a tétavikawa'i eta tajapuwa'i. Ena esenana tiáramekanaine'i. 6Émasera máichawakapa:

–Wa'i ekupika. Eti etánukapa'i ema Jesús Nazareno, ema makaetatakené'i. Májinaipa'i ani, téchepukaipa'i te máekari. Yare, íma'a eta juka mávineni'i. 7Eyana emétakawaka ena máimitureana, tási'a émapa ema Pedro: ‘Ema tiyanayare te Galilea, ánaki makuchapia'eyare ema. Échawaichu'i eta makayemakeneana'i.’

8Taka'e ena esenana, tiúchukanapa te máekari, tiyananapa. Eta nayanira'i, nájinasera nametaruina'ini, taicha eta napisira'i.

Tímerekawapa ema Jesús suye'e esu María Magdalena

(Jn 20.11-18)

9Eta máechepusira'i ema Jesús te máekari te jena lumínkukene'i, te yátikara'i sutiwapa máimeresiawa'i suye'e esu María Magdalena. (Esu suka María esu máepachiaru'i ena siétekeneana éreanana te suáke'e.) 10Esu tiyanapa, sumetapanawaka'i ena té'ikanaini'i ema Jesús. Ena, tétavikawa'i eta napanerechira'i, tási'a tíya'ana'i. 11Eta juka eta nasamira'i, wá'isera nasuapa'ini eta sumetarapi'i, eta máechepusira'i ema Jesús eta machavira'i títareka, étapa eta máimeresirawa'i eta suye'e.

Tímerekawapa ema Jesús naye'e ena apinana máimitureana

(Lc 24.13-35)

12Te táekenepa eta juka, tímerekawawarepa ema Jesús naye'e ena apinana máimitureana eta napaisirapa'i, nakaiju'eirapa'i eta awasarechicha. Ti'ápamuichawa'isera eta mamira. Wa'i náimatiwane'ini ema. 13Taka'e, tichawawaneanapa nametapana ena apamuriana nachamuriana. Wá'iwaresera nasuapa'ini ena apinana, eta nametasira'i.

Ema Jesús mawanekawaka ena maye'eana apústuleana

(Mt 28.16-20; Lc 24.36-49; Jn 20.19-23)

14Tiuri, te táekenepa, tiúrujikawana'i eta nanisira'i ena únsekeneana maimitureana. Taka'e, tíja'uchawapa tímerekawa ema Jesús eta naye'e. Makajachamuripa eta namasuapira'i eta nametarapiana'i, ena tíma'ana'i ema eta máechepusiraipa'i. 15Tási'a máichawakapa: “Eyana epaika tamutu eta awasareana eta te juka apake'e, ekametarairuyare eta tiúrina echéjirirukawa naye'e ena achaneana. 16Nukuchuku'awakayare namutu ena tisuapajira'ianaya ena tikaikachasianaya. Énasera ena wa'i tisuapana, tikaikuñanayare. 17Ena tisuapajira'iana náimerekayare eta juka tiáramikareana: Náimijunijikayare ena éreanana naye'e ena achaneana, taicha námapikayare eta níjare. Náitukayare téchejikana eta apanana echéjirirukawana namaitukakeneana'i 18te nakarataka'ipuka eta kichareana, tájina táicharakaima'i, te térana'ipuka eta veneno, tájinaware náichawaima'i. Nanakayare eta nawa'uana naye'e ena nákani nakajumakeneana, tinarakanayare.”

Eta mayapira'i ema Jesús te anuma

(Lc 24.50-53)

19Taka'e, te títawapa tamutu eta mametarapiana'i ema Viákenu Jesús, tiyanapa tiyapa te anuma. Ema Viya makaejakapa te mawaure. 20Taka'e, tiyananapa te tamutu awasareana ena máimitureana, tikametarairuanapaipa eta tiúrinakene echéjirirukawana. Ichape eta máimikatasirawakapa'i ema Viya. Tétavikawa'i tajakapakarewa'i máicha, eta náimiturapianapa'i. Taicha máijarakawakapa'i eta náimeresirapa'i eta tiáramikareana tikunachakareana'i.

Actualmente seleccionado:

Marcos 16: IGB

Destacar

Copiar