LUKAS 21

Waktsa biwdapa ofrendan

1Rikárqanmi, kapoqyoqkuna ofrendankuna chureykaqta ofrendakuna eyllukuna arkaman. 2Rikarqanmi juk allápa waktsa biwdata, ishkey yulaq qelleyninta tseyman winaqta. 3I nerqan: —Rasonpam niyaq, key waktsa biwdam winashqa llapampita masta. 4Taqey llapankunaqa winayashqa Dyospa ofrendanpaq sobrankunallatam; keyqa, waktsakeyninpitam winashqa llapan mikunanpaq kaqta.

Saslla templu ushakánan

5Jukkuna templu shumaq rumikunawan debótu ofrendakunawan adornashqapaq parleykaqkunata, nerqan: 6—Keykuna rikáyanqeykipita, shamonqam junaqkuna mana keydanqatsu rumi janawaránakushqa, llapanmi ushakashqa kanqa.

Señalkuna willakun usheypaq

7I tapuyarqan, nirnin: —Mayestru, ¿imeyraq key kanqa? ¿O ima señalraq kanqa key kosaskuna susedinan kaptin?

8Tseynam pey nerqan: —Rikáyey ama engañashqa kayeytsu: Shayámonqam atskaqkuna jutíchow, nirnin: “Noqam ká Kristu”, i; “Tyempuqa keyllachownam.” Ama eywayeytsu peykunapa qepanta. 9I guerrakunapaq wiyarnin i rebelyonkunapaq, ama mantsakáyeytsu; wananmi key kosaskuna puntata susedinan; peru manam ushakeyraqtsu. 10Tseynam nerqan: —Sharkuyanqam nasyon kikinkunapura kontranakur, i reynukunapis kikinkunapura kontranakur; 11i kanqa jatun patsa kuyiykuna, i jinantin markakunachow mallaqeykuna i qeshyakuna; i kanqa mantsakey i syeluchow señalkuna. 12Peru manaraq key kosaskuna kaptinmi tsariyáshunki i qatikacháyáshunki, i judyukunapa eyllukáyanan wayikunaman i karselkunaman entregayáshunki i apashqa kayanki reykunaman i gobernadorkunaman noqapa jutíreykur. 13I keymi kanqa willakuyáneykipaq óra. 14Churakáyey shonqiykikunachow mana yarpakacháyáneykipaq imanow yaskiyáneykipaq defendikur; 15noqam qoyashqeyki parleyta i yacheyta, keytam mana awanteyta ni kontradisita pwediyanqatsu llapan chikikoqkuna. 16Entregashqam kayanki teyteykikunapa, i wawqikikunapapis, i kasteykikunapa, i amígikikunapapis; i wanutsiyanqam qamkunapita meyqeykikunatapis. 17Chikishqam kayanki llapankunapa noqapa jutíreykur. 18Peqeykikunapa ni juk aqtsanllapis ushakanqatsu. 19Pasyensyekikunawanmi ganayanki almeykikunata.

Jerusalenpa ushakeynin

20”Peru imeymi rikáyanki Jerusalenta ejersituwan jirurushqata, tseynam musyayanki ushakeynin chámushqana kanqanta. 21Tseyna Judeyachow keykaqkuna, eyqikuyey jirkakunaman, i chowpinchow keykaqkuna, eywakuyey; i tunachow keykaqkuna, ama yeykuyeytsu tseyman. 22Keykunam kayan kastígu junaqkuna qellqashqa keykanqannow kumplikánanpaq. 23¡Allaw qeshyaq warmikuna, i tsey junaqchow chicheqkuna! Kanqa allápa jatun nakakiykuna patsachow, i piñakiy key pwebluman. 24I wanutsiyanqa espádawan, i apashqa kayanqa presu llapan nasyonkunapa; i gentilkunapa Jerusalen jarushqa kanqa, gentilkunapa tyempunkuna tinkushqanyaq.

Nunapa Tsurinpa shamínin

25”Tseynam kanqa señalkuna intichow, killachow i qoyllurkunachow, i patsachowna nunakunapaq llakikiy, pantakáyanqa lamar qaparenqanpa i ólankunapa; 26ishkiyanqa nunakuna mantsakeypa i rikarnin key kosaskuna patsachow pasaptin; syelukunapa podernin kuyushqa kaptin.

27”Tseynam rikáyanqa Nunapa Tsurinta, pukuteychow shamoqta poderwan i jatun gloryawan. 28Key kosaskuna susedir qalleykuptin, sharkuyey i pallariyey peqeykikunata, salbasyonnikikuna yeykareykámunnam.

Igus yurawan tinkutsikiy

29Juk tinkutsikitapis nerqanmi: —Rikáyey ígus yurata i llapan montikunata. 30Tseqlliyámoqta rikarnin, kikikikunapa musyayey usya tyempu yeykareykámunnam. 31Tseynow qamkunapis, key kosaskuna susedeqta rikarnin, musyayey Dyospa reynun yeykareykámunnam. 32Tseqeypam niyaq, manam pasanqatsu key kasta llapan key susedenqanyaq. 33Syelu i patsa pasariyanqam, peru manam palabrákunaqa pasanqatsu.

34”Rikáyey kikikikunapaq, shonqiykikuna ama nitipukátsuntsu atska mikiykunawan machakiykunawan key kaweypaq afanninkunawan illaqpita shamunman qamkunaman taqey junaq. 35Juk waskawan shaweynowmi shamonqa jinantin patsachow llapan yachaqkunaman. 36Riwakiykáyey, imeypis Dyosta mañakurnin key llapan kosaskuna shamuptin safakiynikikuna merisiyáneykipaq, Nunapa Tsurinpa nowpanchow sheykáyáneykipaq.

37I junaqpa yachatsikorqan templuchow; i ampipa, yarqurir, keykaq Olíbus nishqan jirkachow. 38I llapan nunakuna shamoq peyman qoyapa, templuchow wiyayánanpaq.

Actualmente seleccionado:

LUKAS 21: QUEAN

Destacar

Copiar