LUKAS 16

Astúto mayordómuwan tinkutsikiy

1Disípulunkunatapis nerqanmi: “Juk ríku nunapam kaporqan juk mayordómun, i keymi akusashqa karqan kapoqninta ushapaqninnow. 2Tseynam qayarqan, i nerqan: ‘¿Imataq key qampita wiyanqá? Kwentata qoy mayordómu keynikipita, manam pwedinkinatsu mayordómu keyta.’ 3Tseynam mayordómu nerqan kikinllachow: ‘¿Imataraq rurashaq?’ Patronními qochiman mayordómu keyníta. Uryeyta, manam pweditsu; llimushnakiyta, penqakúmi. 4Musyámi ima ruranáta mayordómu keyníta qochimaptin, wayinkunachow chaskiyámananpaq.

5Patronninpa jaqankunakaqta juklleyllapayan qayeykur, punta kaqta nerqan: ‘¿Patronnípa eykataq jaqan kanki?’ 6Peynam nerqan: ‘Pachak barril aseytim.’ I nerqan: ‘Tsari resibiykita, tákiy saslla, i qellqey pitsqa chunkallata.’ 7Tseypitanam nerqan jukninta: ‘I qamqa ¿eykataq jaqa kankiy?’ Peynam nerqan: ‘Pachak tupu trígum.’ I peynam nerqan: ‘Tsari resibiykita, puwaq chunkallata qellqey.’

8“Patronnin alabarqan mana alli mayordómuta yacheywan rurashqanreykur; key kaweypa tsurinkunam mas astúto kayan nuna mayinkunata tratarnin aktsipa tsurinkunapitaqa.

Imanowpa rikeysakuna probechey

9“I noqam niyaq: Gánayey amigíkikunata mana alli rikeysakunapa, keykuna pishiptin, chaskiyáshuneykipaq wiñey wayikunachow.

10“Pim wallkachow fyel kanqa, atskachowpis fyelmi kanqa; pim wallkachow mana alli kanqa, jina atskachowpis mana allim kanqa. 11Injustu rikeysakunachowtsun fyel mana kayarqonki, ¿piraq markákuyashunkiy rasonpa kaqta? 12I jukpa kaqchowtsun fyeltsu kayarqonki, ¿piraq qoyáshunkiy qamkunapa kaqta? 13Ni pí sirweq manam sirwita pwedintsu ishkey patronkunata: Byenmi jukninta kuyanqa i jukninta ichikllapaq churanqa. Manam pwediyankitsu sirwita Dyosta i rikeysakunata.”

14I mallaqákoq farisewkunapis wiyayarqan key kosaskunata, mallaqákoq i peypeq kaqkuna burlakuyaq. 15Tseynam nerqan: “Qamkunam kayanki nunakunapa nowpanchow kikikikuna justifikákoq, Dyosqa reqinmi qamkunapa shonqiykikunata; nunakuna shumaqyátsiyanqan, Dyospa nowpanchowqa rakcham.

Dyospa reynun i ley

16“Ley i profetakuna Juankama kayarqan; tseypitanam Dyospa reynun willakushqa, i llapankunam sinchikuyan tseyman yeykuyánanpaq. 17Peru mas fásilllam syelupis i patsapis pasarinan leypa asentunllapis manam oqrakanqatsu.

Diborsyakiypaq

18“Pipis warminpita diborsyakoq, i jukwan kasakoqqa, olteron keytam ruran; i qowanpita rakikashqawan kasakoqqa, olteronmi.

Kapoqyoq i Lásaru

19“Juk kapoqyoq nunam karqan, bistikoq purpurawan i línu fínuwan, i ruraq bankeytita kada junaq allápa sumákiywan. 20Karqan jina juk limushneyru Lásaru jutiyoq, iskareykarqan ríkupa punkunchow, llágapa juntashqa, 21i munapaq mikurkiyta ríkupa meysanpita pakipinkuna shikwaqta, i allqukunapis eywar laqwayaq llágankunata.

22“Tseypitanam limushneyrú wanurerqan, i apashqa karqan angelkunapa Abraham kanqanman; i wanorqanmi kapoqyoqpis, i panpashqa karqan. 23I infyernuchow rikarkorqan, jipakiychow keykar, i karupita rikarqan Abrahamta, i Lásuruta Abrahampa kanqanchow. 24Tseynam pey, qaparipa nerqan: ‘Teyta Abraham, ankupeykallámey noqata; i kachamiy Lásaruta yakuchow dédunta oqurkatsir, i qallúta arwaratsimutsun; key ninachowmi jipakiyká.’

25“Abrahamnam nerqan: ‘Tsuriy, yarpakurkiy kaweynikichow kapoqnikikuna chaskishqeykita, i Lásarupis mana allikunata; kananqa peymi keychow shoqashqa, i qam jipeykankiy. 26Key llapanpitaqa, juk jatun wanwareykaqmi churashqa keykan noqakunachow i qamkunachow, tseynowpam keypita qamkunaman pasaq munaqkuna pwediyantsu, ni wakpita keyman.’

27“Tseynam nerqan: ‘Rowaqmi, teyta, kacheykiy teytápa wayinman, 28kapamanran pitsqa wawqiykuna willayánanpaq, peykunapis mana key jipakiyman shayámunanpaq.’ 29I Abrahamnam nerqan: ‘Moysesta i profetakunatam katsiyan; wiyayátsun.’ 30Tseynam pey nerqan: ‘Manam Teyta Abraham; peru sitsun meyqanpis eywanqa peykunaman wanushqakunapita, wanakuyanqam.’ 31Abrahamnam nerqan: ‘Moysesta i profetakunata mana wiyarqa, manam konbensikuyanqatsu wanushqakunapita meyqan sháriptinpis.’ ”

Actualmente seleccionado:

LUKAS 16: QUEAN

Destacar

Copiar