JUAN 3

Jesús i Nikodemu

1Karqan juk nunam farisewkunapita Nikodemu jutiyoq, judyukunachow mandakoq. 2Peymi Jesusman shamorqan ampipa i nerqan: —Rabi, musyayami Dyospita shamunqeykita mayestrunow; manam pipis pwedintsu rureyta key señalkuna qam rurashqeykita, Dyos peywan mana kaptenqa.

3Jesús yaskirnin nerqan: —Tseqeypa, tseqeypam neq, mana yapey yureqqa, manam rikeyta pwedintsu Dyospa reynunta.

4Nikodemunam nerqan: —¿Imanowpataq juk nuna awkis keykar yurinman? ¿Pwedinku akasu mamampa pachanman kutita, yapey yurinampaq?

5Jesusnam yaskerqan: —Tseqeypa, tseqeypam neq, yakupita i Espiritupita mana yureqqa, manam pwedintsu Dyospa reynunman yeykiyta. 6Eytsapita yurishqa kaqqa, eytsam; i Espiritupita yurishqa kaqqa, espiritum. 7Ama mantsakeytsu nenqáta: “Presisanmi yapey yurineyki.” 8Byentuqa púkan munashqampitam, búllaqta wiyankim; peru manam musyankitsu meypita shamushqanta, ni meypa eywanqanta; tseynowmi llapan Espiritupita yurishqa kaqqa.

9Nikodemu yaskirnin nerqan: —¿Imanowpataq key rurakanman?

10Jesusnam yaskirnin nerqan: —¿Qam kanki Israyelpa mayestrun, i keyta musyankitsu? 11Tseqeypa, tseqeypam neq, musyanqantsiktam parlantsik, i rikashqantsiktam, willakuntsik; i mana chaskiyankitsu willakuyashqáta. 12Si niyarqoq patsa kosaskunata, i mana kreyiyankitsu, ¿imanowparaq kreyiyanki selestyal kaqkunata niyapteq? 13Manam pipis witsashqatsu syeluman, sinowqa syelupita urámoqmi; Nunapa Tsurin, syeluchow keykaq. 14Imanowmi Moyses chusyaqchow sháritserqan kulebrata, tseynowmi wanan Nunapa Tsurin sharkatsishqa kanan, 15llapan peyman kreyikoqkaqqa, mana oqrakánampaq, sinowqa wiñey kaweynin kapunanpaq.

16»Keynowpam Dyos munduta allápa kuyarqan, i juklleylla Tsurinta qorqan, llapan peyman kreyikoqkaqqa, mana wanuyananpaq sinowqa, wiñeypa kaweynin kapunanpaq. 17Dyosqa Tsurinta manam kachamorqan key patsaman munduta kondenanampaqtsu, sinowqa key mundu peypa salbashqa kanampaqmi. 18Peyman kreyikoqqa, manam kondenashqatsu; peru mana kreyeqkaqqa, kondenashqanam, manam kreyishqatsu Dyospa japallan Tsurimpa jutinman. 19Kaq keymi kondenasyon: Aktsi key munduman shamorqan, i nunakuna kuyayarqan ampeqkunata aktsipeq mas, rureyninkuna mana alli kaptin. 20Llapan mana alli ruraqqa, aktsita chikinmi i manam shamuntsu aktsiman, rureyninkuna mana piñapashqa kanampaq. 21Rasonpa kaqta ruraqqa aktsimanmi shamun, rureyninkuna rikakunampaq Dyoschow rurashqa kanqanta.

Juan Bawtistapa juknin testimoniyun

22Tseypitanam, Jesús shamorqan disípulunkunawan Judea markata, tseychow karqan peykunawan, i bawtisarqan. 23Juan Enonchowpis bawtisarqan, Salim ládunchow, tseychow atska yaku kaptin; i shayámoq, i bawtisashqa kayarqan. 24Juanta manaran karselayarqanraqtsu.

25Tseynam liryayarqan Juanpa disípulunkuna judyukunawan paqakiy janaq. 26Shayámorqan Juanman i niyarqan: —Rabí, rikey Jordan tsinpanchow, qanwan keykaq; ¡peypaqwan willakushqeyki, bawtisan, peymanmi llapan shayámun!

27Yaskirnam Juan nerqan: —Manam nuna pwedintsu ni imatapis chaskita, syelupita mana qoshqa kaptenqa. 28Qamkunam testigú kayanki nenqáta: “Noqa manam Kristutsu ká”, sinowqa “peypa nowpanta kachamushqam”. 29Warmita katseqqa, qowam; qowapa amígun ládunchow keykaqqa, wiyarmi, kushikun allápa qowapa parleynimpita; tseynowmi key kushikiyni tinkurishqana. 30Presisanmi pey winanan i noqa takshayaná.

31Rarapita shamoqqa, llapantsikmanmi; patsapita kaqqa, patsapitam, i patsa kosastam parlan; syelupita shamoqqa, llapantsikmanmi. 32I rikashqanta i wiyashqanta, keytam willakun; i ni pí chaskintsu willakiyninta. 33Willakiyninta chaskeqqa, keyqa Dyos tseqeypa kanqantam parlan. 34Dyospa kachamushqanqa, Dyospa palabrantam parlan; Dyosqa Espiritunta manam tupíllapatsu qon. 35Teytaqa kuyanmi Tsurita, i llapan kosaskunatam qoshqa makinman. 36Tsuriman kreyeqkaqqa wiñey kawéyoqmi; peru Tsuriman mana kreyeqkaqqa manam kaweyta rikanqatsu, sinowqa Dyospa piñakiynin peychowmi.

Actualmente seleccionado:

JUAN 3: QUEAN

Destacar

Copiar