Matyu 2

Lipu Hatung Suxinganamdi Dila Lobu Rangua Yesu

1Maria hayau Yesu longga Betlehem wa probinsia Yudia mana bungina Xaitamoxi Herot. Kimuya, lipu hatung suxinganam teladi#2:1 lipu hatung suxinganam teladi—Lipuadi li lipu numanuma telamdi, saing dahatumia hatung kuboludinga dilibu sabalunia dahatanga baraxintadi bagula disok titia. titidinga wa Yudia karagia ba dima long sabangga Yerusalem, 2saing duxusunga ba, “Gara wa Yudadi xaitamoxidinga wa bi? Am gabagu hatunging hayauxingama#2:2 hatunging hayauxingama—Bungina dibagu hatung haunua ba sabalunia, dahatum ba xaitamoxi haun tela bauna hayau. bungina haing, saing am gama bu am gasabu mana.”

3Xaitamoxi Herot lungu haruanga baguba, baing hatum xumana. Yerusalem longgalo xauna dahatum xumana. 4Tauna, wagi lipu hananiangamdi yanamidingdi#2:4 lipu hananiangamdi yanamidingdi—Lipuadi ba lipudi dimuga mana lipudi Urana Numania long sabangga Yerusalem. digabu lipu hanaunaunga tubatubainganamdi dima. Dima digugunia, baing xusungadi ba, “Urana lipuxing suxunguxunguamdi dibaxanga ba Urana Lipuxing Mogunganama bauna bagula hayau bi?” 5Dahaxuya ba, “Longga Betlehem mana probinsia li Yudia, namua na Urana lipuxing suxunguxunguama Maika bung#2:5 Maika bung haruanga ba bila niani 700 muga mana Yesu hayauxinganoa. ba:

6“ ‘O longga Betlehem mana Yudia,

uwa long olang sibuna maluxuʼm Yudia te,

namua na yanam tela bagula sok sanguang,

bagula sok lipuxigu Isreldi lipuxiding wasanganama bila lipu tela wasa mana sipsipdi.’#Maika 5:2 ”

7Baing Herot sina haruanga na lipu hatung suxinganamdi hisangia, xusungadi ba dima rangua. Xusungadi saing xap xabianga mana bunging maringina dibagu hatunga muga. 8Soxidi mala longga Betlehem saing baladi ba, “Ala asai haringina mauli mana gara ba. Abagu laing sup baing agoxoya ma abala nga bu sanga ba ngamala ngasabu mana xauna!”

9Dilungu xaitamoxi haruanganoa laing sup, baing dilauba. Baing hatungga ba muga dibagu karagia, ina muga manadi laing wa mua etua mana longga gara ba wa mana. 10Bungina dibagu hatungga ba, gamodingdi diyaha sibuna ba! 11Disok numia, diluxu saing dibagu gara gabu bauna Maria, baing digung kiding tuxundi mari saing disabu mana. Saking daxaxa tangadingdi saing disina yahanga xaitamoxiamdi na. Disina gol, xai susung saminamdi xaung baxi tela duxu ba mer. 12Ne bungina dibo ba digoxoya mala titidingia, dinaxu daxanga xan tela, namua na Urana baladi haringina mibingia ba labu digoxoya mala rangua Herotku tai.

Digiti Mala Isip

13Dila masup baing Toxoratamona uleginam tela sok mana Yosep mibingia. Harua ba, “Umesa! Ugabu gara xaung bauna tung gagiti mala numanuma Isip. Awa la ba laing ngabalang ba sanga mana agoxoya ma, namua na Xaitamoxi Herot bagula sai mana garua bu ung mati.” 14Baing ina naga, Yosep mesa, xap gara bauna tang mana yambongga baguba, saing tung digiti mala numanuma Isip. 15Duwa la ba laing Herot mati. Ala baguli libu Toxoratamona haruanganoa aningona waleu lipuxing suxunguxunguama Hosea bung ba: “Ngawagi garagua ma sangua numanuma Isip.”#Hosea 11:1#2:15 Hosea bung haruanga li mana naxuya mana Urana xap Isreldi sangua numanuma Isip waleu sibuna baru. Baing mana bungina Yesu, xap ma sangua Isip bila Isreldi.

16Bungina Herot xabia ba lipu hatung suxinganamdi dituxu murak mana, atin disala buk. Baing soxi lipu haungingamdi mala longga Betlehem xaung longga duwa singia bu dung gara lupdi nianiding luwa saing hawa mati, namua na lipu hatung suxinganamdi dibala mana xaidapka dibagu hatungga sok muga ba. 17Kubolu diana li libu haruanga aningona Urana lipuxing suxunguxunguama Yeremaya bung waleu ba:

18“Dilungu waxutu tela longga Rama—

tangtang saing hatangitangi sabanga.

Retsel#2:18 Retsel Yekop haininoa, saing Yuda bakbagiding longgalo mugangadinga. Bungina Retsel mati, dikimang longga Rama. Yudadi dibagu Retsel bila ding bauding. Mana haruanga li ina wa bila Yuda baundi dusinga sibuna namua na Xaitamoxi Herot lipuxing haungingamdi dung garading kambagindi mati. tangia garandi,

hauxana mana lipudi ditatua atindi,

namua na garandi disup ba.”#Yeremaya (Jeremaia) 31:15

Digoxoya Mala Nasaret

19Kimuya mana Herot mati, baing Toxoratamona uleginam tela sok mana Yosep mibingia Isip. 20Bala ba, “Umesa saing ugabu gara xaung bauna, tung gagoxoya mala numanuma Isrel, namua na lipudi dituba ba disahi gara ba walinganoa dimati masup.”

21Binabu mesa, xap gara bauna tang saing tung dila numanuma Isrel. 22Ne bungina lungu ba Akelias xap tibuna Herot yabanoa saing sok Yudia xaitamoxidinga, maxuwa mana ila bila ba. Baing Urana sina haruanga na mana mibinga tela, bala ba sanga ba wa titia Yudia te, nam mauxanganoa xap. Binabu diyunga dila titia Galili, 23duwa mana long tela duxu ba Nasaret. Alali libu haruanga aningona Urana lipuxing suxunguxunguam mugauamdi daharua mana Lipuxing Mogunganama ba: “Bagula duxu ba lipu Nasaretiam tela.”

Actualmente seleccionado:

Matyu 2: met

Destacar

Copiar