Jenesisi 3

Kuphonya kwa Munthu

1Tsono, nyoka ikhadacenjera kuposa bzamoyo bzense bzomwe Mbuya Mulungu adalenga. Ndipo iyo idabvunza mkazi ule kuti: “Mulungu adalewadi tenepa kuti: ‘Lekani kudya bzisapo bza muti uli-wentse mmunda muno?’ ”. 2Mkazi ule adatawira nyoka kuti: “Tingadye bzisapo bza miti yense ya mmundamu, 3tsono Mulungu adati: Lekani kudya muti omwe uli pakati pa munda, ngakhale kuukhuya, sabwa mungadzacitatenepo mun'dzafa”. 4Pamwepo nyoka idauza mkazi ule kuti: “Cadidi mun'dzafa lini! 5Mulungu an'dziwa kuti ntsiku yomwe mudzaudya, maso yanu yan'dzafunguka, ndipo imwe mun'dzakhala ninga Mulungu, mun'dzakhala adziwi wa bzabwino na bzakuipa”. 6Pomwe mkazi adawona kuti muti ule ukhadadeka kudya, na maonekedwe yabwino, ndipo wakufunika ucipasa udziwi, adaca bzisapo bzace acidya ndipo adapasambo mwamuna wace, acidyambo. 7Awiriwo maso yawo yadafunguka, ndipo adadziwa kuti ali pezi. Na terepo adasona masamba ya mkuyu acibvala. 8Pauwiri bwawo pomwe adabva fala na ntswata-tswata wa Mbuya Mulungu akhafamba-famba maulo dzuwa latapepa mmunda mule, iwo adacoka patsogolo pa Mbuya Mulungu acikabisala pakati pamiti. 9Ndipo Mbuya Mulungu adacemera mwamuna adambvundza kuti: “Kodi uli kuponi?” 10Ndipo iye adatawira kuti: “Ndabva kufamba kwanu mmunda ndipo ndakhala na mantha thangwe ndikhali pezi, ndipopo ndabisala”. 11Mulungu adamubvundza kuti: “Kodi mbani akuuza kuti uli pezi? Iwe wadya bzisapo bza muti omwe ndidakuletsa kudya?” 12Mwamuna, adatawira kuti: “Mkazi omwe mudandipasa ninga mkazi wangu iye wandipasa cisapo ca muti ndipo ine ndadya”. 13Mbuya Mulungu adabvunza mkazi kuti: “Niciani comwe wacitaci?” Mkazi adatawira kuti: “Nyoka ndiyo yandipumpsa ndipo ine ndadya”.

14Pamwepo Mulungu adauza nyoka kuti:

“Pakuti wacita bzimwebzi,

iwe wakutembereredwa

pakati pa bzifuwo na bzilombo bza mthengo bzentse.

Un'dzafamba na mimba yako,

ndipo cakudya cako cin'dzakhala pfumbi

ntsiku zense za moyo wako.

15Ndin'dzaikha udani pakati pa iwe na mkazi,

pan'dzakhala udani pakati pa wana wako na wana wace.

An'dzaswa msolo wako

ndipombo iwe un'dzaluma katende wace”.

16Kwa mkazi adati:

“Nindzathimizira kubonera kwako na mimba. Mwakubonera iwe un'dzabereka wana.

Kufuna kwako kundzakhala kwa mamuna wako ndipo iye an'dzakutonga”.

17Ndipo kwa mamuna adati:

“Pakuti iwe wabvera mkazi wako,

ndipo wadya cisapo

comwe ndidakuuza kuti uleke kudya,

Mataka yan'dzatembereredwe

thangwe la iwe. Iwepo un'dzadya mwakubonera ntsiku zentse za moyo wako.

18Iyo yan'dzabala minga na bzakumera bza mthengo.

Iwe un'dzadya bzakulima.

19Iwe Un'dzadya pau yako mwakucoka kaluma,

kufikira udzabwerere kumataka,

sabwa udacosiwa mwa iyo.

Thangwe iwe ndiwe pfumbi ndipo kupfumbi un'dzabwerera”.

20Adamu adapasa mkazi wace dzina lakuti Yeva, thangwe lakuti iye angadadzakhala mayi wa nthundu wentse wa wanthu. 21Mbuya Mulungu adakondza bzakubvala bza khanda aciwabvazika Adamu na mkazi wace.

22Pamwepo Mbuya Mulungu adati: “Tsapano munthu akhala ninga ife, ali kudziwa bzabwino na bzakuipa. Na tenepo, aleke kubvumizidwa kuti iye atengembo cisapo ca muti moyo acicidya ndipo acikhala na moyo wakusaya kumala”. 23Ndipopo Mbuya Mulungu adamthotha m'dimba mwa Edeni kuti alime mumataka momwe adacokera. 24Pomwe adandothotha Adamu, Mulungu adaikha anju zakukhalirira kumabvadzuwa kwa dimba la Edeni ndipo adaikha cisenga ca moto comwe cikhambazungulira, kukhalirira njira yakufika pamuti wa moyo.

Actualmente seleccionado:

Jenesisi 3: NYNT

Destacar

Copiar