Лукара йибкьыд Шадды Хабар 4
4
ГьӀаса на Иблис
1Илагьиед РухӀ ад ГьӀаса хъӀугъӀуре Иордандыыла. Хьели РухӀдире гыргара къума, 2гьади йогъцӀурды йыгъа Иблисере амзырбыр гьаъара Гьанийды. Гьа сиене йыгъырма ГьӀасара шешин луьъур адиший, эхир гаӀше йишири. 3Иблисере рухьура Минийде:
– Нагагь Вы Йинчид Дух йиъинехъун, гьихьяъ ми духлада, джукляа хьыв йиш хьур.
4– «Са хьываа эдеми ешемиш йишир йигаардиш», рухьура Диндид Дахьвдарара, – джываб хъывылцӀара ГьӀасара. 5Хьели Иблисере уула саъ садана гьагва гьаъара Гьанийс сиене дуьнйадид пагьӀчаалыгъбыр. – 6За гьеми сиъин пагьӀчаалыгъбыр, хазнабыр ки хъуна, вас выси, – рухьура Гьанийде иблисере. – 7Сиене гьабыр зас выр адбыр йиъи, задаа зас йигганийс выс йикиси. Икрам ви зас – сиене гьабыр Выдыбыр йиъи.
8– Диндид Дахьвдарара рухьура, – джываб хъывылцӀара ГьӀасара:
«Са выды Йинчис икрам ви,
Са Гьанийды дур хакь».
9Гьа гедеэне иблисере гыргара Гьа Иерусалимди, лабгъура Йинчид Халды эрахьваа, хьели рухьура:
10– Нагагь Вы Йинчид Дух йиъинехъун, лийич мидаа саъ. Диндид Дахьвдарак кид шиви, Йинчире
«Джуды малаикмашде „Вы ухӀ“ хьур ад и»,
11са ки
«гьаммыра лаъ хылабырмыы лаӀхъӀаӀшуси Вы,
Выды хьеб духлак кидживкьын бадаана».
12– Гьухьур а: «Амзыр маъ Аллагьад, выды Йинчид», – джываб хъывылцӀара ГьӀасара.
13Иблисере, маа шыв хьусди джацӀыр, сагьӀалды гедеэне салтара Гьа.
14Илагьиед РухӀдид яхӀ йишир, хъӀугъӀуре ГьӀаса Галилеяди. Аа-уу ивилхьвара ГьӀасад суфат. 15Гьание хӀар даъара гьабишды синагогама, сиенебише ми йирзере.
Назарет-шегьердире ГьӀасад ихтилатбыр кьабыл гьыъырдиш
16ГьӀаса хьӀугъӀуре Назаретди (гьа шегьерди Гьа экке йишид и). Кишды йыгъа, мыс-га кал, руъура синагогади. 17Диндид Дахьвдар кьыле гьаъас хьур, Гьа лаъ лубзура. ГьӀасада вылцӀара Исайя-пайгъампарды кихьинбыр. Гъаъ лийир, гьабгура ГьӀасара мисед чӀелбыр кид джыгаа:
18«Илагьиед РухӀ гъа Заа
Зы Йинчире гьӀатир йывхӀыр, гьӀазыр гьыъыр а,
касибешис ваъас Шадды Хабар,
Гьание сигыд и Зы есирешис азадваӀлид хабар выс,
быркьӀыдбишис йаӀкв гьахъагусдидиклаа хабар выс,
Гьание сигыд и Зы лыкӀаӀр азад хъадаъас,
19Аллагьад рагьӀимдид вахт ливкьыр ад хабар ваъас».
20Гъигъе хъыъыр, ГьӀасара хъывыри кихьинбыр дибиреде, хьели аа сукьури. Синагогади адухъундыбишды улабыр ГьӀасахда сукур ай. 21ГьӀасара рухьура:
– Гъиигъа ваӀс «салатӀ йикиси» хьур адбыр салатӀ йишир а.
22Сиенебыр гьа чӀилмыы рази дишир, гьӀаламат гьаъара минийды гьакьаллы чӀилмыы. «Бес Гьа Йисухьды дух дишме?» – хулкарай гьабише.
23– ВаӀ гьухьуси ки гьамыъ Зада ихтилат: «ДжерахӀ, ва вы хъаъ», – рухьура мибишде ГьӀасара. – «Ес Капернаум-шегьерди йишидиклаа хабар виъи» хьур, «гьааса выды хыдыы ки гьаъ» хьуси. 24Дуьзене ваӀде рухьура: хыдис-магьӀлидис къадри вишид пайгъампар адиш, – рухьура ГьӀасара. – 25Гьадыыла саваайинди, Ильяс-пайгъампарад вахтинди бала хиндадыймар ай Израилди, хьибды сыда на сура гьугъалбыр джишийне не сиене дуьнйаады гаӀш либхьуйне дишир ад. 26Амма Ильяс-пайгъампар секки гьа хиндадыйяхда сигыр ад диший. – Сигыр ай гьа са хиндадыйхда Сидондид бейде хад Сарепта-шегьерди. 27Джузан дишидбыр ки бала ай Израилди Елисей-пайгъампарад вахтинди, амма даваа гьабишиклаа са Шамдаады Нааманыс выъыр ай.
28Ми чӀилмыд ун йишийне, синагогади ад эдемиер аджыгъламиш дишири. 29Ледчир, хъыджылкаӀре мибише ГьӀаса Назарет-шегьер гъад банад кӀеъэлыы, кьуляа саъ хаагъуси хьур ми. 30ГьӀаса, гьабишдаа хихъиирхьур, хъӀугъӀуре.
ГьӀасара шийтӀамашде хад хъыъыри
31ГьӀаса руъура Капернаумди, Галилеяди ад шегьерди. Кишды йыгъа Гьание хӀаӀаӀр даъара илсанар. 32Сиенебишис Гьание хӀаӀаӀр даъад услаа гьӀаламат руъурай – гьаасад яхӀ ай Гьанийды чӀилихда. 33Ай гьа синагогади са эдеми, шийтӀандире йыхӀыр ад, гьание гъигъене лал ваъара:
34– Гьей, вас еклаа шиви йигад, Назаретдаады ГьӀаса? Вас е белима эдес йигара ад име? Зас гьацӀара, Вы вышди. Вы Йинчид Уджагъли йиъи!
35Амма ГьӀасара мисе рухьура:
– Лал виш! Гъаъ игъивиъ гьанийдыы джандаа!
Синагогадид йыкьӀаӀ лука гьыъыр ти эдеми, иблис гьанийды джандаа гъаъ ихъвилчере, са хата ки джывыр. 36Сиъинбыр мат дишир гедылгара
– Ми шиви? Гьанийхда гьаасад гудж не яхӀ а, иблисеше ки Гьание гьаъ хьуд гьаъара, – рухьура илсанаше са-сынийде.
37Гьанийклаады ихтилатбыр аа-уу ибхьура.
38Синагогадаа руъура Гьа Симанды хала. Симанды гаӀнинис цӀай гьаъара едере ай. Гьанийдаа куьмег ягъӀаре халдыбише. 39Ми хьыдыныйды уула хьуъ йишир, ГьӀасара ядал секин хъаъара, хьели ядал сухъулгара. ГаӀнин лухъурзур лаъ, улихьде хьыв гирхьере каӀрубчӀура.
40Виригъ хӀуувгъуд геде, хӀаӀдиес, гьӀар джура ядал бейдебишик кидухъундыбыр едебыр хана дуруъура ГьӀасахда. ГьӀар еденийды кьулуу хыл гъӀыйхӀаӀ гьыъыр, Гьание хъадаъарай. 41Баладбишды джандаа иблисмар игъибхьурай, лалбыр гьаъара: «Вы Йинчид Дух и!» Амма ГьӀасара гьабыр гиихье хъаъарай, гьа ихтилат гьухьус джывыр: гьаммыс гьацӀарай Гьа Аллагьад Мусуд йиъид.
42ЙаӀкв йишийне, ГьӀаса шегьердаа гъаъ ахъӀагъӀуре, са кеэйид джигиди сулкара. Илсанашды гьӀараасатбыр сулкара Ми ахтармиш гьаъас. Ахъыгыйне, мибыр чалыш дуруъура сихъджигас. 43Амма Миние рухьура:
– Мадды шегьерма ки За Аллагьад ПагьӀчаалыгъаклаа хабар вихир йигара. Гьадид бадаана сигыр ад и Зы.
44Гьааса гьухьур, Гьа, хӀар даъара Иудеяди синагогамаа синагогама гыйгъӀаӀре.
Actualmente seleccionado:
Лукара йибкьыд Шадды Хабар 4: RUT
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© Библие мадды чӀилмыы хъывгад Институтара, 2004
