Лукара йибкьыд Шадды Хабар 2

ГьӀаса гьухуд йыгъ

1Гьа вахтинди Август-пагьӀчаагьад бииругъ йидкьыр ай, дуьни-дуьнйаадыы гъадухъунды илсанашды сиягь гьаъ хьур. 2Квириний Сириядид кьухьды йишидаа хъуъ гьа сахьусды сиягьбыр йиъий. 3Сиенебыр джвер сиягьма эдес дуруъура – гьӀар выдж гьухьуд шегьерди. 4Йисухь ки руъура – Назаретдид шегьер Галилеядаа Иудеяди, Вифлеем хьур дур гъад Давыдды шегьерди 5Йисухь Давыдды цихилдиклаады йиъий, гьанийды хыдылашиклаады. Гьа сиягьма иес руъура джуды сус Майрам ки хъуна. Гьа ухьне кий. 6Гьабыр Вифлеемди ад гедеэне, гьанийды рухуд вахт йибкьыри. 7Гьухура гьанийс джуды сахьусды дух. АркӀа гьыъыри гьание дух, хьели малмыд тӀына илхьере, гьис хьуйне мийманханыди гьабишис ер ывгыр адиший.

ХӀабаӀхъӀанер не малаикмар

8Гьа джигидаа цӀамна хырыда кал гий хӀабаӀхъӀанер, гьабыр чӀирыы ешемиш диъий, вышедыхъаъ мал ухӀуре ай. 9Садахьурка гьабишды уликлаа лаъ лувурзара Аллагьад малаик, ХӀалаа саъ нур лугъури гьабишды аа-уу. ХӀабаӀхъӀанешис гичӀ йывхӀыр, паӀрт дуруъура.

10Амма малаикере рухьура гьабишде:

– ГичӀ мываъ!

Зада ваӀс эккед хабар ха –

гьа эккед шадвалды виъи сиене выхьды халкьдис.

11Гъиигъа Давыдды шегьерди ихьды Азадчи гьухур а,

Ихьды Илагьи, Мусуд!

12ВаӀс гьа хъацӀасды лышан мисед йиъи:

ВаӀде тӀына кийир ад аркӀыд хыных агаси.

13Гьааса гьухьудка малаикед бейдаа лаъ сиене хӀаӀлды эскер-месгер лузури, мисе Аллагьахьде шукур ваъара:

14Шукур Йинчихьде!

Шукур Йинчихьде!

Ассалам Гьанийс хъывгад накьудис не илсанашис!

15Малаикмар хӀаӀле хъӀаадхӀыйне, хӀабаӀхъӀанеше рухьура са-сынийде: «Дыкьа Вифлеемди дуруъус, гадкъас, шивди гьади гьыъыр ад, гьидиклаады хабар виъиди Аллагьара ес сивигыд». 16Гьабыр телесыхана рыкъӀаӀ аӀчӀур, дыхьыр, гадкъыд – адылгара Майрам на Йисухь тӀына ад хынхыхьван. 17Дукар гьагуйне, хӀабаӀхъӀанеше ихтилат гьаъара, малаикере джвершде шыв хьурди. 18Сиене хъадабцубишис гьӀаламат руъура хӀабаӀхъӀанешды ихтилатаа. 19Майрама хьуйне сиене йикӀе ухӀуре, гьадиклаа фикир ваъара.

20ХӀабаӀхъӀанер хъуьдуьргъуьр, хъӀудире, Йинчихьде джвершис гьагудмыхъаъ на ун хъӀыхӀыдмыхъаъ шукур ваъара: сиъин карбыр малаикере джвершде гьухьуд кал йишир ай.

21Мыйды йыгъаала, хыных суннат гьыъыр йыгад вахт ливкьыйне, Гьанийис вылцӀара дур ГьӀаса – малаикере гьанийыы выдж ухьне марана лихьид дур.

22Мыса-пайгъампарад Къаанундире рухьуд кал, Майрамды на Йисухьды тӀагьарат хъаъад вахт ливкьыйне, гьабише дукар Иерусалимди гыргара, гьа Йинчис гъарсас хьур. 23Гьис хьуйне, Йинчид Къаанундик кини и: «ГьӀар сахьусды выггылды хыных Йинчис гъарсын лазим йиъи», 24са ки садакьа гьыъын бадаана «я кьӀваӀб тыртыр, я кьӀваӀб мукӀды лирхьв» Йинчид Къаанундик кид кал.

Симана ГьӀасас йикисдиклаа ихтилат гьаъара

25Ай гьа гедеэне Иерусалимди Симан хьур дур гъад эдеми, гьа эдеми бала темизды на уджагъли кас йиъий, Израилдис азадвалды гуьзет ваъара ад. Ай гьанийде Илагьиед РухӀ. 26Симанда Илагьиед РухӀдире гьухьур ай, выдж таа Аллагьара сигыд кас гьабгумаа йикьисдиш хьур. 27РухӀдире хьура лийир, руъура ми Йинчид Хала. Гьадиъ дид не нин дукар ГьӀаса хана йидкьыйне, гьанийыы уу Къаанундире рухьуд гвалахбыр гьаъас хьур, 28Симана хыных хыле лешур, Йинчихьде шукурбыр гьаъара:

29– Гьамыъ Ва зы архыйинне сихъигаси,

Зы, выды къаривыш, дуьнйадид Иесси Аллагь.

Ва выды чӀел кьуле выгыр а:

30изды улабас гьагур а Ми, Ва

31Азадчи йиъи хьур яратмиш гьыъыр ад

сиене халкьбыр бадаана, –

32Гьа кафирешик кагъусды йаӀкв йиъи,

Гьа Израилдид халкьдид Нур йиъи.

33Хынхыд дид ки, нин ки Симана ГьӀасаклаа рухьудмыхда гьӀаламат йишир хъадабцура. 34Симана рухсат выри гьабишис, нин Майрамда ки гьухьури мисе:

– Тини Гид гьай, гьанийды бадаана баладбыр Израилди луьдкеси, баладбыр луьздеси 35(выды ил ки турура кал кьатӀ йикиси). Гьа Аллагьад лышан йикисды йиъи, гьанийды хьураа лаъ баладбыр луьздес чалыш дикиси, гьааса джухьды йикӀима ад писды наятбыр ашгара гьаъара.

36Ай гьа джигиди хьвалчи Анна, Фануилды рыш, Ашер хьур тухумдиклаады. Гьа лап кьӀаӀсды риъий. Йывыд сен выгглихьван лидхьур, 37гьа хиндадый риширий, хиндадыйне гьание лийир ай мыйцӀыр на юкьуд сен. Гьа садаки Илагьиед халаа гъаъ руръуд диший, йыгъа-выше Йинчис къуллух ваъара кубахьван на дугьӀамыхьван. 38Ми гедеэне гьа ки йиркьыри мибишды бегеде, Йинчихьде шукур ваъара. Сиене Иерусалимдис азадвалды выгара адбишис гьание дукракляа ихтилат гьаъара ай.

ГьӀасад хыныхвалды

39Аллагьад Къаанундире рухьудбыр сиене гьыъыр, мибыр хъӀудире Галилеяди, джухьды Назарет-шегьерди. 40Хыных гьакьалдид иессине кьухьа руъура ай. Гьанийыы Йинчид салам гъай.

41ГьӀар сыда ГьӀасад дид не нин Иерусалимди Пасха рухьуд байрамак дуруъурай. 42Гьанийды цӀыкьӀваӀд сен атӀуйне, гьабыр мыс-га кал, байрамак дыхьыри. 43Байрамаала хъуъ джвер хала хъӀудире, ГьӀаса Иерусалимди алгара. 44Дидис не нинис Гьа марад хабар адиший, дирхьара адбишик кид калагур, хьели Гьа ахтармиш гьаъара каӀчӀури къумшийшды на бейдедбишды арыдаа. 45Ахъджыгыр, гьабыр Иерусалимди хъӀудире, гьади ахтармиш гьаъара кадгъӀуре. 46Ахъылгара Гьа хьибды йыгъаала Илагьиед халаа. Гьа магьӀалимешды арыди сукьур ай, гьабишихда хъабцура, суалбыр вылцӀара. 47Гьанийды ун йишид сиенебишис гьӀаламат руъурай Гьанийды гьакьалдыы на джывабырмыы. 48Дид не нин, Гьа гьагуйне, мат дишири. Нине рухьура Гьанийде:

– Гьай дух, Ва гьис ес мисе гьыъыри? Гьабгурама, шудаъ хаджалат кывыр ади Ва выды дидис не зас, выды джыбра идхьур?

49– ВаӀ гьидис изды джыбра йидкьыдбыр диъи? – хулкара Гьание. – Бес ваӀс Зы Изды Дидды хала йикисды гьацӀаардишийме?

50Амма дид не нин гедылкьаардиш Гьанийды джывабахьде. 51ГьӀаса хъӀугъӀуре гьабишихьван Назаретди, гьадыыла хъуъ мыс-га гьабишихда хъабцура. Нине ми сиенебыр йикӀыы халкьара. 52ГьӀаса кьухьа руъура, джухьван джуды гьакьал ки бала вуруъура ай. Илсанашды на Йинчид суруула Гьанийис гьӀурмет ки бала вуруъура ай.

Actualmente seleccionado:

Лукара йибкьыд Шадды Хабар 2: RUT

Destacar

Copiar