Lukas 3
3
Àjàŋ mə Jɔn Ŋ̀gàŋmùrə bə̀ a ŋkì à lɛ sɨ swoŋ annù Nwî aà
(Mt. 3.1-12; Mk. 1.1-8; Jn. 1.19-28)
1À lɛ mbə nɨ̂ ɨ̀lòò jìi mə ɨ lɛ nyweꞌe nɨghûm ǹtsò ǹtaà a noò yìi mə Tiberias à lɛ mbə Kaisa aa, Pontius Pilate a bə Gumnaa a Yudea, Herod a saꞌà nɨ̂ Galilea, mumaà yi Philip a saꞌà nɨ̀ Ituria, nɨ Trachonitis Lysanias a saꞌà nɨ̀ Abilene, 2Annas bo Kaifas bə̂ ŋ̀gǎŋmàꞌa Nwì jî wè; nɨ̀ghàà nɨ Nwî nɨ lɛ nzì a mbo Jɔn mu Zecharias a ntaꞌa mɨwɛ̀ɛ̀ mɨwɛ̀ɛ̀, 3a tɨgə̀ ŋ̀karə ɨbuꞌù ɨtoò tsɨ̀m jìi ɨ lɛ ntswe a Jordan aa, ǹswoŋə nɨ mə tâ bə̀ bəŋkə mɨ̂ntɨɨ̀ myaa, ŋkwɛrə ŋkì tâ bɨ̀ liꞌinə ɨfansənnù jyaa. 4À lɛ sɨ ghɨ̀rə̀ ma laà a bə aa ajàŋ yìi mə bɨ ŋwaꞌanə a mûm àŋwàꞌànə ŋgàŋntoò Nwì Yesiah aa mə,
“Ǹjì ŋù ɨ tɔŋnə nɨ a ntaꞌa mɨwɛ̀ɛ̀ mɨwɛ̀ɛ̀ ǹswoŋə nɨ mə,
‘Nɨ̀ naŋsə a mânjì M̀màꞌàmbi,
ǹnaŋsə ɨyaà ji tâ ɨ̀ tsinə,
5Nwì à ka tsɨrə ɨdɨgə mɨbɔrə ɨ̀ tsɨ̀m,
ɨ kɨɨ sɨgɨsə mɨntaꞌa mì wə̀ bo bɨ̀ mì kə̀gə mɨ̀tsɨ̀m,
ɨ ghɨ̀rə tâ ɨ̀dɨ̀gə̀ jî ŋɔ̀rɨ̀kə̌ tsɨ̀m tâ ɨ̀ tsinə.
Ɨ lwensə mɨbɨrə mɨ̀tsɨ̀m tâ mânjì à laanə.
6Tâ mu ŋǔ ntsɨ̀m tâ à yə ajàŋ mə Nwì a yweensə bə̂ aà.’ ”#Yes. 40.3-5
7Ǹnɔ̀ɔ̀ bə̂ yî ghàꞌàtə̀ ɨ lɛ sɨ zì a Jordan mə tâ Jɔn à murə waa a ŋkì. A swoŋ a mbo bo mə, “Bù bɔɔ bɨ nô, a ghuu aa a wàꞌàsə wò mə tâ nɨ̀ khə alwintɔŋə Nwî yìi mə a zì aa ɛ? 8Tâ nɨ̀ ka ŋkoonə mɨ̂ntà mìi mə mɨ dɨ̀ꞌɨ mə nɨ̀ bə̀ŋkə̀ mə̂ mɨ̂ntɨɨ̀ muu mmaꞌatə ɨbɨ̂ ghuu. Ǹtsuu ɨ kɨ swoŋə nɨ mə, ‘Taà yìꞌì à nɨ aa Abraham’. Mə̀ swoŋ a mbo bù mə Nwì à zî àjàŋ mə mbə yu bəŋkə̀ ŋ̀gɔ̀ꞌɔ̀ jû ɨ tɨgə̀ m̀bə bɔɔ bɨ Abraham. 9Tsiꞌì tsɨ̀tsɔ̀ŋ wa bɨ nɔ̀ŋsə̀ mə̂ ǹjàà ǹlɔɔ nɨ̂ ŋ̀wâ ɨtì ghu tsiꞌǐ mɨ̂ŋgàŋ! Ɨ̀tǐ tsɨ̀m jìi mə kaa ɨ sɨ mɨ̂ntà mî sɨgɨ̀nə̀ koonə aa, bɨ ka wǎ mmàꞌa a mɔꞌɔ tâ ɨ̀ khɨ.”
10Ǹnɔ̀ɔ̀ bə̂ wa ɨ betə̀ yi mə, “Bìꞌì ka tɨgə ghɨ̀rə̀ aa mə akə aa ɛ?”
11A kwiꞌi a mbo bo mə, “Ŋù yìi mə à tswe nɨ ɨ̀tsə̀ꞌə̀ ji baa aa, tâ à fa yî mɔꞌɔ a mbo ŋù yìi mə kaa à sɨ̀ nɨ̂ yi tswê aà. Ŋù yìi à kɨ ntswe nɨ mɨ̀jɨ aa, tâ à ka nyatə a mbo bə̀.”
12Ŋ̀gǎŋkwɛrə tax ɨ lɛ ŋkɨ nzi mə bɨ̀ murə waa a ŋkì, m̀betə yi mə, “Ǹdɨ̀ꞌɨ̀nnù, bìꞌì ghɨrə yìꞌi ŋgaa mə akə lɛ?”
13A kwiꞌi a mbo bo mə, “Nɨ̀ ka ŋkwɛrə tsiꞌì àyoo yìi nɨ̀ tswe nɨ̂ ŋ̀kwɛ̀rə aa, ǹtsuu kɨ kwɛrə ɨ tsyà.” 14Bɨ̀sogyɛ̀ lɛ ŋkɨ mbetə yi mə, “Ŋ̀gaà yìꞌì ɨ̀ bə la aa ɛ? Bìꞌì ka ghɨ̀rə mə akə aa ɛ?”
A kwiꞌi a mbo bo mə, “Nɨ̀ tsuu njoo bə̂ nɨ fɨ̀kɔ̀rə̀ ɨ kɨ twɛɛ kwɛrə. Ǹtsuu ɨbaŋnənnù a atu bə̀ kɨ tswɛɛ, ɨ kwɛrə nɨ̂ ǹjoò jyaa, ŋ̀kɨ mbeentə mə ŋ̀kabə yìi mə bɨ tu ghuu ghu aa ɨ̀ kùꞌùnə̂.”
15Àjàŋ mə bə̀ bya bɨ lɛ sɨ waꞌatə mə ànnù yî wè yî mɔꞌɔ a ka fɛ̀ꞌɛ̀ aa, bo bɨ̀tsɨ̀m lɛ sɨ tɨgə mbetə nɨ̂ ɨ̀betə̀ ǹloŋ ŋgaa Jɔn mə à laà m̀bə yu mbə Ayɔꞌɔ̀ Nwì wa aa ɛ? 16Jɔn a fâ àkwiꞌi a mbo bo bɨtsɨ̀m mə, “Mə̀ murə ghuu aa a ŋkì, lâ ŋù yì mɔ̀ꞌɔ à tswe ghu yìi mə a yòŋə a njɨ̌m mə, à kɔ̀ꞌɔ̀nə ntsyà gha, kaa mə̀ tɛꞌɛ̀ kɨꞌɨ̀ kùꞌùnə̀ mə mbə mə̀ fɛɛ̀ mɨ̀ŋkɨ̀rə̀ mɨ ntâm mi bə̂. À ka yǐ kɨ murə ghuu aa a mûm Àzwì bo bɨ̀ a mum mɔꞌɔ. 17Àyoo nsəgə mɨ̀sàŋ a tswe ghu abo, à ka səgə mɨ̂sàŋ mya ɨ tii ntsàꞌa tsɨ̀m fiꞌisə ɨ tɨgə ghotə mɨsàŋ mya a mûm àta yu, ɨ bàŋnə tɔɔ ntsàꞌà jya a nɨ mɔꞌɔ yìi mə ɨ khɨ kaa waꞌà m̀mɛ̀ aà.”
18Ma mùu ajàŋ Jɔn à lɛ sɨ dɨꞌɨtə waa nɨ bɨ̀mânjì bî ghàꞌàtə̀ ǹswoŋə nɨ̂ ǹtoo yì ǹsɨgɨ̀nə̀ ya a mbo bə̀. 19Lâ, Jɔn à lɛ ŋghààntə Herod yìi à lɛ mbə Gûmnàà aa nloŋ mə à lɛ ŋkwɛrə Herodias, ŋgwɛ̂ ǹdɨ̂m yì, ŋ̀kɨ ŋghɨrə ɨnnù jî bɨ jì ghàꞌàtə̀ jî mɔꞌɔ̀. 20Herod a kuꞌùsə̀ m̀bu ŋghɨ̀rə̀ bə̂ ànnù yî tɨ̀nsə̀, ǹtswa Jɔn m̀fɨɨ a ndâtsaŋə̀.
Àjàŋ yìi mə bɨ lɛ mmurə Yesu a ŋkì aà
(Mt. 3.13-17; Mk. 1.9-11)
21Nòò yìi mə bɨ lɛ murə bə̀ bɨtsɨ̀m a ŋkì aa, Yesu à lɛ ŋkɨ nzi bɨ murə̀ yi a ŋkì. Bɨ mùrə̀ mə̂ yi a kâ ǹtsaꞌatə Nwî, àbùrə̀ a ŋaꞌanə̀. 22Àzwì Nwî a lô a aburə nsɨgə ntəə ghu atu mbə tsǒ bugɨrəmɨ̀kuù. Ǹjì ɨ lô a aburə ŋghaa nswoŋ mə, “Ò nɨ mû ghà yî m̀bàŋnə̀ yìi mə mə̀ kɔ̀ŋə aà, mə naŋsə ndorɨtə nloŋə ghô.”
Ŋ̀kàŋətsə Kristo
(Mt. 1.1-17)
23Yesu à lɛ ŋka nlɔgɨnə ɨfàꞌà yi aa boŋ à bə̀ mə̂ ɨ̀lòò mɨghum mi ntarə̀, bə̀ waꞌatə̀ nɨ mə à nɨ mu Joseph yìi mə
à lɛ mbə mu Heli.
24A bə mu Matthat,
a bə mu Levi, a bə yì Melchi,
mbə yî Janni, mbə yî Joseph.
25A kɨ̂ mbə yî Mattias, a bə yì Amos,
mbə yî Nahum, yìi à lɛ mbə mu Esli,
mbə yî Naggai,
26a bə mu Maaf,
a bə mu Mattathias, mbə mu Semein,
mbə yî Josech, mbə yî Joda,
27a bə mu Joanan, mbə yî Rhesa
ŋkɨ mbə mu Zerubabel, mbə mu shealtiel,
mbə mu Neri,
28mbə yî Melchi,
mbə yî Addi, mbə yî Cosan,
mbə yî Elmadam, mbə yî Er,
29mbə yî Joshua, mbə yî Eliezer,
mbə mu Jorim, mbə mu Matthat
mbə mu Levi,
30a bə yì Simeon,
mu Yuda, mu Joseph,
mu Jonam, mu Eliakim,
31a bə mu Melea, a bə yì Menna,
a bə yì Mattatha, mbə mu Nathan,
mbə mu David
32a bə mu Jesse,
mbə mu Obed, mbə mu Boas,
mbə mu Sala, mbə mu Nahshon
33mbə mu Amminadab, mbə mu Admin, mbə yî Arni,
mbə yî Hezron, mbə mu Perez,
mbə mu Yuda
34mbə mu Yakob,
mbə mu Isaac, mbə mu Abraham,
mbə mu Terah, mbə yî Naho,
35a bə mu Serug, mbə mu Reu,
mbə mu Peleg, mbə mu Eber,
ŋkɨ mbə mu shela,
36mbə mu Cainan,
mbə mu Arfaxad, mbə mu Shem,
mbə mu Noah, mbə mu Lamech,
37a bə mu Methuselah, mbə mu Enoch,
mbə mu Jard, mbə mu Mahalaleel,
mbə mu Cainan,
38a bə mu Enos,
mbə mu Seth, mbə mu Adam,
Mbə mu Nwì.
Actualmente seleccionado:
Lukas 3: BFD
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 1999, Wycliffe Bible Translators, Inc. All rights reserved.
