Эклц 11

Вавилона бәәшң

1Нарт-делкәд негхн келн болн негхн үг бәәҗ. 2Әмтн дорд үзгәс Шинарин талвңд ирәд, тенд бәәрлнә.

3Тедн нег-негндән келнә:

– Тоосх кей, терүгән сәәнәр шатахмн.

Чолуна ормд тоосх, дотлын урсхлын ормд салм олзлв. 4Дәкәд тедн келв:

– Теңгрт күрдг бәәшңтә балһс бийдән тосхий. Тиигҗ нерән һарһад, цуг делкәд геедрәд йовҗ оддгоһар кехмн.

5Әмтнә тосхҗах балһс болн бәәшң хәләхәр Деед Эзн бууҗ ирәд 6иигҗ келнә:

– Цуг әмтн нег улс, тедн негхн келтә; тегәд ода сансн зураһасн теднд эс күцәх юмн мел уга. 7Буухмн. Тедн нег-негән медҗ чаддгоһар, Бидн теднә келинь хутхулхмн.

8Деед Эзн тедниг тендәс орчлңгар тарана. Тер балһсна тосхлтан тедн зогсана. 9Эн учр деерәс тер балһсн Вавилон#11:9 Вавилон – эн нерн әәһәрн «хутхх, ниилүлх, хольх» гидг еврей келнә үгин бәәдлтә. гиҗ нерәдгднә. Деед Эзн тенд цуг делкән кел хутхв. Тедниг Деед Эзн тендәс цуг һазрар тарав.

Шемәс Абрам күртл

10Шемин уңг-тохм эн.

Усна аюлын хөөн хойр җил болад, Арпакшад көвүн төрхд Шем 100 наста билә. 11Арпакшад төрснә хөөн Шем 500 җилдән әмд йовв. Эн бас көвүдтә, күүкдтә билә.

12Арпакшадыг 35 болхлань, терүнәс Шелах төрв. 13Шелах төрснә хөөн Арпакшад 403 җилдән бәәв. Эн бас көвүдтә, күүкдтә билә.

14Шелах 30 нас күрхлә, терүнәс Эвер төрв. 15Эвер төрснә хөөн Шелах 403 җилдән бәәв. Эн бас көвүдтә, күүкдтә билә.

16Эверин 34 наснднь Пелег төрв. 17Пелегиг төрснә хөөн Эвер 430 җилдән бәәв. Эн бас көвүдтә, күүкдтә билә.

18Пелегиг 30 настаднь Реу төрв. 19Реуг төрснә хөөн Пелег 209 җилдән бәәв. Эн бас көвүдтә, күүкдтә билә.

20Реуг 32 настаднь Серуг төрв. 21Серугиг төрснә хөөн Реу 207 җилдән бәәв. Эн бас көвүдтә, күүкдтә билә.

22Серугиг 30 настаднь Нахор төрв. 23Нахориг төрснә хөөн Серуг 200 җилдән әмд йовв. Эн бас көвүдтә, күүкдтә билә.

24Нахориг 29 күрхлә, Тарах төрв. 25Тарахиг төрснә хөөн Нахор 119 җилдән әмд йовв. Эн бас көвүдтә, күүкдтә билә.

26Тарах 70 нас наслсна хөөн терүнәс Абрам, Нахор болн Харан төрв.

27Тарахин уңг-тохм эн: Тарахас Абрам, Нахор болн Харан төрв. Харанас Лот төрв. 28Харана эцк Тарах әмд бәәһә бәәтл, Харан Халдейин һазрин төрсн Ур гидг балһсндан өңгрв. 29Абрам болн Нахор бийдән гергд авцхана. Абрамин гергнә нерн Сара. Нахорин гергнә нерн Милка. Милка Харана күүкн. Харан Милкин болн Искан эцк. 30Сара үр эс һарһсндан күүкд уга билә.

31Тарах Абрам көвүһән, эврәннь ачан, Харана көвүн Лотыг, Сара берән – Абрамин гергиг дахулад, теднлә хамдан Халдейин һазрин Ур балһснас һарад Канана һазр орна. Тедн Харран балһснд күрәд бүүрлнә. 32Тарах 205 җилдән бәәһәд, Харран балһснд өңгрнә.

Actualmente seleccionado:

Эклц 11: ХКО_ӘБ

Destacar

Copiar