Nikamowina 71
71
kēhtē-aya otayamihāwin
1hāw, kā‑tipēyihcikēyan, kiya kā‑nātāmototātān;
ēkāya wīhkāc kita-sākōcihikawiyān!
2ayisk kiya ē‑kwayaskwātisiyan,
pimācihin mīna paspīhin;
natohtawin mīna pimācihin!
3mahti tipinawāskawin
tāpiskōc asinīwikamik ē‑sōhkahk kita-pimācihiyan,
kiya kā‑mamisītotātān
mīna kiya kā‑nātamawiyan.
4hāw, nikisē-manitōm, pimācihin aniki kā‑maci-ayisiyinīwicik ohci,
omaskawisīwiniwāhk ohci aniki kā‑kitimahiwēcik ēkwa kā‑macātisicik.
5kisē-manitow, kiya kā‑tipēyihcikēyan, kitaspēyimototātin;
aspin ohci ē‑awāsisīwiyān kimamisītotātin.
6kikī-mamisītotātin aspin ohci kā‑pē-pimātisiyān;
kiya ōma kā‑kī-kanawēyimiyan aspin ohci kā‑nihtāwikiyān.
tāpitawi kika-mamihcimitin.
7mihcēt nipē-kiskinowāpamikwak,
ayisk kiya ē‑pē-sōhki-nātamawiyan.
8kapē-kīsik kimamihcimitin
mīna niwīhtēn iyikohk ē‑ispāhkēyihtākosiyan.
9ēkāya ātawēyimin ēkwa kā‑kēhtē-ayiwiyān;
ēkāya nakasin kā‑nēsowātisiyān.
10aniki kā‑pakwāsicik nimaci-āyimōmikwak
ēkwa miskwēyihtamwak tānisi ē‑wī-isi-nipahicik.
11ōmisi itwēwak, “kisē-manitowa kī‑wēpinik;
namōya awiya kita-nātamāk.
hāw, nawaswātāk, otinātāk.”
12hāw, kisē-manitow, ēkāya wāhyaw ohcīstawin;
nikisē-manitōm, kiyipa, pē‑wīcihin!
13kiyām aniki kā‑mōskīstawicik kita-sākōcihāwak
mīna kita-misiwanācihāwak.
kiyām aniki kā‑kakwē-māyi-tōtawicik
kita-nēpēwisiwak mīna kita-misihowak.
14māka niya tāpitawi kika-mamisītotātin;
ahpō ayiwāk kika-mamihcimitin.
15nika-wīhtēn kimiyo-tōtamowina;
kapē-kīsik nika-wīhtēn kipimācihiwēwin,
āta namōya nikī-nisitohtēn iyikohk ē‑akihcikātēki kimiyo-tōtamowina.
16nika-kiskinohtahikon osōhkātisiwin kā‑tipēyihcikēt kisē-manitow;
kika-mamihcimitin kwayask kiya piko ē‑miyo-tōtawacik kitiyinīmak.
17aspin ohci ē‑awāsisīwiyān kikī-kiskinohamawin,
kēyāpic niwīhtēn kimamāhtāwi-tōtamowina.
18hāw, kisē-manitow, ēkwa ōma ē‑kēhtē-ayiwiyān ē‑wāpistikwānēyān
ēkāya pakitēyimin!
wīcēwin mēkwāc kā‑wīhtamawakik
kisōhkātisiwin ohci mīna kimaskawisīwin
aniki āniskē kā‑wī-nihtāwikicik.
19hāw, kisē-manitow, kikwayaskwātisiwin ispāhkēyihtākwan,
kikī-tōtēn kihci-kīkwaya;
awīna ta‑kī-naspitāsk?
20kikī-pē-itisahamawin nayēhtāwipayiwina mīna māyipayiwina,
māka kiwī-tāpastamawin nimaskawātisiwin;
ēkāya ta‑pōni-pimātisiyān.
21awasimē kika-miyin kistēyihtākosiwin;
kīhtwām kika-kākīcihin.
22kika-mamihcimitin kitohcikanihk;
kika-mamihcimitin kimamisītotawātisiwinihk ohci, nikisē-manitōm.
nikitohcikanihk kika-kitohcikēstamātin,
kiya kā‑kanātisiyan, Israelīwiyiniwak omanitōmiwāwa.
23kitohcikēyāni nika-tēpwān ē‑miyawātamān;
ē‑isi-kaskihtāyān nika-nikamon
ayisk kikī-pimācihin.
24kapē-kīsik nika-wīhtēn kikwayaskwātisiwin,
ayisk aniki kā‑kī-kakwē-māyi-tōtawicik
kī‑sākōcihāwak mīna kī‑nēpēwihāwak.
Actualmente seleccionado:
Nikamowina 71: PCSBR
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Plains Cree Ruth © 2004 Canadian Bible Society
Plains Cree Psalms (collection) © 2013 Canadian Bible Society
Plains Cree James © 2014 Canadian Bible Society
Plains Cree Gospels and Acts © 2018 Canadian Bible Society
