Mak 14

Kusɔliɔ baka ba bɛnya si biaye Yesu

1Agi ɛgɔ ewe taʋa tɔ Yudanɛ ma baŋa ba Kutseolidɔzawe le ni Aklãmɔnyasi na liwe le e. Kusumu yo baka ba ni ɔsã nɔ badɔbasɛ ba bɛzɛpɛ kudeonu si beevu Yesu ní kikpokpo me e gani kunɔmeno me tɔ beye ye e. 2Pɔ̀ lɛ bɛsi isu ya si, “Kudi lɛ aʋa si kukíbitɛ lɛ ní liwe le me e. Xe aní nite e, keduyɔyɔ kiaba, kɔ ozi eku i.”

Ɔdzɛ ɔtɔ abali kumu flafla ní Yesu aʋa ní Betania

3Yesu eze ní Simon, gi anya kunya kyikyĩ yɔ edi i, yɛ kepea mɛ ní Betania. Gi azɛɛŋa bidɔ mɛ ɛ, ɔdzɛ ɔtɔ aba nì kumu flafla gi kwizɛ ní alabasta keʋe me e. Kumu yɔ gi bɛbitɛ ni ose ɔtɔ gi bizɛɛxwa si nad i, kwiŋa kedzi. Adra keʋea lɛ akɔ kumu yɔ abali akpɛ ní Yesu yɛ litukpo le me e. 4Banɔ batɔ bezè niklɔ gi bɛmɔ kusuyeʋi i; lɛ bɛsi ba ahanuglɔ ba si, “Ege lɛ loso ɔdzɛ liɛ ezizi kumu flafla liɔ te e? 5Biatani kɔ kudà gi kibɔɛ kiasani kibɔ silva alafa tiata gi biakɔ kɛ ɔki bepiplinete ba ɛ.” Nite si bebu ɔdzɛɛ lipɔ ni kusuyeʋi.

6Pɔ̀ Yesu asi ba si, “Mlayurɔ yɛ ɛ! Ege lɛ loso mlɛkpɛ yɛ kunugu yo te e? Kidiliɛ gi abitɛ akí mɛ ɛ, kidɔ gbã gi kiŋa kedzi kinu u. 7Bepiplinete ba balɛ ní mlɔ kusi lipoe kakaa; lɛ mlaatani ba kupɔnɔ lipoe kakaa gi mlɛpɛ́ ɛ. Mɛ kɔ ɛ, mátraze ni mlɔ su lipoe kakaa a. 8Abitɛ kidiliɛ gi aatani aki mɛ ɛ; abali kumu flaflaa ní mɛ aʋa gi akɔ alulɔ mɛ kisugyaɛ kpɛ ɔtɔ akí mɛ kuviveo. 9Lɛ mɛɛsi mlɔ anukwarɛɛ si, ɔkɔ kakaa gi biapani Liboe Gbã nɛ ní kelea petee me e, biabu ɔdzɛ liɛ yɛ kiboebitɛɛ kubasɛ gi biakɔ zɛplɛ aŋu ní yɛ aʋa a.”

Yuda adimɛ si yɛ akpɛ Yesu awla

10Lɛ kede e, Yuda Iskariot, gi onu Yesu yɛ badɔkpasi liɔfɔ ni tiaʋa ba mɛ tole e, atrɛ ní kusumu yo baka ʋidi ba klɔ si yizɛɛkpɛ Yesu awla ɛki ba a. 11Isami iku ba gi benu liboe le e, lɛ bɛki yɛ kakaplɛ si biaki yɛ kibɔ ɔ. Lɛ loso Yuda azɛapɛ kudeonu si tɔ yibu Yesu ikɔ ɔ.

Yesu aŋa kutseolidɔzawe le bidɔ ni yɛ badɔkpasi ba

12Ní Aklãmɔnyasi na liwe tɔpu nɛ aʋa, gi lɛ bizeye kuʋesibi yo ɛki kutseolidɔzawe le ní Yudanɛ ma ligoʋi le onu i, Yesu yɛ badɔkpasi ba beʋi ye si, “Nifɔ wɔ̀pɛ si kuzɛɛbla akí wɔ kí kutseolidɔzawe le bidɔ ŋaŋa ʋɛ na a?”

13Lɛ loso Yesu akpɛ ba mɛ tiaʋa si: “Mlatrɛ ní ɔma ʋidi no me. Onyime ɔtɔ gi etu kenifukpo e, aatsa ni mlɔ ɔ. 14Mleku ni yɛ kude atrɛ ní kepea lia klɔ mɛ gi aatiku i, tɔ mlasi kepea ɔkaɛ si, ‘Ɔdɔbasɛ yɛ si, nifɔ onu ligba ɛlɛ klɔ mɛ gi mɛ ni mɛ badɔkpasi ba kwiaze e, xe kwiaŋa kutseolidɔzawe le bidɔ mɛ na a?’ 15Aabasɛ mlɔ lifune kugbake nene kutɔ, gi bɛbla a, xe bɛlulɔ ɛplɛ ɛ. Mlakpɛ kidɔ kakaa likpɔ aplɛ níklɔ akí blɔ ɔ.”

16Badɔkpasi ba bɛsɛ ɛtrɛ ní ɔma ʋidi no me e, lɛ bɛzɛmɔ kidɔ kakaa ŋwisi kiliɛ ɖii gi Yesu asi ba kinɛ ɛ. Lɛ bekyi awla ní Kutseolidɔzawe le bidɔ ŋaŋa ʋɛ su i.

17Agi kulagɔɔ kwina ɛ, Yesu aba ni yɛ badɔkpasi liɔfɔ ni tiaʋa ba. 18Gi bɛzɛŋa bidɔ mɛ ɛ, Yesu asi ba si, “Mɛɛsi mlɔ anukwarɛɛ si, mlɔ mɛ tole gi ɛɛŋa bidɔ mɛ nì mɛ ɛ, atrákpɛ mɛ ní awla a.”

19Liboe le lisugu badɔkpasi ba. Niteme si bekpese yɛ kuʋí tole tole, si, “Mɛ loo? Máka lɛ aʋa si mɛ ɛ!”

20Lɛ Yesu ebu lɛ onu si, “Litraze mlɔ liɔfɔ ni tiaʋa ba mɛ tole gi ɛɛkpɛ awla ní kezia mɛ ni mɛ ɛ. 21Ɔnɔɛ Yebi ye atrátse ŋwisi kiliɛ gi Aya yɛ liboe le lipani kinɛ ɛ. Pɔ̀ lianyani kí ɔniliɛ gi aakpɛ Ɔnɔɛ Yebi ye awla ɛ! Liapɛ ɔki ɔniliɛ klɔ sanɔ xegi báxa yɛ apɔ kura ɛ!”

Ɔkaɛ yɛ kuŋuplɛ bidɔŋaŋa

22Gi bɛzɛŋa bidɔ mɛ ɛ, Yesu akɔ liklã̀ nɛ, lɛ edo Aya ɖase ní lɛ aʋa xe ayaʋi lɛ ɛ. Lɛ akɔ lɛ aki yɛ badɔkpasi ba a, lɛ asi ba si, “Mlazi lɛ ata a! Mɛ kisugyaɛ kɛ ya a!”

23Lɛ kede e, akɔ kaŋwɛpliʋia lɛ edo Aya ɖase e, xe akɔ ka akpɛ ba awla ɛ. Lɛ ba pɔ́ bɛŋwɛ ní ka onu i. 24Yesu asi ba si, “Mɛ ika lɛ gi bɛbali ní banɔ glegle ba ligbã nɛ kuzɛɛzɛ lɛ ya a. Mɛ ika lɛ gi bɛkɔ ɛnya Aya yɛ kutrɔtrɔ onu lɛ ya a. 25Mɛɛsi mlɔ anukwarɛ si, mátraŋwɛ wain yɛ ebi yoyo la liwewe tɔɔ kɔna ni liwe lɛ klɔ gi maaŋwɛ wain vuvu yɛ ní Aya Kaʋaŋaa mɛ ɛ.”

26Lɛ kede e, gi bɛza ɔdzi tole e, bedo etrɛ ní Olif ye Lito le aʋa a.

Yesu edo aplɛ si Petro aanada si yete ye

27Lɛ Yesu asi ba si, “Mlɔ pɔ́ mlɛtrase eyurɔ mɛ lɛ ese linu si Aya liboe le liipani iplɛ si ‘Aya aaye ɔgagbanɔ yɛ, kɔ iʋesi le pɔ́ ise hle e.’ 28Pɔ̀ xe mayɔ adɔ ní bekpo ʋa mɛ ɛ, maaku mlɔ ɔtɔ trɛ ní Galilea.”

29Petro ebu le onu si, “Xegi banɔ gɔgɔ ba biase ní wɔ su fɛ ɛ, mɛ Petro kɔ ɛ, mátrase yurɔ wɔ liwewe e.”

30Yesu asi Petro si, “Mɛɛsi wɔ anukwarɛɛ si, xe ableke ɔkukɔ lɔ aamè kuʋlaa olezatɔ nɔ̀ ɛ, wɔanada tatá si wote me e.”

31Pɔ̀ Petro aŋwlɛ isu ya gaglaa sanɔ si, “Xegi lizĩa si mɛ ni wɔ kwiatse kyɛ ɛ, mátranada wɔ liwewe e.”

Badɔkpasi dzedze ba pɔ́ bɛpani liboe lɛklɔ ke e.

Yesu axwa Aya ní Getsemane abɔɔ yɛ mɛ

32Bɛtrɛ ní abɔɔtɔ mɛ gi bizɛxwa si Getsemane e, lɛ Yesu asi yɛ badɔkpasi ba si, “Mleze ní ya tɔ mɛ pɔ ɛ, mizɛɛxwa Aya.” 33Agbani Petro, Yakobo ni Yohanes apɔni isu ya. Axixa ní yɛ isu ya mɛ, lɛ ese linu si eku ní lipoe gagla mɛ ɛ. 34Lɛ asi ba si, “Mɛ ɔna nɔ ɛɛmɔ kuyeʋiyeʋi glegle gi míhatse e. Mleze ní ya tɔ mleze ni aŋu.”

35Agi aga atrɛ ní ɔtɔ nɔ taʋɛ ɛ, lɛ aŋwia isu ya asa kesea, lɛ axwa Aya si, xegi liaze yɛ kupɛ́pɛ ɛ tɔ ɔsriɖi kuyeʋiyeʋi yo ɔti ní yɛ aʋa a. 36Yesu axwa si, “Abba, Mɔka! Kidɔ kakaa kilí plɔplɔ ɛki wɔ. Ki tɔ kuyeʋiyeʋi yo kaŋwɛpliʋia lia kàdɔ mɛ ɔza. Pɔ̀ aní ní mɛ kupɛpɛɔ onu u, boŋu ní wɔ kupɛpɛɔ onu.”

37Lɛ edzi aba yɛ badɔkpasi tiata ba klɔ, pɔ̀ amɔ si bɛdɔ sra a. Lɛ eʋi Petro si, “Simon, sra wɔɛdɔ lò o? Kɔ wɔ́tani aŋu kuze ɔnyɔsasa tole kpoo na a?” 38Lɛ agba ba si, “Mleze ni aŋu atɔ mlaxwa Aya tɔ mlakíwɔli ku ní kufekedi me e. Ɔfuɛfuɛ nɔ ɛɛdimɛ, pɔ̀ kisugyaɛ kiibotsò o.”

39Asɛ dzɛ, lɛ azɛɛxwa Aya ni eboa la klɔ ké e. 40Agi edzi aba ní badɔkpasi ba klɔ ɛ, amɔ si bɛzɛdɔ sra dzɛ. Lɛ bátani isu ya onu kubu lɛ ese linu si sra sɛ sivu ba bimbi ʋe.

41Agi edzi aba kutanɛɔ ɛ, eʋi ba si, “Sra mlɛdɔ dzɛ ɛ, xe mlɛyɔ isu mɛ lo o? Lisrɛ! Ɔnyɔsasa nɔ ɛna! Mledi bɛkɔ Ɔnɔɛ Yebi ye kpɛ awla ɛki banɔ zimizi ba. 42Mlayɔ tɔ kusɛ. Ɔniliɛ gi ɛɛkpɛ mɛ awla ɛ, imɔ yɛ!”

Bevu Yesu

43Yesu azɛɛpani xe Yuda a, gi onu badɔkpasi ba mɛ tole e, aba edo o. Linɔkpi itɔ gi livu ihɛ gblamadza ʋa, ni kusekpeo e, lize ni Yuda kude. Banɔ baklɔ beze banɔ gi kusumu yo baka ba, ɔsã nɔ badɔbasɛ ba ni banɔtsitsi ba bɛkpɛ si bevu Yesu u. 44Ɔniliɛ gi atrakpɛ Yesu awla ɛ, asi linɔkpi le kibitɛ kitɔ aplɛ si, “Ɔnyime liɛ klɔ gi yɛ lidzɔ lɛ matramu i, yɛ onu ɔniliɛ gi mlɛpɛ ɛ. Mlevu ye tɔ mlagbani yɛ asɛ nɔ ni sigagla.”

45Kiliɛ gi Yuda eku ní klɔ ko e, atrɛ Yesu klɔ lɛ axwa yɛ si, “Ɔdɔbasɛ yɛ!” Lɛ amu yɛ lidzɔ lɛ ɛ. 46Banima bevu Yesu lɛ bɛnya yɛ ɛ. 47Pɔ̀ banama gi bɛlɛɛ níklɔ ba mɛ tole etso yɛ ihɛ gblamadza yɛ lɛ aŋwia yɛ ɛ. Nite si ihɛ azɛɛtsí kusumu yo Ɔka Ʋidi ye yɛ osumubi ye yɛ kutu yɔ ɛzanɔ ɔ. 48Lɛ Yesu eʋi ba si, “Kizia liziã si mlamani ihɛ gblamadza ba ni kusekpeo tɔ mlaba evu me ŋwisi ɔnɔ gi ɔ́ʋibitɛ ní ɔsã nɔ aʋa na a? 49Liwe kakaa meze ní mlɔ kusi gi mabasɛ bidɔ ní Lisɔligba lɛ mɛ ɛ; pɔ̀ mlévu me e. Pɔ̀ lilɛ si Aya yɛ liboe le liba lɛ mɛ ɛ.”

50Niklɔ badɔkpasi ba petee bese esɛ̀ ní yɛ su i.

51Ɔyasɔʋi ɔtɔ, gi enyime kusa tete ko e, eze ní Yesu kude. Bekeni edi si bévu ye, 52pɔ̀ ayurɔ kusaa akpɛ ba awla a, lɛ ese asɛ nì liya lɛ ɛ.

Yudanɛ ma Otsixwakɔ Ʋidi no ɛxwa litsi ni Yesu

53Lɛ kede e, bɛtsini Yesu ní kusumu yo Ɔka ʋidi ye yɛ kepea mɛ. Niklɔ kusumu yo baka ba, ɔma nɔ baka ba ni banɔ tsitsi ba, ani ɔsã nɔ badɔbasɛ ba bɛzɛtsa. 54Petro ezeni ba kude ní ɔdzage no ke, xe eti eku ní kusumu yo Ɔka ʋidi ye yɛ kepea mɛ ɛ. Niklɔ azɛɛŋani kifu yɛ ni Lisumugba lɛ bepepe ba. 55Kusumu yo baka ba ni Yudanɛ ma betsixwa ʋidi ba bekeni edi si biamɔ kunutsatsa kutɔ ní Yesu su tɔ biaye ye; pɔ̀ bátani kutɔtɔ kumɔ ɔ. 56Banɔ glegle bɛsɛ asia na ɛkpɛ ní Yesu awla, pɔ̀ ba eboe la ága kude tule e.

57Lɛ banɔ batɔ bɛyɔ ɛlɛɛ, lɛ bɛsɛ asia na ɛkpɛ ní Yesu awla si i, 58“Kwinu gi apani si, ‘Maayaʋi lisɔligba ɛlɛ ya gi banima bɛwa ni awla la ɛ; lɛ ní ewe tata kede e, maawa lidzedze gi aní banɔ bɛwa lɛ ɛ.’ ” 59Pɔ̀ ba kyɛ ɛ, ba katsalia kásɔ ɔ.

60Niklɔ Kusumu yo Ɔka Ʋidi ye ayɔ ní ba pɔ́ aŋu na mɛ xe eʋi Yesu si i, “Kunububu kutɔtɔ kúma ní wɔ awla ní eboa la gi bɛkɔ ní wɔ su kura na a?”

61Pɔ̀ Yesu ɔ́pani i, xe aabu liboeboe onu u. Lɛ Kusumu yo Ɔka Ʋidi ye eʋi ye dzɛ si, “Wɔ wonu Mesiya yɛ gi yɛ onu Aya Dradra yɛ Yebi ye na a?”

62Lɛ Yesu ebu le onu si, “Mɛ! Lɛ lipoe le litrába gi mlɔ petee mlamɔ Ɔnɔɛ Yebi ye gi odi ní Ɔka Ʋidi ye yɛ kaŋawla mɛ ɛ, gi atrába ní lifunu ne aplɛ la aʋa ɛ.”

63Kusumu yo Ɔka Ʋidi ye akyì yɛ ewu la lɛ apani si i, “Katsali woli lu koŋ kwipɛ ní liboe lɛ ya mɛ dzɛ ɛ! 64Mlenu yɛ libusioboe lɛ gi apani i. Ege kìnu mlɔ kugyodi o?”

Ba pɔ́ bɛzi lɛ si, aŋa lipɔ! Lilɛ si beye ye e!

65Lɛ banɔatɔ bekpese sita sɛ kubu ubali Yesu aʋa ɛ. Bɛnya yɛ aŋu na mɛ, lɛ bɛsa yɛ bidɔ mɛ ɛ. Lɛ besi yɛ si i, “Basɛ blɔ ɔniliɛ gi asa wɔ bidɔ mɛ ɛ!” Lɛ Lisumugba lɛ bepepe ba bɛgbani yɛ ɛsɛnɔ ɛ, lɛ bezeekusi ye e.

Petro anada si yetè Yesu u

66Agi Petro eze ní kepea kukaa mɛ ɛ Kusumu yo Ɔka Ʋidi ye yɛ ɔdzɛʋi ɔnɔsumu tole aba a. 67Lɛ gi amɔ Petro gi azɛɛŋani kifu yɛ ɛ, edi ye haã lɛ asi yɛ si, “Wɔ kyɛ, woze nì Yesu Nazaret ɔnɛɛ kude e.”

68Pɔ̀ Petro anada lɛ si, “Méte liboe lɛ gi wɔɛpani i, lɛ menu lɛ ese fɛ ɛ.” Lɛ edo atrɛ ní kevunu ya ɛ. Niklɔ ko lɛ ɔkukɔ lɔ eme e.

69Gi ɔdzɛʋi yɛ amɔ yɛ ní niklɔ ɛ, ekpese kudo si banama gi bɛlɛɛ níklɔ dzɛ si, “Onu bamɛ tole.” 70Pɔ̀ Petro anada lɛ dzɛ.

Lidze xe banɔ baklɔ gi balɛɛ ní klɔ bebu le etu Petro dzɛ si, “Wɔtratani lɛ kúnada si wonu bamɛ tole e; lɛ ese linu si wɔ kyɛ ɛ, Galilea ɔnɛ wonu u.”

71Niklɔ Petro apani si, “Matàni bidɔ si anukwarɛɛ mɛɛpani! Aya ohe kutu ki mɛ xegi asia mɛɛsɛ ɛ! Méte onyime liɛ su gi mlɛpani i!”

72Kyɔŋ klɔ ko e, ɔkukɔ lɔ eme kuʋlaa, lɛ Petro aplɛ aŋu liboe lɛ gi Yesu asi yɛ aʋa a si, “Xe ableke ɔkukɔ lɔ aamè kuʋla ɛ, wɔanada tatá si wote me e.” nite si amɔ isu ya egyesi lɛ eku kubemi me e.

Actualmente seleccionado:

Mak 14: avn

Destacar

Copiar