Luka 5

Yesu axwa Badɔkpasi Tɔpu ma

1Liwe etɔ lɛ ɛ, Yesu alɛ ní Genesaret limu ne kutu, lɛ banima bɛsa likpakpa lɛ klani yɛ si tɔ bénu Aya yɛ liboe le. 2Amɔ kutapokpa tuʋa ní limu ne kutu yɔ gi bakpábu ba bɛyurɔ xe bezeplo ba dzikle ba ɛ. 3Yesu emu eku ní tole me. Katapokpa lia klɔ keze Simon kanɛ. Nite si Yesu asi yɛ si otutru ka tsinɔ kuni yo aʋa taʋɛ. Yesu eple eze ní katapokpaa mɛ lɛ abasɛ banima bidɔ mɛ ɛ.

4Gi Yesu abasɛ bidɔ mɛ pɔ́ ɛ, asi Simon si, “mleku katapokpaa atsinɔ ní limu ne odzudzu klɔ tɔ mlata mlɔ dzikle ʋa atɔ mlebu akpa.”

5Simon ebu le onu si, “Ɔkaɛ, kwikeni idi elesi zizi na petee pɔ̀ kúbu kididɔ ɔ. Pɔ̀ ní wɔ liboe le onu i, maapleni blɔ dzikle ʋa.” 6Gi epleni be ɛ, bebu akpa la gbí gi ɛki si ba dzikle ʋa bekpese kukyì i 7Lɛ loso bɛbasɛ ba benemi ba awla ní katapokpa ʋla mɛ si ba gapɔni ba. Bɛba ɛpɔni ba lɛ akpa la gi bebu i, eyí kutapokpa tuʋa gi ligɔ sisami tɔ kunyrɔ ɔ.

8Gi Simon Petro amɔ ɔ liboe lɛ gi liba lɛ mɛ ɛ, ekutu Yesu lɛ asi yɛ si, “Ɔkaɛ sɛ ní mɛ su lɛ ese linu si eboe zimizi ɔbitɛbitɛ menu!” 9Simon ni yɛ ahanuglɔ ba pɔ́ ba inugu itse ní akpa kɔdzɔkɔdzɔ ala gi bebu i su. 10Nite ke Simon yɛ ahanuglɔ ba gi bɛzɛxwa si Yakobo ni Yohanes gi benu Zebedeo yɛ biba fɛ ɛ, libitɛ ba yaa.

Lɛ Yesu asi Simon si, “Wukíse lifu u, dɔnɔ abla ɛ, banɔ wɔtrabu!” 11Gi betini ba kutapokpaa ɛmanɔ ní oge no e, bɛyurɔ kidɔ kakaa lɛ bekuni Yesu kude e.

Yesu ayɔ ni Kunya Kyikyĩ yɔ Ɔnyanya ɔtɔ

12Gi Yesu eze ní ɔma ɔtɔ mɛ ɛ, onyime ɔtɔ gi kunya kyikyĩ kwize ní yɛ su i, amɔ Yesu lɛ adɔ ni yɛ ketu ya a, xe aki yɛ litukpo si i, “Ɔkaɛ, xe wɔpɛ ɛ, wɔatani mɛ kuyɔnɔ.”

13Yesu anina yɛ ɔwla lɔ lɛ agbɔni yɛ ɛ. Lɛ apani si i, “Mapɛ! Wɔ isu ya idra!” Kyɔŋ ko e, kunyaa kwiblo ní yɛ su. 14Yesu akpɛ ɔsã akí onyimee si, “Wukísi ɔnɔnɔ! Pɔ̀ trɛ ní kusumu yo ɔkaɛ klɔ tɔ zɛɛkɔ wɔ isu ya basɛ yɛ, tɔ ɔtapo wo odi. Lɛ kede e, tɔ ɔnɔ kakaa ɔmɔ egyesi si wɔnyayɔ ɛ, zɛki bidɔ kɔkɔ ɛ bɛklɔ gi bɛ ɔsã Mose akpɛ ɛ.”

15Pɔ̀ Yesu su eboe la eyi klanɔ ɛsanɔ. Lɛ anɔkpi la ɛba si lɛ enu yɛ eboe la tɔ biamɔ kuyɔyɔ dɔni ba bànya ʋa mɛ ɛ. 16Pɔ̀ Yesu azeebu isu ya lidze e, lɛ azɛɛxwa Aya ní ɔyaya kɔ ɔ.

Yesu ayɔni Onyime ɔtɔ gi yɛ Kapɛ Tiele Ketse e

17Liwe etɔ lɛ gi Yesu azɛɛbasɛ bidɔ mɛ ɛ. Farisianɛ batɔ ni Ɔsã nɔ badɔbasɛ batɔ beze ní klɔ. Bɛdɔ ní ɔma kakaa mɛ ní Galilea ni Yudea kuseo me ani Yerusalem ɔma nɔ mɛ ɛba. Ɔkaɛ yɛ Kigaglaɛ kize yɛ aʋa gi akɔ azɛɛyɔni banyanya ba ɛ. 18Benyime batɔ bɛmani onyime ɔtɔ gi yɛ kapɛ tiele ketse e ní ɔtɔsi aʋa. Bekeni idi si bɛɛkɔ yɛ ɛkpɛ ligba lɛ mɛ tɔ bɛkɔ yɛ ɛplɛ ní Yesu ketu ya. 19Pɔ̀ ɔnɔha lɔ loso e, bátani kudeo kumɔ ɔ. Lɛ loso befeke ye emu ní ligba lɛ aʋa a. Lɛ bebu liwu le ní ɔvitɔ lɔ ɔ, xe bepleni ɔnyanyaɛ ní yɛ ɔtɔsi lɔ aʋa gani lɛ mɛ kpɛ ligba lɛ mɛ, ní banima kusio ní Yesu ketu ya a. 20Gi Yesu amɔ ba kuziŋaa ɛ, asi onyimee si, “Ɔʋia, bɛkɔ wɔ eboe zimizi na ɛkyɛ wɔ.”

21Ɔsã nɔ badɔbasɛ ba ni Farisianɛ ma bekpese kupani ní batsali kusi si, “Nyaŋwɛ iliɛ ya gi ɛɛpani ebusioboe ala la te e? Aya ko onu ɔniliɛ gi aatani eboe zimizi kukɔ kyɛ ɛ.”

22Yesu ete ba begyodi ʋa lɛ eʋi ba si, “Ege loso xe begyodi ba ya elu bàkpasi ní mlɔ mɛ ɛ? 23Liwoli lisa ɛplɔplɔ si biapani i, ‘Bɛkɔ wɔ eboe zimizi na ɛkyɛ wɔ’ loo, ‘Yɔ tɔ ga na a’? 24Pɔ̀ tɔ mlete si Ɔnɔɛ Yebi ye amɔ kude ní kesea aʋa si aakɔ̀ eboe zimizi na kukyɛ ɛ.” asi onyime liɛ gi yɛ kapɛ tiele ketse e si, “Mɛɛsi wɔ si, yɔ; feke wɔ ɔtɔsi lɔ tɔ trɛ kepea mɛ!”

25Kyɔŋ ní ba pɔ́ aŋu mɛ ɛ, onyimee ayɔ, efeke yɛ ɔtɔsi ɔlɔ aʋa gi afɛ ɛ, lɛ atrɛ kepea mɛ nì Aya kukpɔ̀kpɔ̀ ɔ. 26Litu ba pɔ́ kugyɔ. Lifu liku ba; lɛ bɛkpɔ̀ Aya xe bɛpani si, “Enugutseboe woli aŋu mɛ kwimɔ nite omono o?”

Yesu axwa Lewi

27Eboa la ya kede e, Yesu edo; lɛ azɛɛmɔ ɔbɔgyɔ ɔtɔ ɔ, gi yɛ linyi linu Lewi i, gi eze ní yɛ lixwɛwagba lɛ mɛ ɛ. Lɛ Yesu asi yɛ si, “Kuni mɛ kude e.” 28Lɛ Lewi ayɔ, ayurɔ kidɔ kakaa lɛ eku ni yɛ kude e. 29Lɛ Lewi atrɔ ɔdɔŋakplɔ ʋidi si yikpɛ kubùbù ní Yesu su ní yɛ kepea mɛ ɛ. Babɔgyɔ glegle ni banɔ dzedze batɔ beze ní ɔkplɔ nɔ su. 30Pɔ̀ líze Farisianɛ batɔ ni ɔsã nɔ badɔbasɛ batɔ gi bafɛ beze farisianɛ kule e. Lɛ loso beʋi Yesu yɛ badɔkpasi ba si, “Ege lɛ loso mlɛɛkpɛ awla ní kezi me xe mlɛɛŋwɛ bidɔ ni babɔgyɔ ba ni banama a gi benu banɔ zimizi na a?”

31Yesu ebu le onu akí ba si, “Banama gi balɛ mumɔ ɛ, báziã ɔwabitɛ ɛ. Pɔ̀ banama gi bɛɛnya ɛ, ba bɛziã ɔwabitɛ. 32Mába si mixwa banɔ gbã, pɔ̀ banɔ zimzi ba maba si mixwa tɔ bekyi ní ba ina nɛ mɛ ɛ.”

Yesu apani ní Onugu nyanya su

33Banɔ batɔ bɛsi Yesu si, “Yohanes yɛ badɔkpasi ba bizɛnya onugu, lɛ bizɛxwa Aya lipoe kakaa; lɛ nite ke Farisianɛ ma badɔkpasi ba fɛ bizɛbitɛ ɛ. Pɔ̀ wɔ badɔkpasi ba xunyɔ ɛ kuŋaa ni kuŋwɛŋwɛɔ aʋa ko balɛ́.”

34Yesu ebu le onu akí ba si, “Xegi ɔdzɛnyee ɔlɛ ɔkplɔ nɔ su i, kitɛ yɛ banɔxwaxwa ba biaze ni kuʋɛ ɛ? Lítraba lɛ mɛ liwewe e! 35Pɔ̀ lipoe le litrába gi biagbani ɔdzɛnyee sɛnɔ ɔ. Kɔ banɔxwaxwa ba bɛnya onugu i.”

36Yesu ebu abee aki ba dzɛ si: “Ɔnɔnɔ ɔʋíkyi lisiapɛ dɔni liwu vuvu su kukɔlulɔ liwu koko ɔpami kɔ. Xe liba lɛ mɛ nite e, libasɛ si ezizi liwu vuvu nɛ, lɛ lisiapɛ nɛ ɛ, lítrasɔ nɔ liwu koko le e. 37Ɔnɔnɔ ɔ́ʋikɔ kuda vuvu kukpɛ ní kagaplekpa keʋe koko me e. Xe aní te e, keʋe kokoa kiata kɔ kuda kwibali kɔ keʋea kezizi. 38Boŋu i lilɛ si bakɔ kuda vuvu yɔ akpɛ ní Kagaplekpa keʋe vuvu me. 39Nite ké ɔnɔnɔ ɔʋípɛ si yiŋwɛ kuda vuvu yɔ xegi aŋwɛ kukokoo pɔ ɛ. Lɛ ese linu si aapani si, ‘Kuda kókoo kwipɛ ɛsani kuvuvũ yɔ!’ ”

Actualmente seleccionado:

Luka 5: avn

Destacar

Copiar