Čơdơ̆ng Phŭn 9
9
Kơnol Pơgop Tơ̆ng Krah Ơi Adai Hăng Nôê
1Ơi Adai brơi tơlơi mơyun hiam kơ Nôê hăng ƀing ană đah rơkơi ñu. Ñu laĭ hăng gơñu: “Brơi hmâo lu ană bĕ, tui anŭn kơnŭng djuai ih či lar hyu djŏp djang lŏn tơnah.#Čơd 1:28. 2Abih bang hlô mơnơ̆ng amăng adai, khul hlô hro rui ƀơi lŏn tơnah, laih anŭn khul akan amăng ia rơsĭ, leng kơ či hwĭ kơ ƀing gih laih anŭn hmâo jao laih amăng tơngan ƀing gih. 3Abih bang mơnơ̆ng thâo pơpư̆ pơgơi laih anŭn hmâo tơlơi hơdip leng kơ či yua ngă mơnơ̆ng ƀơ̆ng brơi kơ ƀing gih. Kâo pha brơi ƀing gih abih mơnơ̆ng anŭn kar hăng Kâo hmâo brơi laih añăm rơ̆k kơ ƀing gih. 4Samơ̆ ƀing gih ƀu dưi ƀơ̆ng ôh mơnơ̆ng dŏ hmâo drah, kiăng laĭ dŏ hơdip.#Lêwi 7:26-27; 17:10-14; 19:26; Mơñă 12:16,23; 15:23. 5Sĭt yơh Kâo či tơña glaĭ drah kơ tơlơi hơdip ƀing gih. Kâo či tơña glaĭ drah anŭn mơ̆ng abih bang hlô mơnơ̆ng laih anŭn Kâo či tơña glaĭ tơlơi hơdip ană mơnuih mơ̆ng tơngan tơdruă gơñu, kiăng laĭ mơ̆ng tơngan ƀing adơi ayŏng ñu.
6Hlơi pô ngă tuh drah ană mơnuih,#Tơb 20:13; Čơd 1:26.
Arăng či ngă tuh drah glaĭ kơ ñu;
Yua kơ Ơi Adai hrih pơjing ană mơnuih
Tui hăng rup hơbŏ Ñu Pô.
7Tui anŭn, brơi ƀing gih tơkeng rai lu ană bĕ, tui anŭn kơnŭng djuai ih či lar hyu djŏp djang lŏn tơnah.”#Čơd 1:28.
8Ơi Adai laĭ kơ Nôê hăng ƀing ană đah rơkơi ñu hlăk dŏ hrŏm hăng ñu tui anai: 9“Anai nê, Kâo pơjing kơnol pơgop hăng ƀing gih laih anŭn hăng ƀing kơnŭng djuai ƀing gih, 10laih anŭn hăng abih bang khul hlô mơnơ̆ng hlăk dŏ hrŏm hăng ƀing gih kar hang khul čĭm, hlô mơnơ̆ng rong, hlô glai, kiăng laĭ abih bang hlô mơnơ̆ng tơbiă mơ̆ng kompăn, wơ̆t kơ abih bang hlô mơnơ̆ng hơdip amăng lŏn tơnah tơdơi anai. 11Hnŭn yơh Kâo pơjing kơnol pơgop hăng ƀing gih: Abih bang hlô hơdip ƀu či tŭ tơlơi pơrai hăng ia lip dơ̆ng tah, laih anŭn ăt kŏn hmâo dơ̆ng lơi ia lip kiăng pơrai hĭ lŏn tơnah.”
12Ơi Adai laĭ: “Anai jing gru kơnăl kơ kơnol pơgop hlŏng lar Kâo hmâo pơjing laih tơ̆ng krah Kâo hăng ƀing gih, hăng abih bang hlô mơnơ̆ng hơdip hlăk dŏ hrŏm hăng ƀing gih, găn kơ lu rơnŭk hơdip. 13Kâo dưm mrơ̆t Kâo ƀơi khul kơhiăng kiăng ngă gru kơnăl brơi kơ kơnol pơgop tơ̆ng krah Kâo hăng ƀing gih. 14Rĭm wơ̆t kâo dăng kơhiăng pơ adai laih anŭn mrơ̆t či bơrơđah ƀơi kơhiăng, 15Kâo či hơdơr glaĭ kơnol pơgop Kâo hmâo pơjing laih hăng ƀing gih, laih anŭn hăng abih bang hlô mơnơ̆ng hơdip, abih bang mơnơ̆ng hmâo asar đeh, tui anŭn ia ƀu či jing dơ̆ng tah ia lip kiăng pơdjai hĭ abih bang mơnơ̆ng hơdip. 16Tơ mrơ̆t tơbiă rai ƀơi khul kơhiăng, Kâo či lăng ñu kiăng kơ hơdơr glaĭ kơnol pơgop hlŏng lar tơ̆ng krah Ơi Adai hăng abih bang mơnơ̆ng, abih bang hlô hmâo asar đeh ƀơi lŏn tơnah.” 17Ơi Adai laĭ dơ̆ng hăng Nôê: “Anŭn jing gru kơnăl kơ kơnol pơgop Kâo hmâo pơdơ̆ng laih tơ̆ng krah Kâo pô hăng abih bang mơnơ̆ng hơdip amăng lŏn tơnah.”
Ƀing ană đah rơkơi Nôê
18Ƀing ană đah rơkơi Nôê tơbiă mơ̆ng kompăn: Sem, Čam laih anŭn Japhet. Čam jing ama kơ Kanaan. 19Anŭn jing klâo čô ană đah rơkơi Nôê, laih anŭn mơ̆ng ƀing gơñu yơh lŏn tơnah hmâo lu mơnuih dŏ pơ djŏp djang anih.
Nôê măt tơpai, Kanaan tŭ tơlơi hơtơ̆m pah
20Nôê jing mơnuih bruă hmua. Ñu jing mơnuih tal blŭng pla phŭn boh kơƀâu. 21Ñu mơñum ia tơpai laih anŭn măt, ñu toh sum ao hăng đih amăng sang khăn ñu. 22Čam, jing ama Kanaan, ƀuh tơlơi mơhlŭn ama ñu, ñu tơbiă gah rơngiao ruai brơi dua čô ayŏng ñu thâo. 23Sem hăng Japhet mă ao phyung hrah ƀơi bra, rơbat kơdŭn klon laih anŭn sŏm brơi ama gơñu. Gơñu wir ƀô̆ nao pơkŏn yua kơ anŭn gơñu ƀu ƀuh ôh tơlơi mơhlŭn ama gơñu. 24Tơdang Nôê suaih laih, thâo bruă ană kluč ñu hmâo ngă kơ ñu, 25ñu laĭ:
“Kanaan lăp yơh kơ hơtơ̆m pah!
Ñu či jing hlŭn kơ ƀing adơi ayŏng ñu.”
26Ñu laĭ dơ̆ng:
“Bơni hơơč kơ Yêhôwa, jing Ơi Adai Sem;
Kanaan či jing hlŭn Sem!
27Rơkâo kơ Ơi Adai pŏk rơhaih guai kơ Japhet,#9:27 Japhet: Amăng tơlơi pơhiăp ƀing Hêbrơ, boh hră anai hmâo tơlơi arăng pơđok kar hăng boh hră hmâo tơlơi kiăng pia “đĭ lu tui”, “pŏk rơhaih thim”.
Laih anŭn brơi ñu dŏ amăng sang khăn Sem;
Kanaan khŏm ngă hlŭn kơ Japhet.”
28Tơdơi kơ ia lip, Nôê dŏ hơdip klâo rơtuh rơma pluh thŭn dơ̆ng. 29Nôê hơdip dua rơpăn rơtuh rơma pluh thŭn, laih anŭn djai.
Actualmente seleccionado:
Čơdơ̆ng Phŭn 9: JRA2016
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
© 2016 United Bible Societies. All rights reserved.
