Yohane 5

Yesu wakuchizga munthu pa chiziŵa cha Betesaida

1Pamanyuma pa vyeneivi, kukaŵa chiphikiro cha ŵaYuda ndipo Yesu nayo wakaruta ku Yerusalemu. 2Kwenekuko ku Yerusalemu kuli chiziŵa pafupi na Chipata cha Mberere#5.2 Chipata cha Mberere: Ndi chipata chinyakhe cha linga lakuzingirizga Yerusalemu. Viŵeto ivyo ŵakaperekanga ku ŵasofi vikanjiriranga pa chipata ichi (muwone Neh 3.1, 12.38-39). icho mu chiHebere chikuchemeka Betesaida, icho chikaŵa na makhonde ghankhonde. 3Umu mukagonanga ŵarwari ŵanandi: ŵachiburumutira, ŵakupendera na ŵakuphapa. [Wose aŵa ŵakalindizganga kuvunduka kwa maji. 4Chifukwa mungelo wa Chiuta wakizanga kaŵirikaŵiri na kuvundura maji. Munthu uyo wakadanga kunjira mu chiziŵa para ghakavundukanga, wakachiranga ku nthenda yakhe yose iyo yikamusuzganga.] 5Mukati mu ŵanthu ŵara ŵakurwara, wakaŵamo munthu yumoza uyo wakaŵa murwari pa virimika 38. 6Apo Yesu wakamuwona na kumanya kuti wakaŵa penepara nyengo yitali, wakati kwa iyo, “Kasi ukukhumba kuchizgika?”

7Murwari yura wakazgora wakati, “Fumu, ndilije munthu wakundiŵika mu chiziŵa para maji ghakuvunduka. Ndipo para nkhuti ndinjiremo, nkhusanga kuti munyakhe wanjira kale.”

8Ntheura Yesu wakati kwa iyo, “Wuka, nyamura mphasa yako wendenge.” 9Penepapo munthu yura wakachira, wakatora mphasa yakhe, na kwamba kwenda.

Sono zuŵa lira likaŵa la Sabata 10ŴaYuda ŵakati ku munthu uyo wakachizgika, “Muhanya uno ndi zuŵa la Sabata, kuti kukulangurika chara kuti uyeghe mphasa yako.”#Neh 13.19; Yer 17.21

11Iyo wakaŵazgora kuti, “Uyo wangundichizga ndiyo wangundiphalira kuti nyamura mphasa yako wendenge.”

12Ntheura ŵakamufumba ŵakati, “Kasi ndi njani munthu uyo wangukuphalira kuti nyamura mphasa yako wendenge?”

13Kweni munthu uyo wakachizgika kuti wakamumanya chara uyo wakamuchizga, pakuti Yesu wakawukapo pakuti pakaŵa ŵanthu ŵanandi.

14Pamanyuma pa vyeneivi Yesu wakamusanga munthu yura mu Nyumba ya Chiuta, ndipo wakati kwa iyo, “Wona, wachira. Ureke kwanangaso, chinthu chiheni chomene chikuwire.”

15Munthu yura wakaruta ndipo wakaya kaŵaphalira ŵaYuda kuti uyo wamuchizga ndi Yesu. 16Ndipo pa chifukwa ichi ŵaYuda ŵakamuzikizga Yesu pakuti wakamuchizga pa zuŵa la Sabata. 17Kweni Yesu wakati kwa iwo, “Ŵadada ŵachali kuteŵeta mlimo mpaka sono ndipo ine nane nkhuteŵeta.”

18Chifukwa cha ichi, ŵaYuda ŵakakhumbirakhumbira kuti ŵamukome Yesu, kuti ndi chifukwa chakuti Yesu wakaswanga Sabata pera chara, kweni nchifukwa chakuti iyo wakatenge ndi Mwana wa Chiuta. Kuyowoya kwa ntheura kukamuzgora kuti wakuyana na Chiuta.

Mazaza gha Mwana

19Ntheura Yesu wakaŵazgora wakati, “Inya, inya nadi, nkhumunenerani kuti, Mwana, kuti wangachita kanthu pa yekha chara, kweni icho wakuwona Ŵawiske ŵakuchita pera. Ivyo Ŵawiske ŵakuchita ndivyo Mwana nayo wakuchita. 20Pakuti Ŵawiske ŵakumutemwa Mwana ndipo ŵakumurongora vyose ivyo iwo ŵakuchita. Ŵamurongorenge milimo yikuru yakuruska iyi, ndipo muti muzizwenge. 21Chifukwa nga ndi umo Ŵawiske ŵakuwuskira ŵakufwa na kuŵapa umoyo, ntheuraso ndimo Mwana nayo wakuŵapira umoyo awo wakukhumba kuŵapa. 22Pachanya pa ichi, Ŵawiske kuti ŵakweruzga munthu chara, kweni weruzgi wose ŵali kumupa Mwana. 23Mwakuti wose ŵamuchindikenge Mwana nga ndi umo ŵakuŵachindikira Ŵawiske. Uyo wakureka kuchindika Mwana, kuti wakuchindika Ŵawiske chara awo ŵakamutuma.”

24“Inya, inya nadi, nkhumunenerani kuti yose uyo wakupulika mazgu ghane na kupulikana na uyo wakandituma, wali na umoyo wa muyirayira. Kuti wamkweruzgika chara, kweni wajumpha nyifwa, wanjira mu umoyo. 25Inya, inya nadi, nkhumunenerani kuti nyengo yikwiza, ndipo ndi sono, apo ŵakufwa ŵamkupulika mazgu gha Mwana wa Chiuta. Ndipo awo ŵamkupulika ŵati ŵaŵe na umoyo. 26Nga ndi umo Ŵawiske ŵaliri na umoyo mwa iwo ŵekha, ntheura pera ndimo ŵakamupira Mwana kuŵa na umoyo mwa iyo yekha. 27Ndipo ŵali kumupa Mwana mazaza ghakweruzga chifukwa ndi Mwana wa Munthu. 28Mureke kuzizwa na ichi, pakuti nyengo yikwiza apo wose ŵakufwa awo ŵali mu mararo ŵamkupulika mazgu ghakhe. 29Ŵanthu awo ŵali kuchita uweme ŵamkuwukira ku umoyo, kweni awo ŵali kuchita uheni ŵamkuwukira ku ŵeruzgi.#Dan 12.2

Ŵakaboni ŵa Yesu

30“Ndingachita kanthu chara mu mazaza gha ine ndekha. Nkhweruzga nga ndi umo nkhupulikira. Ndipo weruzgi wane ngwa urunji chifukwa kuti nkhweruzga kwakuyana na khumbo lane chara, kweni kwakuyana na khumbo la Ŵadada awo ŵakandituma.

31“Usange nkhujikhalira ukaboni ndekha, ipo ukaboni wane kuti ngwa unenesko chara. 32Kweni walipo munyakhe uyo wakundikhalira ine ukaboni, ndipo nkhumanya kuti ukaboni wakhe pa ine ngwa unenesko. 33Imwe mukatuma mathenga ghinu kwa Yohane Mubapatizi ndipo iyo wali kupanikizgira ukaboni ku unenesko.#Yoh 1.19-27, 3.27-30 34Kuti nkhwakuti ukaboni uwo nkhupokera ngwa kufumira ku munthu chara, kweni nkhuyowoya ichi kuti imwe muponoskeke. 35Yohane wakaŵa nyali yakugolera na kuŵala, ndipo pa nyengo yichoko waka imwe mukanwekera kukondwera mu ungweru wakhe. 36Kweni ine ndili nawo ukaboni ukuru kuruska wa Yohane. Chifukwa milimo iyo Ŵadada ŵali kundipa kumarizga, ndiyo nkhuchita, ndipo yikurongora ukaboni kuti Ŵadada ŵali kundituma. 37Ndipo Ŵadada awo ŵakandituma ndiwo ŵene ŵakundipanikizgira ukaboni. Imwe mundapulikepo lizgu lawo na kale, ndiposo mundaŵawone umo ŵaliri.#Mat 3.17; Mrk 1.11; Luk 3.22 38Mazgu ghawo kuti ghalimo mwa imwe chara, chifukwa kuti mukupulikana na uyo ŵakamutuma chara. 39Mukusanda malembo chifukwa mukupima kuti mu gheneagha musangenge umoyo wa muyirayira. Ndipo malembo gheneagha ndigho ghakundipanikizgira ine ukaboni. 40Ndipouli, mukukhumba kwiza kwa ine chara kuti muŵe na umoyo.

41“Kuti nkhukhumba kupokera uchindami kufuma ku ŵanthu chara, 42kweni nkhumumanyani kuti mulije kutemwa kwa Chiuta mu mitima yinu. 43Ine ndili kwiza mu zina la Ŵadada, ndipo imwe kuti mukundipokerera chara. Kweni usange munyakhe wangiza mu zina lakhe, iyo muti mumupokererenge. 44Kasi imwe mungapulikana uli apo mukupokerera marumbo kufuma ku yumoza na munyakhe ndipo mukupenja chara uchindami uwo ukufumira kwa Chiuta yekha na yekha? 45Kweni mureke kughanaghana kuti ine ndine ndamkumupachani na mrandu panthazi pa Ŵadada. Uyo wamkumupachani ndi Mozesi, mweneuyo mukumugomezga. 46Usange mukapulikana na Mozesi, mphanyi mwangupulikana na ine, chifukwa iyo wakalemba vya ine. 47Kweni usange mukuwura kupulikana na ivyo wakalemba, kasi mupulikanenge uli mazgu ghane?”

Actualmente seleccionado:

Yohane 5: Tumbuka

Destacar

Copiar