Genesis 3

Girdi’ nde fol

1Ma porchoyog e ir e th’abi llowan’ ko sabanban u fithik’ e gamanman ni SOMOL ni Got e ke sunumeg. Me fith fare porchoyog ngak fare pin ni ga’ar, “Rriyul’ ni yog Got ngomew ni dab mu koyew wom’ngin urngin e gek’iy ni bay ko gi woldug ney?”

2Me fulweg fare pin ni ga’ar, “Demturug e re ke gek’iy ni bay ko gi woldug ney ma gamow ra kay wom’ngin, 3ma kemus ni fare ke gek’iy ni bay u lulukngun e gi woldug ney e dab gu wew wom’ngin. I ga’ar Got e dab gu wew wom’ngin e re ke gek’iy nem, ara gu mathgow ngay; ya fa’an gamow ra rin’, ma gamow ra yim’.”

4Me fulweg fare porchoyog ni ga’ar, “De riyul’ e re bugithin nir; ya gathi gimew ra yim’. 5I yog Got e re bugithin nir ya manang ni gimew ra kay, mi gimew bod Got#3:5 Got; ara fare got. me tamilangan’mew ngam nangew e n’en ni bfel’ nge n’en nib kireb ni bod ir.”#3:5 me tamilangan’mew ngam nangew e n’en ni bfel’ nge n’en nib kireb; ara mu nangew gubin ban’en.

6Me guy fare pin feni fel’ ya’an fare ke gek’iy, nge feni manigil wom’ngin ni ngan kay, me finey feni manigil ni nge tamilangan’uy. Ma aram me t’ar boch i wom’ngin nge kay. Me pi’ boch ngak figirngin miki kay. 7Ma nap’an ni yug ra mu’gow i kay, me tamilangan’row, miyow nang ni yow bay u tamilang; ma aram miyow yuy’ yuwan e fig ngar m’agew nga lukngurow.

8Me gonowrug e chirofen nem mi yow rung’ag lingan SOMOL ni Got ni be yan u fithik’ e gi woldug nem, miyow mith rok u fithik’ e gek’iy. 9Me pining SOMOL ni Got fare mo’on ni ga’ar, “Gabayu uw?” 10Me fulweg fare mo’on ni ga’ar, “Gu rung’ag lingam nga fithik’ e woldug; mu gu tamdag mu gu mith rom, ya gu bay u tamilang.”

11Me fith Got ngak ni ga’ar, “Mini’ e keyog ngom ni ga bay u tamilang? Mog, kam koy wom’ngin fare ke gek’iy ni gog ngom ni dab mu koy?” 12Me fulweg fare mo’on ni ga’ar, “Fare pin ni mu sunumeg ni fan ngog e pi’ wom’ngin ngog ni nggu way, ma aram mu gu way.”

13Me fith SOMOL ni Got fare pin ni ga’ar, “Mangfan ni mu rin’?” Me fulweg ni ga’ar, “Fare porchoyog e ban nigeg nggu way.”#2 Kor 11:3; 1 Tim 2:14

Got ni yog e gechig

14Me ga’ar SOMOL ni Got ngak fare porchoyog, “Ngug gechig nigem ni fan e tin kam rin’; go’ gur e nge par u dakenam e re buch wa’athan ni ba’aray: Aram e chiney i yan ngaram e bay um sirgig u but’ i yan ni yinam e ga be yan ngay, ma ab e bayi mang ggan ngom. 15I gur nge fare pin e bay mpirew ni gimew ba to’ogor; ma ku er rogon pifak nge pifakam ni bay ur pired ni yad ba to’ogor. Ma be’ nib mo’on ni fak fare pin e bayi bilbilig lolugem’ mi gur e bay mu k’ad wurilen ay.”#Rev 12:17

16Me ga’ar ngak fare pin, “Bay gu yo’ornag e gafgow rom ko ngiyal’ ni kam diyen, mu gu gelnag e amith ngom ko ngiyal’ ni ngam gargel. Machane bay kum par ni ka ga be yim’ ni bochan e pumo’on rom, ma bayi par ni ir e suwon gur.”

17Me ga’ar ngak fare mo’on, “Kamfol rok le’engim kam koy wom’ngin fare ke gek’iy ni gog ngom ni dab mu koy. Ere bochan e tin kamrin’ ma aram e nge kireb e but’. Ma n’umngin nap’an e yafos rom ni bay um muruwliy e but’ nib gel nge yag ni pi’ e ggan ngom nib gaman,#3:17, 18; Heb 6:8 18ma bayi tugul e pan nge rachangal, ma bay um koy e woldug nu mapan. 19Ya thangri yib e athuw u dakenam ma ga maruwel nib gel nge yog ni pi’ e but’ e ggan ngom, nge yan i mada’ ko ngiyal’ ni ngam sul ko but’ ni ir e ni ngongliyem ngay. Ni ngongliyem ko but’, ere bay kum ngal’ ni but’ bayay.” 20Adam#3:20 ADAM: Re ngachal ney ni thin ni Hebrew e fan e “gubin e girdi’.” e tunguy fithingan le’engin ni Eva,#3:20 EVA: Re ngachal ney ni thin ni Hebrew e fan e “girdi’.” ni bochan e ir e chitiningin urngin e girdi’. 21Me fek SOMOL ni Got keru’ e gamanman nge ngongliy e mad riy ni nge fanay Adam nge le’engin, me yin’ nga dakenrow.

Adam nge Eva nchuwegrow ko fa gi Woldug

22Ma aram me ga’ar SOMOL ni Got, “Girdi’ e chiney e ke bod bagamad, ya kenang e n’en ni bfel’ nge n’en nib kireb. Thingar ri dab ni pag nge kay wom’ngin fare ke gek’iy nma pi’ e yafos, ya ra par ni dabki yim’.”#Rev 22:14 23Ma aram me l’oeg SOMOL ni Got fagali’nem nga wuru’ fa gi woldug nu Eden me tay row ngar muruwliy fare but’ ni ir e ni ngongliy row ngay. 24Nga ba’ ni ngek ko fa gi woldug me tay e kerubim nge bangi saydon ni be daramram ni urngin yang ni be cheal ngay. Ran’ey e nge tay e girdi’ u urel nge dabi chugur be’ ko fare ke gek’iy nma pi’ e yafos.

Actualmente seleccionado:

Genesis 3: YAP

Destacar

Copiar