Tourat 1: Foeda Nama 3

Adom-Haoar guna ar bisar

1Mabud Allar foyda ḳora zominor hoḳol zandaror maze haf oilo hoḳol taki fondibaz. Ou hafe eḳdin hi beṭi manshore ḳoilo, “Allae hasau tumatanre ḳoisoin ni, baganor hoḳol gasor fol tumra ḳaitae fartae nae?” 2Beṭie ḳoila, “Baganor zekunu gasor fol amra ḳaitam fari, 3ḳali baganor mazḳano ze gasṭa ase, Allae ḳoisoin, tumra er fol ḳaio na, soio-o na, soile-u morbae.” 4Ou hafe tanre ḳoilo, “Na, kunumonte-u mortae nae. 5Allae to zanoin, zedin tumra i gasor fol ḳailibae idin tumrar souk kulizibo, ar neki-bodir aḳol faia tumra Allar laḳan oizibae.” 6Beṭie zebla buzla, ou gasor fol ḳaite moza oibo, deḳte-o shundor, ar aḳoldar-o oizimu, ou tain fol faṛia ḳaila, ar tan zamaire-o dila ar zamaie-o ḳailila. 7Loge loge tara duio zonor souk kuli gelo, ar buzla tain-tain lemṭa. Ou tara ḍumur gasor ḳoyṭa fata siṛia silai kori lemṭi banaila.

8Hainja bala tara Mabud Allar aoaz hunla, tain baganor maze faḳanit aira. Teu Adom ar tan bou Mabud Allar samne na foṛar lagi baganor gasor aoṛe luḳaila. 9Mabud Allae Adomre ḍaḳ dia zikaila, “Tumi kuai?” 10Tain ḳoila, “Baganor maze ami tumar aoaz hunchi. Ami to lemṭa, erlagi ḍoraia lukai roisi.” 11Teu Mabud Allae zikaila, “Tumi ze lemṭa ḳe ḳoilo? Ze gasor fol ḳaite tumare na ḳorsilam, ḳailiso na kita?” 12Adome ḳoila, “Ze beṭimanush tumi amar loge diso, tai ou gasor fol amare ḳaoaise.” 13Ou Mabud Allae beṭire zikaila, “Tumi ita kita ḳorlae?” Tain ḳoila, “Hafe amare salla dia ḳaoaise.” 14Teu Mabud Allae hafre ḳoila, “Tumar i ḳamor lagi hoḳol fala heman ar hoḳol zongli zanuaror maze tumi-u lannoti oilae. Tumi zindegibor feṭo bordi solbae ar dula-balu ḳaibae. 15Ami tumar ar beṭir maze, tumar bongsho ar beṭi manshor bongshor maze dushmoni foyda ḳormu. Hi bongshe tumar ḳolla guṛa ḳorbo, ar tumi tar faor murat ḳamṛaibae.” 16Ar tain beṭire ḳoila, “Tumar hurutta oibar shomoy tumar mosibot kub baṛai dimu, tumi kub ḳoshṭo ḳoria hurutta foyda ḳorbae. Zamair bae tumar kub ḳaish taḳbo, ar he tumar ufre beṭagiri korbo.” 17Tain Adomre ḳoila, “Ze gasor fol ami haram ḳoria dislam, tumi tumar bour ḳota hunia ita ḳaiso, ou ḳarone zominre lannoti kora oilo. Zindegibor zobor toklif ḳoria tumi zominor foshol ḳaibae. 18Tumar lagi maṭir maze ḳaṭa-gosa ar bishala zongol zonmaibo, ar tumar ḳani oibo ou maṭir foy-foshol. 19Ze maṭi taki tumare foyda ḳorslam, hou maṭit firia na zaoa forzonto tumar matar gam faot falaia ḳani kaibae. Tumar maṭir shoril, maṭit-u mishizibo.”

20Adome tan bibir nam raḳla Haoa [mani, zindegi-deora], ḳaron tain hoḳol zinda manshor ma oiba. 21Adom ar tan bibir lagi Mabud Allae zanuaror samṛadi lebas banaia findaila.

22Erbade Mabud Allae ḳoila, “Deḳo, neki-bodir aḳol faia manush amrar laḳan oigese, oḳon he zate at baṛaia zindegi-gasor fol ḳaia hamesha zinda na roy.” 23Ou ḳota ḳoia Mabud Allae ze maṭi dia manshore foyda ḳorsla, hou maṭit ḳet-ḳamar ḳorar lagi tare Adan bagan taki kedai dila. 24Ḳedai dia tain zindegi-gasor gese zaoar fot fara deoar lagi Adan baganor fubedi Karubi firista oḳol raḳla ar aguinor toluaro guranit raḳla.

Actualmente seleccionado:

Tourat 1: Foeda Nama 3: sylL

Destacar

Copiar