GENESIS 14

Abram In Lot A Hunkhia

1Huan, Sinar khaw kumpipa Amraphel, Ellasar khaw kumpipa Ariok, Elam khaw kumpipa Kedorla-omer, Goiim khaw kumpipa Tidal damlai in hichi ahi a; 2Amau Sodom khaw kumpipa Bera a sim uh. Gomorrah khaw kumpipa Birsa, Admah khaw kumpipa Sinab, Zeboiim khaw kumpipa Semeber, Bela khaw kumpipa leng a sim uhi, huai Zoar ahi. 3Hiai tengteng Siddim guam ah a pang uh, huai guam Chi Tuipi ahi. 4Kum sawmlehnih sung Kedorla-omer nuai ah a na om ua, a kum sawm leh thumna in a helta uhi. 5A kum sawmlehlina ah Kedorla-omer leh a kiang a kumpipa omte a hong ua, Asteroth-karnaim khua ah Rephaimte a that ua, Ham khua ah Zuzimte a that ua, Kariathaim phaizang ah Emimte a that uhi. 6A omna Seir tang ah Elparan pha in, Horte a that uhi, Elparan gamdai zul a om ahi. 7A kiknawn ua, Enmishpat a tung ua, huai Kadesh ahita, Amalekte gam a mi teng leh Amorte, Hazezon tamar khua a tengte leng a that nawn uhi.

8Sodom khaw kumpipa, Gomorrah khaw kumpipa, Admah khaw kumpipa, Zeboiim khaw kumpipa leh Bela khaw kumpipa a pawt ua, Bela khua Zoar khua ahita, Siddim guam ah amau sual ding in a pangta uhi. 9Elam khaw kumpipa Kedorla-omer, Goiim khaw kumpipa Tidal, Shinar khaw kumpipa Amraphel te, Ellasar khaw kumpipa Ariok sual ding in, Kumpipa li in kumpipa nga a sual uhi. 10Siddim guam longnai khuk in a dim a; Sodom leh Gomorrah khaw kumpipate a taikek ua, huai ah a kia ua, a keloute tang ah a tai touta uh.

11Sodom leh Gomorrah mite sum tengteng leh a nekding tengteng uh a la ua, a paita uhi. 12Lot, Abram unau tapa, Sodom khua a om, a neih teng toh a la ua, a paita uhi.

13Mi khat hong taikhia a hongpai a, Hebru mi Abram a hilh a; amah Amormi Mamre tawsaw kiang ah a teng hi. Mamre Eskol unau leh Aner unau ahi a; huai mite Abram toh pangkhawm ahi uh. 14Abram in unaupa sal in a pi uh, chih a zaktak in, a inn a piang, aman a chilsiamsa mi za thum leh sawmlehgiat a pikhia a, Dan khua pha in a delhta hi. 15Zan in amau sual ding in amah leh a sikhate a ki hawmzak ua, a that ua Hobah pha in a delh uhi. Hobah bel Damaska mallam ah a om hi. 16Thil tengteng a honla kiknawn vek a, a unaupa Lot leh a neih tengteng a honla kiknawn vek a, numeite leng a hon pinawn a, midang tengteng toh.

Melkizedek In Abram A Vualzawl

17Kedorla-omer leh a kiang a om kumpipate that khin, a paikik in Sodom kumpipa Shave guam ah, Abram dawn ding in a hohsuk hi. Shave guam kumpipa guam ahita. 18Salem khaw kumpipa Melkizedek in tanghou leh uain a hontawi a; amah Pathian Tungnungpen siampu ahi. 19Aman Abram a vualzawl a; “Lei leh van neipa, Pathian Tungnungpen Abram vualzawl in om hen. 20Na melmate na khut a hon pepa, Pathian Tungnungpen, phat in om hen” a chi hi. Abram in amah bangkim a sawm a khat a pia hi.

21Sodom khaw kumpipa’n Abram kiang ah, “Mite honpia inla, thilte nang kineih in” a chi hi.

22Abram in Sodom kumpipa kiang ah, “Lei leh van neipa, Toupa, Pathian Tungnungpen lam ah ka khut ka zakta hi. 23Khauzang khat lel leng, khedap khau khat lel leng, na neih himhim ka lakei ding, huchilou in zaw, Abram, kei hauhsak sak ahi, na chikha ding” a chi hi. 24“Tangvalte nekmang leh ka mi paipihte tantuan kia louzaw ka lakei ding, Aner, Eskol leh Mamrete’n a tantuan uh la uhen” a chi hi.

Actualmente seleccionado:

GENESIS 14: PAITBSI

Destacar

Copiar