GENESIS 11

Babel Insang

1Huan lei a mi tengteng in pau khat leh paudan khat a nei uh. 2Hichi ahi a, suahlam a kipan a kisuanzel laiun, Sinar gam ah phaizang a mu ua; huai ah a tengta uhi. 3“Kisa un; teklei i bawldia, hoihtak in i halding” a kichita uhi. Suang sik in teklei a nei ua, suanghukna sik in longnai a nei uhi. 4“Kisa un, khopi i bawl dia, insang a vum vansun ding in i bawl dia, i min i thang sak ding uh. Huchilou in zaw lei pumpi ah thehdalh in i omkha ding” a chi uhi. 5Mite tate’n khopi leh insang a lam uh en ding in Toupa a hohsuk hi. 6Toupa’n “Ngai dih ua, mite pumkhat ahi ua, avek un lah pau khat a nei ngal ua; hiai thil a hih pan uhi. Tu’n zaw a thil hihtupte uh leng kham vual ahita kei ding hi. 7Kisa un, i va hohsuk ding ua, pau a kitheituah louhna ding un, a pau uh i va suklamdang sak ding” a kichi uhi. 8Huchi in Toupa’n amaute huai apan leitung tengteng ah a dalhsak hi. Huchi in a khopi bawl uh a tawpsanta uhi. 9Huaiziak in, a min Babel a chi uh; Toupa’n amaute leitung tengteng ah a dalhsakta hi.

Shem Suante

(1 Kron. 1.24-27)

10Hiai Shem suante ahi uh. Shem kum za a upa ahi a; tuichim tun nung kum nih nung in tapa Arpaksad a nei hi. 11Arpaksad a neih nung in Shem kum za nga a damlai a, tanu leh tapate a neilai hi. 12Arpaksad in kum sawmthum leh nga a hih in, tapa Shelah a nei hi. 13Shelah a neih nung in Arpaksad kum za li leh thum a damlai a, tanu leh tapate a neilai hi. 14Shelah in kum sawmthum a hih in tapa Eber a nei hi. 15Eber a neih nung in Shelah kum za li leh thum a damlai a, tanu leh tapate a neilai hi. 16Eber in kum sawmthum leh li a hih in, tapa Peleg a nei hi. 17Peleg a neih nung in Eber kum za li leh sawmthum a damlai a, tanu leh tapate a neilai hi. 18Peleg in kum sawmthum a hih in tapa Reu a nei hi. 19Reu a neih nung in Peleg kum za nih leh kua a damlai a, tanu leh tapate a neilai hi. 20Reu in kum sawmthum leh nih a hih in, tapa Serug a nei hi. 21Serug a neih nung in Reu kum za nih leh sagih a damlai a, tanu leh tapate a neilai hi. 22Serug in kum sawmthum a hih in, tapa Nahor a nei hi. 23Nahor a neih nung in Serug kum za nih a damlai a, tanu leh tapate a neilai hi. 24Nahor, kum sawmnih leh kua a hih in, tapa Terah a nei hi. 25Terah a neih nung in Nahor kum za leh sawmkua a damlai a, tanu leh tapate a neilai hi. 26Terah in kum sawmsagih a hih in tapate Abram, Nahor leh Haran a nei hi.

Terah Suante

27Hiaite Terah suante ahi uh: Terah in tapa Abram, Nahor leh Haran a nei a; Haran in tapa Lot a nei hi. 28Haran a pianna gam a, kaldaite khua Ur ah, a pa Terah ma in a si hi. 29Abram leh Nahor in zi a nei ua; Abram zi min Sarai ahi. Nahor zi min Haran tanu Milkah ahi. Haran, Milkah pa leh Iskah pa leng ahi. 30Sarai a ching a; ta himhim a neikei. 31Terah in a tapa Abram, a tapa, Haran tapa, Lot, a mou, a tapa Abram zi Sarai a pi a; Kanan a hoh ding in Kaldaite khua Ur a kipan a pawtkhe khawmta uhi. Haran khua a hongtung ua, huai ah a tengta uhi. 32Terah damsung kum za nih leh nga ahi a, Haran khua ah Terah a sita hi.

Actualmente seleccionado:

GENESIS 11: PAITBSI

Destacar

Copiar