1 Timote 1

Pwəə nə́ ń ce Timote

1-2Timote, wɔ́ àmyɛ́ Pwəə à nʼâ kɛ̃ sɛ́bɛ́ rɛ́ tɛ̀bɛ́ à la mɔ́ pɔ. Nə́ Zwennə Yi ǹdə́ Yezu Kristə mó nə́ zhí mú pɔ nɛ ŋwɔ̀nɔ́ a jǐrh Yezu Kristə tùntúm. Ǹ wɔ́ à byǐ zhə̀n zhə̀nà Yi-ni-zhú mú wẽ́. Nə́ Da Yi ǹdə́ nə́ Cinu Yezu Kristə bʼa cĩ́ bwəl ǹ yó, sə bə dùr ǹ nɔ̀nɔ̀, bə pɔ̃́ yə̀-zùlə́!

Cə̂r byɛ̀bɛ́ bə̀ nʼê byili kɔn dɛ̀bɛ́ rə̀ də̀ zhə̀n mɔ́

3À nʼâ lwə̀l mó bə̀ ǹ mɛ̃ Efɛɛzɛ nɛ́, ǹdə à gə́ pɔ mɔ́ nyí a bʼa zhǐr a vò Masɛdwanɛ nɛ́ mɔ́, mùnì ga ń cə̀r lyì bí byɛ̀bɛ́ bə̀ ŋwɛ́nɛ́ gàà bə̀ nʼê byili kɔn dɛ̀bɛ́ rə̀myɛ́ ǹdə́ Kristə yò-ècɔ̀nɔ̀ nyí rí də̀ rə̀dù mú. 4Byili bi bə̀ bə̀ yẽ̌ kɔma bɛ́ ǹdə́ nə́ nàmbala bɛ́ nyə̀ná nɛ́ nə̀ tʼâ zhɛ̀ bə̀ nyú w mú ni, bə̀ nə̀ nʼê twí ǹdə́ nyə̀-pâr. E jà nyə̀-pàárɛ́ tʼâ la ce Yi tum dí vò yé. Wɔ́ Yi-ni-zhú dúdú mə̀ bʼa ce rə vò. 5Nyí rí tɛ̀bɛ́ à pɔ mɔ́ èta mɔ́, wɔ́ mùnì ga sónó w ò nʼô shí wu kɔ̀bɔ́ ò bə dóó zhe, ǹdə́ Yi-ni-zhú páá wẽ́ mó yə̀ nɛ́. 6Lyì jàlà ywə̀r bə yẽ̌ sɔ́má y èmyɛ́ nɛ, bə̀ kʼâ nʼê zɔ̀m zɔ̀mà nyɛ̀bɛ́ nə̀ bə kùr zhe. 7Bə̀ nʼê yâl bə yə̀ Muyiisi nyə́ né byilnə, bə jʼà yə̀l nə̀ kùrə̀ yé. Bə̀ nʼê zɔ̀m ǹdə́ bə̀ jàn gakó, bə jʼà yə̀l dɛ̀bɛ́ bə̀ nʼê zɔ̀m mɔ́ myɛ kùr yé.

8Nə́ yě bə̀, nə́ gə nʼé zə nyə́ né nə́ kwè nə̀ sɔ́má, nə̀ càn. 9Nə́ mə̂ sə nə́ lwar bə̀ Yi yə̀ rə̀ nyə́ né pɛ wu-cángá cìnə́ yil yé. Rə̀ pɔ nɛ byɛ̀bɛ́ bə̀ tʼâ zwẽ rə̀ nyí ni mú, ǹdə́ byɛ̀bɛ́ bə̀ tʼâ nyàm dɛ̀ mɔ́, ǹdə́ lyì-bəlwâlsɛ́ ǹdə́ yə̀-bəlwàálɛ́ cìnə́ yilə, e súlí byɛ̀bɛ́ bə̀ tʼâ dùr rə̀myɛ́ ǹdə́ kɔn dɛ̀bɛ́ rə̀ wɔ́ rə̀myɛ́ nyân mɔ́, ǹdə́ byɛ̀bɛ́ bə̀ nʼê gwi bə̀ dabá ǹdə́ bə̀ nábá mɔ́, ǹdə́ lyì-gurnə bé gakó yilə. 10Yi pɔ rə̀ nyə́ né byɛ̀bɛ́ bə̀ nʼê fwə̂l mó ǹdə́ bala bɛ́ byɛ̀bɛ́ bə̀ nʼê jí dwã ǹdə bə̀ gə́ yʼa jí kɛ̃ nɛ́ mɔ́, ǹdə́ byɛ̀bɛ́ bə̀ nʼê zal bə̀ dwã bɛ́ bə yè mó, ǹdə́ byɛ̀bɛ́ bə̀ nʼê gòm kɔma mɔ́ yilə, e súlí byɛ̀bɛ́ bə̀ yʼa bwəl nyí bə jʼà tʼâ pyìrh rè mó, ǹdə́ byɛ̀bɛ́ gakó bə̀ tùntwə̃̀ə̃̀ né tʼâ tó kàrmɔ́ mɔ̀bɔ́ mə̀ wɔ́ zhə̀n mɔ́ yilə. 11Kàrmɔ́ mə̀myɛ́ mɔ́ nʼê shí yò-ècɔ̀nɔ̀ nyí rí rə̀ ce nə́ lwar Yi zùwə́ y pár mɔ́ wẽ́. Wɔ́ Yi rí tɛ̀bɛ́ rə̀ ce à nʼâ bwə̀l yò-ècɔ̀nɔ̀ nyí rí mú sõ wu-nyɔ̃̀ w ò bə dõ zhe mó nʼô shí ní.

Pwəə nə́ ń ce Yezu Kristə nə̀bán ń wu-bɔ̀nɔ̀ w yilə

12À nʼâ ce nə́ Cinu Yezu Kristə nə̀báná, ń gə́ pɔ nɛ jàn, n jà n nyǐ ni, n bù bʼà wɔ̌ ń tum dí à la tũ̌, n kwè rè n pɛ̃ mɔ́ yilə. 13E jà shãã ga, à yʼà nʼâ fulsi mu, à nʼâ tùrh mò, à nʼâ nwɛ̀nɛ̀ ń kwã-lyì bí. À gə́ yʼà gwẽ̌ yə̀ mɔ zhí mú ce à yʼà yə̀l dɛ̀bɛ́ à nʼâ wɛ̀rhɛ́ mɔ́ kùr yé, sə nə́ Cinu dùr à nɔ̀nɔ̀. 14Ń yò-ècɔ̀nɔ̀ w já dɛ̃´dɛ̃´ ǹdə́ nɛ, ń ce a zhí mu, n jà n pɛ̃ sónó kɔ̀bɔ́ ò nʼô shí Yezu Kristə wẽ́.

15Bə̀ nʼê byili bə̀ Yezu Kristə tú lũ w wẽ́, mùnì n vwârh yə̀-bəlwàálɛ́ cìnə́. Sə zɔ̀mɛ̀ rɛ́ rə̀myɛ́ wɔ́ zhə̀n cìcì. Lyì bí gakó mə̂ dwã sə bə zwẽ de. Wɔ́ àmyɛ́ à yə̀-bəlwàálɛ́ já du. 16Sə Yi gə́ dùr àmyɛ́ mɔ̀bɔ́ à yə̀-bəlwàálɛ́ já mɔ́ nɔ̀nɔ̀ mɔ́, wɔ́ mùnì ga Yezu Kristə jɛ̀rɛ̀ n tó àmyɛ́ dɛnnɛ n byili ń wu-bɔ̀nɔ̀ wá. Èta, àmyɛ́ jǐrh myɔrhɔ lyì bí byɛ̀bɛ́ bə̀ bàn mɔ zú bə nə nyǔ mə̀ tʼâ la zhɔ̌ mɔ́ yilə. 17Yi nə còrhó! Rə̀ wɔ́ pyɔ̌ mɔ̀bɔ́ ń pyɛ̀lɛ̀ rɛ́ bə zhɔ̌ zhe, n jà ń tá ń cì yé. Lò lò wàr mɔ ń la nɔ ǹdə́ ń yírhə́ yé. Wɔ́ ńmyɛ̌ dúdú ń wɔ́ Yi, ń mə̂ ǹdə́ còrhó ǹdə́ zùwə́, byinə nə̀ bə zhɔ̌ zhe yilə! Amɛ̀n!

18À byǐ Timote, kɔn dɛ́ dɛ̀bɛ́ à la mɔ́ byilu mú wɔ́ ǹdə dɛ̀bɛ́ Yi nyì-zwennə bé yʼà jɛ̀rɛ̀ bə byili ǹ shò-kwã nɛ́ mɔ́ nɛ. Rə̀ bʼa sɛ̃ mɔ́ ń bú búlə́ nyɛ̀bɛ́ nə̀ càn 19ǹdə́ Yi-ni-zhú ǹdə́ wu kɔ̀bɔ́ ò wɔ́ wárhgáá. Lyì jàlà tʼâ wɛ̀rhɛ́ kɔn dɛ̀bɛ́ bə̀ nʼê bùl bə̀ wẽ́ bə̀ rə̀ càn mɔ́ yé, bə̀ Yi-ni-zhú mú jʼa tó gàà mə zhìlì. 20Yimene ǹdə́ Alɛsãdərɛ ŋwɛ́nɛ́ lyì bí bə̀myɛ́ mɔ́ wẽ́, sə à co be Shətana jɔ̃̀ wà, mùnì ga bə lwar bə̀ bə̀ bə mə̂ sə bə tùrh Yi yé.

Actualmente seleccionado:

1 Timote 1: lee

Destacar

Copiar