1 Tesəloniki 1

Pwəə nə́ ń ce Tesəloniki Kristə-lyì bí

1Wɔ́ àmyɛ́ Pwəə ǹdə́ Shəlvɛ̃ ǹdə́ Timote nə́ rʼé kɛ̃ sɛ́bɛ́ rɛ́ tɛ̀bɛ́ nə́ la ámyɛ̌ Tesəloniki Kristə-lyì gùlú w lyì bí ni pɔ. Á zhí nə́ Da Yi ǹdə́ Cinu Yezu Kristə ne. Yi bʼa cĩ́ bwəl á yó, sə rə pə ába yə̀-zùlə́!

Pwəə nə́ ń ce Yi nə̀bán Tesəloniki lyì bí gə́ zwẽ Yi zɔ̀mɛ̀ rɛ́ mɔ́ yilə

2Nə́ rʼé ce Yi nə̀bán twéé twéé á gakó yilə. Nə́ gə nʼé ce Yi gakó, nə́ tʼá swě á yò yé. 3Nə́ rʼé lyǐrh á Yi-ni-zhú tumə né ǹdʼá sónó tùntwĩ̀ĩ̀ rí yò. Nə́ rʼé lyǐrh á gə́ nʼá pyɛ́nɛ́ á cìn á mʼá dɛ̃̀ nə́ Cinu Yezu Kristə twírí y mú myɛ yò nə́ Da Yi yé né twéé gakó.

4Da-byâ, nə́ yě bə̀ Yi swéné ába, rə cír ába á jǐrh rə̀ lyì. 5Yò-ècɔ̀nɔ̀ nyí rí nə́ bwə̀l nə́ byili ába mó də̀ ǹdə́ nyì-zɔ̀mà dúdú yé; nə́ bwə̀l lè ǹdə́ jàn tɛ̀bɛ́ rə̀ nʼê shí Eshirhə náàcɛ̀nɛ́ sõ, sə nə́ yě pamparɛ̃ɛ̃ bə̀ tɛ̀bɛ́ nə́ bwə̀l mó wɔ́ zhə̀nà. Á cìcì yě nə́ gə́ yʼâ zhe nə́ cìn ní á sõ, sə rə̀myɛ́ yʼà wɔ́ ámyɛ̌ sãɔ̃ yilə, 6sə á kwè nə́myɛ̌ ǹdə́ Cinu nà. Á nwɛ̀nɛ̀ dɛ̃´dɛ̃´, sə ǹdə́ rə̀myɛ́ ga, á zwẽ Yi zɔ̀mɛ̀ rɛ́ ǹdə́ wu-nyɔ̃̀ kɔ̀bɔ́ ò nʼô shí Eshirhə náàcɛ̀nɛ́ sõ. 7Èta, Masɛdwanɛ ǹdə́ Akəyi tənèsé Kristə-lyì bí gakó nʼê kwè ámyɛ nà. 8Zhə̀nà, è də̀ Masɛdwanɛ ǹdə́ Akəyi ní dúdú Cinu zɔ̀mɛ̀ rɛ́ shí á sõ rə yí ní yé; lũ w lyì bí gakó yě bʼâ zhí Yi ni. Rə̀myɛ́ ce, nə́myɛ̌ kʼé bə kaka zhe nə́ la byilu á Yi-ni-zhú mú shò-kwã nɛ́ yé. 9Lyì bí gakó nʼê zɔ̀m nə́ gə́ tú á sõ á zwẽ nə́ zhəəlé né mó, ǹdʼá gə́ yẽ̌ wẽ̀ dé tɛ̀bɛ́ bə̀ nʼê zwə́l rə̀ də̀ Yi mú ni mú yò. Bə̀ nʼê zɔ̀m bʼâ zwẽ nyí á pyìrhí á wun á nʼá tó Yi rí tɛ̀bɛ́ rə̀ wɔ́ nã́nyì, rə jʼà wɔ́ zhə̀n mɔ́ nɛ, 10sə á nʼá dɛ̃̀ rə̀ Byǐ Yezu ń la shí Arəzana w n bà. Rə̀ bwìrhì mù n du cùùrì wẽ́. Wɔ́ ńmyɛ̌ ń mà n zwẽ nə́ba bùrsí sə̀ bwəlse Yi la kɔ́ mɔ́ yi ní.

Actualmente seleccionado:

1 Tesəloniki 1: lee

Destacar

Copiar