Ruka 24

Homecfunac gborima yarec

Mat 28:1-10; Mrk 16:1-8; Yoh 20:1-10

1Sonda gboria hanahema asoac ama negemma ngac yeni kerecdoku homuna gombunga memengere anggec, imoc mema kicsereu kenggec. 2Kemma henggec hoctoa kicsere sing hedzic hedzickeamoc, imoc bic kpedic kpedidinggea feu kicsere naguya eng nanec. 3Nanu ngac yeni kicsere manau emma Kebu Yesuac farenga ine mi meficgegec. 4Amma yeni noc wiac fingecdac dema obohoma nammagec imohaingoc ngic yohockang ngakpingira kongac koporarac yombong, yereng hama kicnginau fingecma nanoc. 5Nanec ngac yeni kengec amma ngonducnema nammagec ngic yohockang yereng yofi edeyunuoc, “Ngeni ngic gboridac kecde, ye nocac kicsereu hofocdae? 6#Ruk 9:22Yenoc Anutungo homecfunac bic megboriu yacma yei mi kecde. Amma yeng Gariraia kecmangoc yoac edengunuec, imoc negensibisia. 7‘Ngicac Medac ye kopocsicmeme yeneac mariu faigec, yeneng mema mariponnu kpegec homeude.’ imoc fingerudeac deec, ‘Nga uameme harebec ammanu monggoc gborima yarude.’ ” 8Ifi deu ngac yeni yeng yoac bic deec, imoc negensigec.

9Negensima kicsereunac monggoc dzigene kemma medac 11 nga tosofocngina faka sasawa fingerec, imoc edeyunudacgec. 10Ngac kenggec, yeneac kpacngina Maria Madara nga Yohana amma Maria Yakobo nonggea nga ngac goa yenahafoc kenggec, yeneng siduc imocngoc aposoro edeyunugec. 11Nga ngac yeneng yoac imoc edeyunugec, imocac medac yeneng negenggec sicsauc anu yoacngina mi negensinggegec. 12Nga Petorongo ine yacma nedzima kicsereu kenec. Kemma kicsereu okarima henu kporucsusu tembonggegec imocngosac tarec. Ye imoc hemma negenu wiac engena anu monggoc dzigene kenec.

Emmausi sinnu

Mrk 16:12-13

13Anu wenacnaso imohaingoc ngic yohockang Yesu modacandape, yereng ama mong kpara Emausi, imohai kembesonga kenoc. Bangec imoc Yerusalenggac hereau 11 kiromita, imocacsoc tarec. 14Nga yeri faka sasawa fingerec, imocac denegeng amma kenoc. 15Yeri yoac imocac denegeng amma negen negeng ua mema kemmaec Yesu yengenaoc ngadengirau kemma meficyuruu yerigoc kenggec. 16Amma yeri kic mesufuu ayecmeu mi hensioc.

17Ifi anu Yesungo yofi kpesiyemerec, “Ngeri sinnu noc wiacac ngeraocngoc denegeng andape?” Ifi deu yeri ubahodung siric amma waickema nanoc. 18Namma mong kpara Kereopa, yeng kpesimiec, “Ge kuricngic mocgungosac Yerusalennu kecmina sonda yomocac manau ihai faka fingecdac, imoc mi negendang me?” 19Ifi deu yeng deec, “Noc faka fingecdac?” Ifi deu yereng edeoc, “Yesu Nadzaretenac yearu faka fingerec. Ye profete mong amma Anutu nga ngic yeneac kicfu yoac deec nga faka sasawa meec, imoc kuhagoc yombong anec. 20Nga womonggareng enara nga israengic enarafocnina, yeneng ye homeudeac dema gamang yeneac mariu faigec yeneng mariponnu kpegec homeec. 21#Ruk 19:11; Aps 1:6Nga neni yofi negensinggeing, yennoc israengicngac mesinunuude. Faka fingerec, imocac uameme yaguc harebec ande. 22-23Anu ngac goa neneac habuunac, yeni yaguc asoac yombong kicsereu kemma farenga hofocdau. Hofocma dzigenema hama yofi edenunudau, ‘Angero yereng ongau fingecnemmema yofi deec, “Yesu ye bic gboridac kecde.” ifi dedau.’ Ifi degec kpidohoding. 24#Yoh 20:3-10Amma nenearunac ngic goango kicsereu kemma ngac yeneng dedau, ifi isoc yombong meficgedau nga yengena ine mi hendau.”

25Ifi deu Yesungo yofi edeyuruec, “Ngeni negen negengngina kpac nga wosongina nomana yombong. Profete yeneng bicngoc yoac sasawa degec, imoc bic mi negensinggedae. 26#Ruk 9:22Imoc yofi fingerudeac degec, ‘Messia ye kpendzeng kpekefu wisickeuguc kibikperagiatoaac ameau naric enude.’ ” 27#Myeg 22:1-21; Yes 53Yengena siduc imoc mitikibiu oho ohoya fedacde, imoc Moseac kibiunac hanahema kengkecma profete sasawa yeneng yeac siduc ohogec, ye imocac hania deireckeyemerec.

28Anu yeri ama kembesonga kenoc, imoc mewegenema Yesungo ferecgema kembeso siric isoc anu 29yereng kpetarimima deoc, “Ama marai anu kundung kpebeso andeac ge nerigoc kenni.” Ifi deec yerigoc amau emma tacgec. 30Yesungo yerigoc tacma yaka nebesonga ic sogong mema kenecyoac dema mendzicma yemerec. 31Yemeru kicngira tegeru Yesu hensimaec yeng imohaingoc aockeu 32yeraocngoc denegeng amma deoc, “Yeng sinnu mitikibiac hania edekpou anecmema deireckenemeru herenirango yacyombonggedac, imoc fora yombong.” 33Nga yeri imohaingoc yacma dzigenema monggoc Yerusalennu kemma medacfora 11 ogofocnginagoc kpeturanggema tacmagec meficyunuoc. 34#1Kor 15:4-5Meficyunuec yeneng edeyuruma yofi degec, “Kebungo fora homecfunac gborima yacdac, ye Simong bic fingecmidac.” 35Ifi degec yereng sinnu yerearu faka fingerec nga Yesungo ic sogong mendziru hensioc, imocac siduc andaroc.

Yesungo fingecyemmeec

Mat 28:16-20; Mrk 16:14-18; Yoh 20:19-23

36Siduc ifi andarec yeni yoac imoc negemma tacmagec Yesu yengenaoc botucnginau namma deec, “Ruae ngenearu febeso.” 37#Mat 14:26Ifi deu yeni kpidohoma kengec amma negensigec, “Wosonga hendimbe.” 38Ifi negensigec yeng yofi deec, “Ngeni nocac kpidohoma negengyohoc andae? 39Imoc ni neanaoc, ngeni hanimarina henggec. Wosonga yeni sicfusingina kpac. Ngeni imocac hama kpeserenuma nenggec.” 40Ifi dema hanimaria edzacyunuu 41yeni kerectegec amma ubangerectoa negemma sifu mi negensinggegec yeng yofi kpesiyemmeec, “Ngeni yaka mong faigec tacde me?” 42-43Ifi deu yeni kondungyang dzedzea noboha migec mema kicnginau neec.

44 # Ruk 9:22 Nema yofi edeyunuec, “Ni ngenigoc kefai, imohai yofi bic edengunuai, wiac sasawa neac negemma Moseac dedeseriyoacfu nga profete yeneac kibiu amma Mitiyegecfu oho ohoya fede, imoc sasawa fora fingecbeso.” 45Ifi dema ye imohaingoc negen negengngina meireckeyemmeu yeni mitikibiac yoac negentegecgec 46yofi torokpema deec, “Imocac amma yofinoc oho ohoya fede, Messiango kpendzeng kpema homema uameme harebecfu monggoc gborima yarude. 47Yaru ngicngac yeni yeac kpacfu ubamereng nga kopocsic wawaac sing imoc Yerusaleng taonnusing hanahema bangeha bangeha ngicngac sasawa yenearu yoac dekperagigec kenude. 48#Yoh 15:27; Aps 1:8Faka yomocnoc kicnginau fingecdacmoc imoc dekperagibisia. 49#Yoh 14:16; 15:26; Aps 1:4Nga Mannango wiac ngemmeudeac deec, neng imoc suengemmeba mebisia. Negenggec, ngeni taong yomohai tacma imoc mi wabisia kecma wihacnac kuc heingemmebade. Ngeni kuc imoc memaguc naric kengha ambisia.”

Kurumennu enec

Mrk 16:19-20; Aps 1:9-12

50Anu Yesungo waraiyemmeu taong wama ngadeau Betania amabangec, imohai kemma maria miacma kenecyunumanu 51Anutungo meu wayunuma kurumennu enec. 52Enu yeni afehema songo kuneng meficgema Yerusalennu monggoc dzigenema kenggec. 53Nga yeni nasosoc womonnu kecma Anutu ubangerec edekecgec.

Actualmente seleccionado:

Ruka 24: Ded

Destacar

Copiar