Aposoro 3

Petorongo ngic hanimangang mengereec

1Wenac monnu 3 kiroc marai nunumunaso anu Petoro nga Yohane yeri Anutuac womonnu enoc. 2Anu ngic mong hanimangang nonggo heremanaunac ifia fingerec, ye Kebuac womonnu nagu mong kpara Nagukereng, ihai wenaha wenaha tofoho emma faigec takefec. Ye ngicngac womonnu engemmama anggec, yenearu ubangerecac wiacac derecgeudeac ifi anggec. 3Ngic imocngo Petoro nga Yohane yeri womonnu embeso ammaec yeremma ifingoc ubangerecac wiacac derecgeyemerec. 4#Aps 14:9Derecgeyemeru yereng ye henserioc. Henserima Petorongo yofi edeec, “Ge nerenna!” 5Ifi deu “Yereng wiac mong nembesonga dedape.” ifi negemma kic fima yerenec.

6 # Aps 4:10; 16:18 Yeremmanu Petorongo yofi edeec, “Ni hiedzona kpac nga wiac mocgu fenende, imoc ine gemba mena! Yesu Kristo Nadzaretenac, yeac kpacfu yacma kenna.” 7Ifi dema marifoiau mema miaru imohaingoc hania ubea seriec. 8Seriu kucbiric yacma namma yerigoc womonnu enggec. Emma yeng yu engemmama nga sing kengha amma Kebu dengereec. 9Kebu dengerema kengha anu ngicngac hafoangoc yeneng hemma degec. 10“Yennoc womonggac nagu kpara Nagukereng, ihai hiedzoac derecgeyemmeudeac takefec.” Ifi dema hensima kpidohoma dzonong fedefede anggec.

Petorongo miti hania edeyunuec

11Ngic ye Petoro nga Yohane yerearu kpeketaheu ngicngac homacngo Anutuac womong mana kakasang mong feec, kpara Salomo, imohai yerearu kemma kpedzucnedacma kerectegec anggec. 12Ifi anggec Petorongo yenemma ngicngac yofi edeyunuec, “Isracel ngicngac, ngeni ngic yomoc hemma kerectegec mi ambisia. Amma ngeni neri mi nerenseribisia. Faka imoc nereac kucac mi fingecdac nga imoc nereng Kebuac kicfu gombunga kecdipeac mi fingecdac. 13#Mke 3:6, 15; Ruk 23:13-25; Aps 2:23Imoc kpahac, kisicfocngina Abrahang nga Isaka amma Yakobo, yeneac Anutu yennoc enac tofoc tofohoa Yesu ngickunenggac kuc kibikperagiagoc miec. Ngeni ine ye ngadehema bangec monnunac ngic Anutu mi negemmidae, yenearu faigec. Foracngoc, Piratongo yoara isinggema yungecbesonga desiec. Nga ngeneng ine wagec. 14Yenoc ngic kpetiac nga faka dindingac mekecde nga ngeneng ine ye wagec. Amma godzungicngo ngic mong kpeu homeec, ngeni yenoc yungecngemmeudeac serima dema 15kekecac enarameme kpegec. Nga Anutungo ye homecfunac megboriu yarec, neni imocac hepuc aning.

16Nga neri Yesuac kpac kpacma negensinggedicac ngic yomoc hendae, ye kuc medac. Nga Yesuac kpacfu negen negensinggoc kecdipe, imocac amma ye ngereehomedac. Ngeni sasawango faka imoc hendae.

17 # Ruk 23:34; 1Tim 1:13 Tosofocna, ngeni nga garengfocngina Yesuac hania mi negemma ifi anggec, imoc yaguc negentegecduae. 18Foracngoc, Anutungo Messia meisinggeec, yeng kpendzeng kpekecma homeudeac profete sasawa yeneac enacfu yoac faiu degec, imoc sasawa Anutu deecfu fingecdarec. 19#Aps 2:38Imocac ngeni kopocsicngina meicmeickea anudeac ubangina dzigeneu Anutu hoanggebisia. 20Ifi anggecdeu Anutuac hoannunac kenec kuhagoc haude. Amma bicngoc Messia meisinggengemmeec, ye suengemmeude, imoc Yesunoc. 21Ye kurumennu emma kecmanungoc, wiac sasawaac mengec mengere naso hau dzigeneude. Imocac yoac Anutungo bicngoc yombong kpetiac profetefora enacnginau faiu dekperagigec. 22Mosengo yofi deec,

‘Kebu Anutunginango ngeneac arennunac profete mong ni isoc, ifia meficgengemmeu yeng yoac sasawa deude, imoc negendacbisia. 23Anu mongngo profete imocac yoac mi tofohoudeu ye arengnginaunac meickema kpehomebesonga.’ (Dser 18:15, 18-19)

24Naso yomohai faka fingecdac, imoc Samuearunac profete sasawa nangeregec, yeneng bic dekperagigec. 25Anutungo kisicfocngina yenigoc dzadzahac mema Abrahang yofi edeec,

‘Bangecga yeac arennu ngicngac bangeha bangeha keneheyunudacbesandua.’ (Fing 22:18; 26:4)

Ngeni dzadzahac imoc nga profete yeneac ubamarac imoc mekecdae. 26#Aps 13:46Ngeneacnoc bic negensima Anutungo medaha sueu mama fingerec, imoc ngeni sasawa kpenggodzuac sinnunac merengngunudacma kenecngunuudeac ifinoc anec.”

Actualmente seleccionado:

Aposoro 3: Ded

Destacar

Copiar