ISAIA 38
38
Hokhamwe Hejekia Ka Atsi Wa Heakito
(2 Ho 20.1-11; 2 Ka 32.24-26)
1Ara akhing tinkhan na Hokhamwe Hejekia ka atsi riikito. Raüta tsai nam nam tsito. Shammiwe Isaia, Amoj se ka apaiq liikai kito. Raüta apaiq ma akha nguto, “Tatiwe raq ümniima phanrap ka athuk atsomwiq tiihong laüta thülaq nguta chongtlo. Jamkhano ngukla ümtsi ka healot mak. Atsai ma khekham silaq.”
2Kiijiishe Hejekia raq atheaphi ka khetuk nü kiina nyi raüta akha achu jaüto: 3“Tsan na tiitsanglaq, Tatiwe lei, ngi raq ümniika tsapkapkap maq shiiliwan kang kiimaq ümwokhong na silata jaq sham wan kang ira. Kiimaq ümniiraq athithi niili ngi raq wranaiqshe jaq sham wan kang.” Raüta apaiq ka kai aho gushgu she hoqto.
4Kiijiishe Tatiwe raq Isaia 5ma Hejekia pha na jangki nongkiq nguta aming kuq nongto. Raüta apaiq ma akha ngulaq nguta thaüto, “Ngi ka, Tatiwe, ümti Dawit Shiikeawe, raq ümnaq achujaü ka taikang kiimaq ümmakphai roktaq kriimin chhikang. Ngi raq ümrilung ka wiiroqshi ri wiibiingi hali mitlu kuq nongha. 6Ngi raq ümniika mitiichhii kuqha. Kiimaq ara Jerusalem chela armin Asiria mungti hokham ajongwe jaqkhon mong wa mitiichhii kuqha. Lata Ngi raq ara chela ka khupwongkuq shat mikhekuqha.”
7Isaia raq treto, “Tatiwe raq ümniima akiqkham ka mitiihong kuqha nguta miithii ashi mishongkuq. 8Hokhamwe Ahaj raq haitaq rashe akhing thichang hiqkhu na tsaiji nyam ka, Tatiwe raq hiq khuphi roqshi kra jai na hali mitiijang baiq nong.” Krai mren rashekii tsaiji nyam ka kiimroqshi jai na tiisot kito.
9Hejekia ka atsiwa heakito. Kra jai maq apaiq raq ara tiitsam shi waiqto:
10Ngi raq tiimakang irilung shethung pii na
Ngi ka wulum mung na wawan she.
Atra simang she miraq.
11Ngi raq tiimakang ara mangjong hiq rilung na
Ngi raq Tatiwe ka chhinong mang she.
Riimakla maiqse atra ka chhilu mang she.
12Irilung paq ka chumbaiq raüta thumto,
Tombutiip tiitham runbaiq tlaq ikha,
Kheathum pantei wa chumbaiqtlaq ikha,
Ngi raq tiimakang Shiikeawe raq itsitsü paq chumbaiqto she nguta tiimakang.
13Rawa minru ngi ka atsitsi ma hoqsiqkang.
Hangsikaü raq irok irii thun ka bunlak buncha akaq phaq wan ikha.
Shiikeawe raq i miisaq tiithumbaiqto nguta tiimakang.
14Ibom ka akhiise ningkun ahü bomtsü mang.
Kiimaq ngi ka haütaü tsü ikhli hoqkang.
Imak ka ramungtan na liitsi raq shiiroro she.
Tatiwe lei, arthun
chamchao wa ngi chhiilaq.
15Ngi raq jawa michong?
Arka Tatiwe raq aklo.
Itsan ka tsihea, akon min lot mang.
16 Tatiwe lei, ngi ka üm miituli she misikang;
Ithatsi tiiheakuqlaq, laüta ngi atra tiisilaq.
17Itsi chamchao ka hansang miishe mija wan.
Ümniiraq ngi ka phanrap haisi chang wa tiichhii laü;
Ümniiraq ingarai thun wiita diikuqlaü.
18Wulum riika jurmin ümniika tiitsam mak;
Amaati raq üm tsapkap ma kam mak.
19Atrati raq ümniika tiitsamtlo;
Ümchaü ngi raq ümnaq tiitsam tiikang akha.
Awetiim raq asetiim ma üm tsapkap ka phankuqtlo.
20 Tatiwe lei, ümniiraq ithatsi tiiheakuq laü.
Naishiq raq phaqlamtoro tsü laita ümnaq tiitsam mishi hai.
Naishiq atra sikai wiiwii üm Shomjam na tiitsam shi mishi hai.
21Isaia raq hokhamwe ma apaiq tsam mitsi ba kiijaq phupmuptsi maq apho awin da kiimaq poplaq nguta chongto. Raüla apaiq tsi ka miheaki. 22Kiijiishe Hokhamwe Hejekia raq waito, “Ngi ka Shomjam na miwalotha nguta sap chang miithii ka jamlai wa?”
Actualmente seleccionado:
ISAIA 38: TANGSBSI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
