MOTHI 6

Banta Kipi Alam

1Meso chilangot, arleng ango kapaklang yok nalike dhorom abi-pun mar tiki yek; ladi tiki tene, nali ethakpe long kido Apa adung nali jatsi aman hlonghle ye. 2“Lasi nang konam banta piman, la-amun arleng para kaparklam hlongyok nengsik hel badike Arnam ahem ahem aro duwar ajon-jon, nang ngo-ngo cheng thep ke chipaklang wor-rek; ne naliyok khanangsi thando, anali abithang aman hlong tango. 3Manta nang konam banta piman, la-amun nang ancho-aripo pot tikiman, debera aripoyok bangpo pachithan un nangne ye. 4Tangsi nang banta kipi chiklangkle ye, aro chi-arsi kithek nang Apa nang-wolpi phaknge.

Kapingkit Aphan Kapaklang

(Luk. 11:2-4)

5Aro nali konam pingkit, la-amun nengsik hel badike doyek; piyok pu tene arleng kapaklangyok anali Arnam ahem-ahem aro duwar atok hel along arjapsi kapingkit aneng dokman. Ne naliyok khanangsi thando, analike abithang aman hel hlong tango. 6Manta konam nang pingkit, la-amun nang hem apulu yok lut damot, aro inghap chinghapsi, chi-arsitsi kido nang Apa angot pingkit not; la-long kithekjol nang Apa nangyok nangwol pi phak nge. 7Aro kapingkit apor, nang Bang-ajat hel badike akijol alam puyek; piyok pu tene anali ke aki-ong alam anatsi Arnam arjuye pusi anali chironman. 8La-apot nali lahel badi do yek; piyok pu tene nali potsi kanange doma, bangpo nali anangyok kachihanghe angosi, nali Apa thek detman. 9La-apot nali ladi pingkitnot: Hali ethakpe kido Apa, nangmen parklam nang. 10Nang longri pawang; jibadi ethakpe long, labadisi pirthimipe longta, nang kar-ih pachok ngot. 11Hali kanange a-an mini hali pinot. 12Hali dhar kichak helyok hali jibadi rono, ladisi haliyok ta dhar hali ronnot. 13Haliyok honjat long hali ponek, manta pap ajiu para hali ralnot.” 14Piyok pu tene nang bangyok adohel ronman, tene nali ethakpe long kido Apa nali yokta rone. 15Manta nalike bang adohel ronre, tene nali Apa ta nali ado ronre ye.

An-kihum Alam

16“Aro nali konam an-hum man, la-amun neng-sik hel badike amahang ingtingsu ke do yek; piyok pu tene analike an-humdo pusi arlengyok kapaklang aphan mahang pangtingsu man. Ne naliyok khanangsi thando, anali kihlong nange banta hlong tango. 17Manta nang an kihum amun, arleng angot an-kihum paklangkle si, mahang chi-arsi kido Apa angot nang an kihum chipaklang, la-anat nang phu jangthu chihel, aro mahang ta chirmunot; 18la-amun mahang chi-arsi theksi kido nang Apa nangyok kime angban nangpiye.

Ethakpe Long Puru Kibi

(Luk. 12:33-34)

19“Pot athem long arhlok aro mamor choman, aro kanghu hel tuksi chunghuman, ladi pirthimipe long puru chihansi yek. 20Manta dak long arhlok aro mamor cho-un-eh, kanghuta tuksi ponpe, ladi ethakpe long abithang aphan puru chihansi not. 21Piyok pu tene daklongsi nang apuru do, lalongsi nang thin ta doye.

Abangpo Akatha-ang

(Luk. 11:34-36)

22Ameksi abangpo katha-ang; la-apot nangmek akime do, tene nang abangpo apumpak tha-ang dange. 23Manta nang mek meme, tene nang abang apumpak ingting detne. La-apot nangthin long katha-angpo pangting kukman, tene labang kangting konbak phere meme kangting chiplange.

Arnam Aro Apuru

(Luk. 16:13; 12:22-31)

24Ihutpo bang-hini ahemphu long sal tiki un-eh; piyok pu tene anang ihut yok lang un-eh ye, aro ihutyok ke nengdoknge; lale ihutyok mengketsi, aro ihutyok ke pangwe ye; nali Arnam aro apuru, la hinilong tiki un-eh. 25La-apotsi ne naliyok thando, pot te chobo, lale pot te junbo? Ladi pusi ajiu aphan, lale pot chi-ikbo? Ladi puke chirondingek. Kicho-kijunyok ke ajiupo, aro pe-rik yok ke abangposi songkhan chot kalekma? 26Suneng kangjar awo helyok langot; analike ripta rip-re, rot ta rotre, aro rak longta thalthe; yongta nali ethakpe long Apa lahel yokta kicho a-an pachoman. Nali mehelyok ke ador ongchot kalek ma? 27Aro nali sitem inghote chirondingsi anang bithang ajiupo ingrup isibak chipading une ma? 28Aro pe-rik ayok, piyok la-an chironding do? Bitharlong kido amirhel pot badi theman, bangpo chiron lang; lamehel salta tikike, pe-rik ta chithak the; 29yongta ne naliyok thando, Solomon po anang ahuwit abihini doyong ta lamehel mir ikok atengta kilangme chot pe-rik kachi-ik-eh. 30La-apot, bithar long pot abap hel mini dojongdo, minap ayok melong pasek detne, bang poyok ta Arnam ladisi nali pachi-ikman,— nali kikrol la-an beksodet ma? 31La-apot, “Pot te chobo? Pot te jun bo? Aro pot te chi-ikbo? Ladi puke chirondingek.” 32Piyok pu tene Bang-ajat hel lamehel ahuwit abihini ar-ih man; aro labang ahuwit nali kanangedo, bangpo nali ethakpe long Apa than un. 33Manta nali ke ango Arnam longri aro anang dhorom kangthir chihang; la-amun labang ahuwit naliyok nalipiye. 34La-apot minap aphan chiron nek; piyok pu tene minap aphan minap abithang chiron une. Inirsi kidukpo, inirsi aphanke latengsi dor.

Actualmente seleccionado:

MOTHI 6: AMRI-BSI

Destacar

Copiar