wandījo 4

Kaini kūmūlaga Abeli

1Hūna ū Adamu ūlaala nū nke ū Eva, nūlūgīkī, Hawa ūbūūcha nda ūmyala Kaini; ūhaya gīkī, “Ū SEEBA wanigunanha nabyala ng'wana ngosha.” 2Hanuma ūmyala na Abeli, nzunaye wa ng'wa Kaini. Ū Abeli akabiza ndīīmi, alīyo ū Kaini ūbiza nīmi. 3Ikanza ilebe ū Kaini ūkamfunīja manong'ho ū SEEBA kwīngīīla ū mu matwajo ga mu ngūnda gwakwe. 4Nang'hwe ū Abeli ūfunya manong'ho ga mbyalwa ja kwandya ja mu mitugo jakwe, na mazezele gajo. Ū SEEBA ūng'wanukūla na būyegi ū Abeli, na a manong'ho gakwe. 5Alīyo atanyegelile ū Kaini, na a manong'ho gakwe; ū mhayo gwenūyo gūnsaayīcha no ū Kaini, ūyikala amining'halile. 6Ū SEEBA ūng'wīla ū Kaini gīkī, “Nibūlī wasaayile gīko? Mhayo kī gūlīkwenheleja kwikala ūmining'halile? 7Ī gīsī ū bebe ūlū wīta yawiza, ūtanukūlwa? Alīyo ūlū ūtatūngīlīgije managa gīkī, shilīho shibi a ha nyango gwako shikulindilile, nīyo shikūkūmbūlile no; gwike īkwigeleelilwe ūshipyene!”

8Lwise lūmò ū Kaini ūng'wīla ū nzunaye gīkī, “Tūjage kū ngūnda.” Aho balī mu ngūnda, kwimanīla ū Kaini wang'ūbūkīla ū nzunaye ū Abeli, ūmūlaga! 9Hūna ū SEEBA ūmūja ū Kaini gīkī, “Alī halī ū nzunayo ū Abeli?” Nang'hwe ūshosha alīhaya, “Natamanile; ū nene nalī nang'hani wa nzuna wane?” 10Ū SEEBA ūng'wīla, “Wītaga mhayo kī? Managa gīkī a mininga ga ng'wanong'wing'we galīnilīlīīla kūfuma a ha sī. 11Na lūūlū ī haha, ū bebe wazumagwa; wapeejiagwa ūyīngīle ī sī īyo yanukūlaga mininga ga nzunayo kūfuma mu nkono gwako. 12Ūlū wīlīma ī sī ītūkwinha matwajo gose gose; ūkūbiza nyūngi sagala ū mu sī, wa kwikala wibakīla nūūlū ndūhū mhayo!” 13Ū Kaini ūng'wīla ū SEEBA gīkī, “Ū nsango gwane gwanididohela no, gūkūnilemeela ūmo nagūbūūkīje. 14Īkī wanipeeja ī lelo ū mu sī, nū kūnilola ūtūnilola; nabizaga munhū wa kūja akūyūngaga sagala ū mu sī, nīyo nakūyikala nogohaga, nguno ose ose ūyo ūnibona adūgije kūnibūlaga!” 15Alīyo ū SEEBA ūng'wīla gīkī, “Yaya ītī gīko; munhū ose ose ūyo ūmūlaga Kaini, akūlīpīlwa shiilī ng'hangala mpungatī.” Hūna ū SEEBA ūntūūlīla lūmeng'ho ū Kaini, lwa koolecha gīkī ūyo ūmona atizūmūlaga. 16Na lūūlū ū Kaini wīnga ū kū būtongi bo ng'wa SEEBA, ūūkazenga mu sī ya Nodi, kīya ya Edeni.

Shibyalīlwe sha ng'wa Kaini

17Ū Kaini ūlaala nū nke wakwe, ūbūūcha nda ūmyala Enoka; ū mu shikū jenījo ū Kaini wazengaga nzengo nebe, ūgwitana lina lya ng'witūnja wakwe Enoka. 18Ū Enoka akamyala Iladi, ū Iladi ūmyala Mehuyaeli; ū Mehuyaeli ūmyala Metushaeli, ū Metushaeli ūmyala Lameki. 19Ū Lameki akatoola mhalī, ūmò wa bake bakwe witanagwa Ada, ū ūngī Zila. 20Ū Ada ūmyala Jabali, ū ng'wenūyo h'ūyo akabiza ise wa badīīmi, abo bakikalaga mu numba ja maheema. 21Ū nzunaye witanagwa Jubali, ū ng'wene ūbiza ise wa bose a batūji ba ndono na a bafuuji ba mbilūlū. 22Ū Zila nang'hwe ūbyala ng'wana ngosha, lina lyakwe Tubali-kaini; ū ng'wene akabiza nsuji wa shiseme sha būlī mbika, kūfuma mu chūma shaaza na shapi. Ū Tubali-kaini walī n'ilūmbūye witanagwa Naama.

23Lwise lūmò ū Lameki ūbawīla

a bake bakwe gīkī,

“Bing'we Ada na Zila, nidegelekagi;

bake ba ng'wa Lameki īdegelekagi

ī mihayo yane.

Naabūlagaga munhū kūlwa

kūnichūūbūla,

nsūmba walī waniminya.

24Ū Kaini ūlū walīpīlwa shiilī

ng'hangala mpungatī,

al'ū Lameki ū ng'wene angū

numho ng'hangala makūmi

mpungatī na mpungatī!”

25Ū Adamu akalaala hangī nū nke wakwe ūbyala ng'wana ngosha, ūng'wilīka ī lina lyakwe Seti. Nguno akahaya gīkī, “Ū Mulungu waninha ng'wana ūngī a ha ng'wanya gwa ng'wa Abeli, ūyo Kaini akamūlaga.” 26Ū Seti nang'hwe ūbyala ng'wana ngosha, ūng'wilīka ī lina lyakwe Enoshi, ū mu shikū jenījo a banhū hū bandya kūlīkumūcha#4:26 Kūlīkumūcha: Nūūlū, kūlīkumīlīja. ī lina lya ng'wa SEEBA.

Actualmente seleccionado:

wandījo 4: SUKBI15

Destacar

Copiar