Mateo 2

Da lvidaxa'c soua ÿajnaxanaxaiqa

1So Jesús lañoqo' yi pueblo l'enaxat Belén, huaigui yi 'alhua Judea huetoigui so na'a'q co'ollaq so Herodes nta'a, nachi ilotague' se'eso 'alhua. Nachi nvitra yi la ciudad Jerusalén soua shiÿaxa'u, chigoqda'ague da yi'oxoñi. Soomayi ÿajnaxanaxaiqa ana huaqajñipi. 2Nachi soomayi denataxaata'pe, 'eeta':

–¿Huá'ague ca hueta'ague ca lta'a na judiopi mayi chita'ague da ñiguiñi? Cha'ayi de'eda nala' lliguishiguem mayi sepa'aqta'ague, qomi' ñiloqta'a aso l'anaqte huaqajñi. Qaq ÿoqo'oyi ñanaguenaq da shi'oxodenaq.

3Nachi so nta'a Herodes co'ollaq ÿaÿaten de'eda, nachi ÿataqta i'elaq, nataq'en 'enauac nam shiÿaxauapi mayi netaña yi Jerusalén. 4Nachi so nta'a iÿaxangue 'enauac na lataxala'pi na ltaxaÿaxanaxanecpi na shiÿaxauapi da qaitaxaÿapegue' ñi Dios qataq nam ÿapaxagueetapeguec na shiÿaxauapi na nqataxacpi. Nachi inat da chaq hua'ague ca lañoqo' qome ca nta'a mayi nca'alaxaqui. 5Nachi somayipi 'eeta':

–Qomyi huaña yi Belén yim huaigui yi 'alhua Judea, cha'ayi nachiyi yi ÿiyiñi so l'aqtaxanaxanec ñi Dios co'ollaq 'eeta':

6Qaq 'am Belén, mayi 'am n'alhua na llalaqpi so Judá,

ÿataqta lta'adaic da 'ad'amaqchic,

sa ishit da qoneta'am nam nta'alpi yi'iyi 'alhua;

cha'ayi 'am chigoqchiguiña qome ca nataxala',

mayi ilo'ogue na Israel llalaqpi mayi ÿalamaxatpi.

7Nachi so Herodes ÿataqta nqañoxotchiguiñi da iÿaxaneugalo soua ÿajnaxanaxaiqa. Nachi inatta'pe da chaq negue't so na'a'q co'ollaq nachaxanalo aca huaqajñi. 8Ime, nachi ÿamaxaguelo da Belén, nachi 'enapegalo, 'eeta':

–Qanqo'oñiÿa yimayi, nachi qauchimaxachiÿaique ca nogotolec. Qaq qom mashi qauanachiÿa, nachi aÿim qaucoyiguiñi qome, yaqto' nataq'en aÿim ñoqo'ona da shi'oxoden.

9Qaq co'ollaq ime da l'aqtaxanaxac so nta'a, nachi soua ÿajnaxanaxaiqa je'c. Huaña, nachi qaltaq nachaxan aso huaqajñi mayi ilotra'a co'ollaq hua'ague da nala' lliguishiguem. Nachi hua'auta'ague da tatra'ague soomayi, chochi ivitta'a da vi'iiguet co'ollaq nalotelec cam noÿic mayi hueta'a so nogotolec. 10Qaq se'esoua ÿajnaxanaxaiqa co'ollaq qaltaq iloda'a aso huaqajñi, nachi ÿataqta lta'adaic da ntonaxa'c. 11Qaq co'ollaq inoxoodoigui so noÿic, nachi iloda'a so nogotolec qataq aso late'e María. Ime, nachi i'alyiñi naua l-llicte, nachi ÿi'oxodeetrac somayi. Ime, nachi ÿauajnguilo soua lachoxonaxaqui', nachi qaÿachitec na chigaqaigui na oro, qataq na nchinaxanaxat, qataq na lcha'q ana qo'ipaq l'enaxat mirra. 12Qaq co'ollaq ime', nachi huo'o da nqataxa'c huaigui so l'ochaqa' da sa ishit da ÿi'iguelaqtreuga yi netaña so nta'a Herodes. Nachi tatreuga ca lÿa nqa'aic co'ollaq ÿi'iguelaxadegue ca lma't.

So nogotolec qoÿiltaxangue da Egipto

13Qaq co'ollaq mashi je'c soua ÿajnaxanaxaiqa, nachi so lamaxashic ñi qadataxala' nachaxana so José co'ollaq huaigui so l'ochaxa. Nachi 'enapega, 'eeta':

–Qoñishiguem qome, nachi 'auacoosop yi nogotolec, qataq añi late'e, nachi 'ananeltaxangue da Egipto. Nachi qoueta'a qome yimayi, to' qom 'am shinapega. Cha'ayi ñi Herodes anac da nmitaique na nogotolec da ÿalauat.

14Nachi so José ñishiguem, nachi ÿacoosop so nogotolec qataq aso late'e, nachi lÿata'pe soomayi se'eso pe da tadegue da Egipto. 15Nachi huetra'a yimayi, chochi ivitta'a co'ollaq ileu so Herodes. Qaq 'eetec de'eda, yaqto' ÿataqta ipacchigui da l'aqtac ñi qadataxala' mayi i'axat so l'aqtaxanaxanec, 'eeta': Seÿaxana so ÿalec, chigoqchiguiña yi Egipto.

So Herodes damaxasoxoolec da qaÿalauat so ñaqpiolec

16Qaq so Herodes co'ollaq ila'a da soua ÿajnaxanaxaiqa ÿatenachi't somayi, nachi ÿataqta dalemata. Nachi damaxasoxoolec da qaÿalauat so ñaqpiolec, ivida'a nam mashi ivi' naua dos vi'iyi qataq na ÿapacteec ñaq qapi'olecpi, ÿataqta nmatchiguiñi 'enauac som netaña yi Belén qataq naua loiguiyi, ipacchigui naq'en da l'aqtaxanaxa'c soua ÿajnaxanaxaiqa. 17Qaq de'eda ÿataqta ipacchiguilo naua lliyigui'shi so Dios l'aqtaxanaxanec Jeremías, mayi 'eeta':

18Qai'aqtega da nvilÿaxac huaña yi Ramá,

noinaxac qataq n'alaxac.

Raquel añi noÿiitac souaxat yi llalaqpi,

qalaxayi sa nashin da qaicochaq,

cha'ayi mashi ileu yimayipi.

19Qalaxayi co'ollaq mashi ileu so Herodes, nachi huaña yi Egipto da qaltaq nachaxana so José so lamaxashic ñi qadataxala', huaigui naq'en so l'ochaxa. Nachi 'enapega, 'eeta':

20–Qoñishiguem qome, nachi 'auacoosop ñi nogotolec, nataq'en añi late'e. Ime, nachi 'avi'iguelaxa yi n'alhua na llalaqpi so Israel, cha'ayi mashi ileupi yim huotaique da ÿalauat na nogotolec.

21Nachi so José ñishiguem, nachi ÿauec so nogotolec qataq aso late'e da nqo'ooda yi n'alhua na Israel llalaqpi. 22Qalaxayi so José co'ollaq ÿaÿaten da so Arquelao da qoÿanagui da l'onataxanaxac so lta'a Herodes da qaltaq ilo'ogue yi 'alhua Judea, nachi somayi ÿataqta huo'o da lcolanaxa. Ime, nachi huo'o da nqataxac huaigui da l'ochaxa, nachi somayi taÿa yi 'alhua Galilea. 23Qaq co'ollaq mashi ivita yimayi, nachi nqo'ona da naña yi pueblo Nazaret. Qaq 'eetec de'eda, da yaqto' ÿataqta ipacchiguilo naua l'aqtaxanaxaco so l'aqtaxanaxanecpi ñi Dios co'ollaq i'axat da so Jesús qoÿiitega da Nazaret l'ec.

Actualmente seleccionado:

Mateo 2: TBSNT

Destacar

Copiar