Génesis 7
7
Ekmámeye ekwányam
1Aptáhak axta Wesse' egegkok apcháneya Noé s'e: “Xép apwánxa apagkok apxakko' apkeláneya chá'a m'a sekmámenyého nak ko'o, nepyeseksa s'e apyókxoho énxet'ák, apheykencha'a nak se'e negwánxa nak. Etex sa' kañe' yántakpayhe yetlo apketchek. 2Elántaxnés sa' siete kelennay'ák, tén han siete kelwán'ák ma'a aqsok nawha'ák megkatnaha nak élmanyása, xama kennawo', tén han xama kelwána sa' eyke chá'a m'a aqsok nawha'ák élmanyása nak. 3Elántaxnés sa' nahan siete kelennay'a, tén han siete kelwán'ák ma'a náta mók ektémakxa nak chá'a, yaqwayam enxoho megkamassegwomek ektémakxa nak chá'a náta keso náxop. 4Hakte wokmek sa' agkok siete ekhem, wáphaksek sa' ko'o ekmámeye ekweykmoho cuarenta ekhem, tén han cuarenta axta'a. ¡Amasséssók sa' ko'o náxop ma'a ekyókxoho aqsok ekha nak élennama sélane axta ko'o!” 5Apkelanak axta Noé m'a ekyókxoho apkeltamhókxa axta etnehek Wesse' egegkok.
6Seiscientos apyeyam apagkok axta temék Noé, cham'a eyapma axta yegmen ekyawe keso náxop. 7Aptaxneyk axta Noé kañe' yántakpayhe ekyawe awáxok, yetlo apketchek, tén han aptáwa', tén han ma'a aptánegken'ák nak, yaqwayam enxoho kalwomok teyp neyseksa ekwe yegmen ekyawe. 8-9Apkelántaxneyk axta xamók yántakpayhe Noé m'a aqsok nawha'ák megkalmanyása nak, tén han ma'a élmanyása nak, tén han ma'a élchampayól'a, tén han ma'a aqsok élpexyaweykegkoho nak náxop, ánet axta chá'a, xama kennawo tén han xama kelwána, ekhawo apkeltamhókxa axta etnehek Dios.
10Wokmek axta siete ekhem, keynawók axta eyapa yegmen xapop. 11Chaqhawók axta m'a diecisiete ekhem ektáhakxa nak apqánet pelten, seiscientos apyeyam apagkok axta temék ma'a Noé. Cháxa ekhem élmayhékxexa axta m'a éleñamakxa nak chá'a yegmen kóneg ma'a wátsam ekwányam, kelmayhekxeyk axta han atña'ák ma'a néten élmeykegkaxa nak chá'a yegmen. 12Cuarenta ekhem, tén han cuarenta axta'a axta weykmok ekmámeye meyke néxa keso náxop. 13Aptaxneyk axta Noé yántakpayhe xa ekhem nak, yetlo aptáwa' tén han apketchek Sem, Cam, tén han ma'a Jafet, tén han ma'a ántánxo aptánegken'ák nak. 14Kelántaxnawók axta han xamók ma'a ekyókxoho ektémakxa nak chá'a aqsok nawha'ák élmeymentakcha'a, tén han megkalmeymentakcha'a nak, tén han ma'a ekyókxoho ektémakxa nak chá'a aqsok nawha'ák élpexyaweykegkoho nak náxop, tén han ma'a náta. 15Kelántaxneyk axta xamók yántakpayhe Noé m'a ekyókxoho aqsok nawha'ák nak, ánet ánet axta chá'a. 16Kelántaxneyk axta chá'a xama kennawo', tén han xama kelwána, cham'a ektémakxa nak chá'a aqsok nawha'ák, ekhawo apkeltamhókxa axta etnehek Dios ma'a Noé. Keñe axta Wesse' egegkok apchápeykxo átog ma'a yántakpayhe.
17Cuarenta ekhem axta wokmok ekmámeye ekyawe. Xama axta eyántágko yegmen, meyákxeyk axta néten yántakpayhe, máha axta néten yegmen. 18Chántágkek axta yegmen, yágwokmók axta aqsa han ekmeykha yegmen ma'a yántakpayhe ekyawe. 19Chántágkók agko' axta m'a yegmen, wokmók axta eyápeykekxa m'a meteymog élwenaqte agko' nak keso náxop. 20Xama axta eyapa ekyókxoho m'a meteymog élwenaqte nak, chántágkek axta aqsa makham siete metros ma'a néten. 21Tén axta apkeletsapa apyókxoho énxet'ák apheykha axta keso náxop, ekhawo han ma'a náta, tén han ma'a aqsok nawha'ák megkalmeymentakcha'a nak, tén han ma'a élmeymentakcha'a nak, tén han ma'a élpexyaweykegkoho nak náxop. 22Keletsekkek axta ekyókxoho aqsok ekhéyak nak keso náxop, ekha nak élennama, tén han ma'a ekmowána nak katekkesek énnama. 23Wánxa axta aqsa Noé megyetsapa, tén han ma'a ekyókxoho aqsok élántaxnamo xamók kañe' yántakpayhe, keñe m'a nekha nak, sawhéxkók axta ekmassegwokmo, cham'a énxet, aqsok nawha'ák megkalmeymentakcha'a nak, tén han ma'a náta élchampeykegko nak néten, tén han ma'a aqsok nawha'ák élpexyaweykegkoho nak náxop, 24hakte ciento cincuenta ekhem axta weykmok eyapma yegmen keso náxop.
Actualmente seleccionado:
Génesis 7: ENXBI
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Enxet Lengua Sur Bible © Paraguayan Bible Society, 2015.
