Sak 8
8
Cilanga ca AMBUJE kuti taciwuwucisya msinda wa Yelusalemu mpela kala
1AMBUJE Ŵamaciligosope ŵambele utenga awu wakuti: 2“Mtima wangu wosope mbele ndili mkusosa kukamucisya Yelusalemu ligongo lya cinonyelo cangu cingwete pa ŵandu ŵakwe, cinonyelo cicindendekasisye une kuti natumbilile mnope amagongo ŵakwe. 3Tinjiwujila ku Yelusalemu msinda wangu weswela, ni kuja kukutama kweleko. Tiwucimanyika ni lina lyakuti msinda wakulupicika soni Litumbi lya Siyoni* tilicimanyika kuti litumbi lyangu lyeswela. 4Acalume ni acakongwe ŵacekulupe, ŵakwenda ni simbo ligongo lya ucekulu tacijenda soni m'misewu ja mu Yelusalemu, 5nipo m'misewumo timucigumbala soni acacanda ni ŵali nipo tacing'andagamo.
6“Yeleyi tiyiciwoneka mpela yangakomboleka kwa ngosyo sisisigalile, nambo kwa uneji yili yakomboleka. 7Tinjakulupusya ŵandu ŵangu ŵele ŵali ku yilambo kuŵajigalile, 8ni kuwuja nawo soni kutyocela kungopoko ni kungapilo lyuŵa kuti akatameje ku Yelusalemu. Jemanjaji taciŵa ŵandu ŵangu, soni une tinjiŵa Mlungu jwawo, kwalamulila jemanjajo mwakulupicika ni mwa cilungamo.
9“Mlimbe mtima! Sambano mkupikanaga mwakuwilisya maloŵe ga ŵakulocesya giŵaŵecete pa ndaŵi jele yilimbilimbi yaliji mkuŵicidwa kuti yitaŵidwe soni Nyumba ja AMBUJE. 10Ndaŵi jelejo mkanijiyice pangali mundu kapena cinyama cicapocelaga mbote pa masengo gagakamulidwe, soni jwalijose nganaŵa mkutama mu mtendele, ligongo natendekasisye kuti ajimucilane jwine ni mjakwe. 11Nambo ŵandu ŵasigeleŵa ngasinatenda soni mpela munatendelaga kala. 12Tacipanda mbeju syawo mu mtendele. Mipeleya jawo tijicisogola yisogosi, soni litaka tilicisogosya mbeju syejinji, soni tikuciŵa ula jejinji. Tinjipeleka upile wosope wenewu kwa ŵandu ŵakusigala ŵa mcilambo mwangu. 13Ŵandu ŵa ku Yuda ni ku Isalaeli! Kalakala ŵandu ŵa yilambo yine aŵele ali mkulwesyana jwine ni mjakwe pakuŵeceta maloŵe gakuti, ‘Malweso gagaga gamyicilile jemanja gele gigagwilile ŵandu ŵa ku Yuda ni Isalaeli!’ Nambo une tinjimkulupusya jemanja nambo soni acalendowo taciti kwa jwine ni mjakwe kuti, ‘Mpocele upile uwayice kwa ŵandu ŵa ku Yuda ni ku Isalaeli!’ Myoyo mkatenda woga nambo mlimbe mtima.”
14AMBUJE Ŵamaciligosope akuti, “Pandaŵi jiŵandumbilisye acinangolo ŵenu, naganisiye yakwikasya yakogoya pa jemanjajo soni nganinjenga nganisyo syangu, nambo kutenda yinganisisye kuyitendayo. 15Nambo sambano nguganisya yakupeleka upile kwa ŵandu ŵa ku Yelusalemu ni ku Yuda. Myoyo mkatenda woga. 16Ayi ni yitimtendeje: mŵeceteje yakuwona kwa jwine ni mjakwe. Ku nganya ja magambo, mkaŵeceteje ya cilungamo cisyesyene cele cikusayikasya mtendele.#Aef 4:25 17Mkaganisyaga ya matala gakonangana jwine ni mjakwe. Mkapeleka umboni wa unami mwakulumbila. Ngusaŵengana ni kuŵeceta ya unami, kutenda yangali cilungamo, ni njojo.”
18AMBUJE Ŵamaciligosope ŵapelece utenga wakuyicisyawu kwa Sakaliya: 19“Kulijima kulya* pa mwesi wa mcece, wa msano, wa msano ni jiŵili, ni wa likumi kuŵeje cindimba ca lukondwa ni kusangalala kwa ŵandu ŵa ku Yuda. Mnonyeleje cele cili cakuwona ni mtendele.”
20AMBUJE Ŵamaciligosope akuti, “Ndaŵi jikwisa jele ŵandu ŵakutyocela ku misinda jejinji taciyika ku Yelusalemu. 21Ŵele ŵakutyocela msinda umo tacijawula ku msinda ujakwe ni kuŵeceta kuti, ‘Tukwawula kukwalambila AMBUJE Ŵamaciligosope ni kuŵenda upile wakwe. Myice akuno!’ 22Ŵandu ŵajinji ni mitundu ja ŵandu taciyika ku Yelusalemu kukwalambila AMBUJE Ŵamaciligosope ni kuŵenda upile wakwe. 23Mu ndaŵi jelejo ŵandu likumi kutyocela ku mitundu ja ŵandu ŵakuŵeceta yiŵeceto yakulekangana tacikamula mkanjo wa Myuda ni kuŵeceta kuti, ‘Tulongane nawo, ligongo tupikene kuti Mlungu ali ni ŵalakwe.’ ”
Actualmente seleccionado:
Sak 8: YAWO
Destacar
Compartir
Copiar
¿Quieres guardar tus resaltados en todos tus dispositivos? Regístrate o Inicia sesión
Chiyawo Bible: Buku Jeswela © Bible Society of Malawi, 2014
