Sak 3

Mesomkulola ga jwakulocesya gakwamba ya Jwakutaga mbopesi

1Kupitila m'mesomkulola gane, AMBUJE ŵandosisye Yoswa, jwamkulungwa jwa ŵakutaga mbopesi* ali ajimi pameso pa lilayika lya AMBUJE. Paliji pana soni Satana* jwele jujwajimi kumbali ja mkono wamlyo wa Yoswa kuti amjimbe Yoswajo magambo.#Esa 5:2; Ciw 12:10 2Lilayika lya AMBUJE lila lyamsalile Satana jula kuti, “AMBUJE amjamuce m'mwejo, Satana! AMBUJE ŵakusawunonyela msinda wa Yelusalemu amjamuce m'mwejo. Mundu jweleju ali mpela citela cakolela ciciwumulidwe pa cisisa.”#Yud 9

3Pandaŵi jiŵajimi pameso pa lilayika lila, Yoswa ŵaliji ali awete yakuwala yesakale ya likaku. 4Sambano lilayika lila lyasalile acimjakwe uŵampecesye ŵala kuti, “Mwule yakuwala yesakale ya likaku yawete munduju.” Kaneko ŵamsalile Yoswa kuti, “Ndyosisye ulemwa* wenu wosope soni tinimpe yakuwala yasambano kuti m'wale.”

5Kaneko lilayika lila lyalamwile ŵakumpecesya ŵala kuti, “Mum'wece nduŵila jambone mu mtwe mwakwe.” Kaneko ŵam'wecice jwalakwejo yakuwala yasambano. Pandaŵijo ni kuti lilayika lya AMBUJE lyaliji lili lijimi papopo.

6Kaneko lilayika lya AMBUJE lila lyamsalile Yoswa kuti 7AMBUJE Ŵamaciligosope akuŵeceta kuti, “Naga mkugapikanila malamusi gangu ni kutenda yele yinimsalile une kuti myitende, timcipitilisya kulamulila nyumba jangu ni kulolela soni maluŵala gakwe, nipo soni tinjigapikanila mapopelo genu mpela mungusagapikanila mapopelo ga malayika gali pameso panguga. 8Mpikane sambano, Yoswa, m'mwejo mli jwamkulungwa jwa ŵakutaga mbopesi, mpikane soni jemanja ŵimli ŵakutaga mbopesi, ŵele ŵimli cimanyisyo ca yambone yitiyicitendekwa. Tinjiyika ni jwakutumicila jwangu jwakolanjidwa kuti Nyambi.#Yel 23:5; 33:15; Sak 6:12 9Nguŵika pameso pa Yoswa liganga lyalikwete mbali msano ni siŵili. Une namsyene tinjisokotapo maloŵe, tinjityosya ulemwa wa mcilambo acino pa lisiku limpepe. 10Pitiliciyika lisiku lyelelyo, wosope ŵene timciŵilanjidwa kuti mkasangalalile mtendele wenu, jwalijose ali atemi pa citela cakwe ca mpeleya ni ca mkuju.”#Mik 4:4

Actualmente seleccionado:

Sak 3: YAWO

Destacar

Copiar